1Mandaj Dioslla, Canmi ñuca Taita Dios capangui.
Cambaj shutitaca, jatunyachishpami alicachisha.
Canga, pipash na rurai ushanallacunatami rurashcangui.
Can tucuita pactachisha nijushcataca, na llullashpami, pactachishcangui.
2Pueblocunataca, Canmi tucuchishcangui.
Jatun pircahuan muyundi jarcashca pueblocunataca, tucuillatami urmachishcangui.
Shuj llacta gentecuna causana pueblotaca, cutinga pipash ama alichinajuchunmi, tucuillata ñuturcangui.
3Chaimandami ninan shinlli runacunapash, Candaca alicachinajunga.
Pueblocunapi causanajuj ninan ushaita charij gentecunapashmi, Candaca manllanajunga.
4Huajchacunapash Canbimi pacajunga. Huajchacuna jatun llaquipi cajpica, Canmi jatun torreshna huacaichingui.
Shinlli huairahuan tamiamandapash, canmi pacarcangui. Indi rupaipipash Canmi llandushpa pacangui.
Na ali runacunapaj ushaica, shinlli huairahuan tamia shamushpa, patapi huactarimunshnami llaquichijun.
5Chaquishca pambapi indi rupachijunshnami, shuj llactacunapi causaj jariyashcacunataca, pingaichingui.
Shinlli runacunapaj miraicunataca, ninan rupaipi yuracunata anguyachinshnami pingaichingui.
6Tucuita Mandaj Diosca, cai lomapimi tucui gentecunaman jatun micuita ruranga.
Chaipica, mishqui micunacunatami caranga.
Alipacha vinotapash, racuta fitishca aichatapash,
tullu ñutujucunandi, imahuambash na chapushca juyailla vinotapashmi caranga.
7Mandaj Diosca, cai lomapimi, jahualla quilpashpa pandachijujcunataca tucuchinga.
Tucui llactacunapi causajcunapaj ñavita telahuan quilpashcashna cajpipash, Paimi tucuchinga.
8Huañuitapash, Diosmi causaita causaicaman anchuchinga.
Mandaj Jatun Diosca, tucuicunapaj ñavimandami viquita fichachinga.
Pai agllashcacuna, tucui cai pachapi llaquichi tucushpa causanatapashmi anchuchinga.
Chaitaca, Mandaj Diosmi villarca.
9Chai punllapica, cashnami ninajunga:
“Paimi ñucanchi Taita Dios, Paitami shuyarcanchi.
Paimi, ñucanchitaca quishpichirca.
Mandaj Diostami, ñucanchica shuyashcanchi.
Pai quishpichijpimi, ninanda cushijushunchi” ninajungami.
10Cai lomamandami, Mandaj Diosca, ricuriashpa mandajunga.
Ashtahuangarin, Moab llactapi causajcunataca,
mapata shitana pambapi jupata sarujshnami, chai pushtupillata sarunga.
11Chashna rurajujpipash, Moab llactapi causajcunaca,
yacupi huambuj runa maquita chutanshnami chutanajunga.
Ashtahuangarin, paicuna jariyashpa causashcami, paicunataca tucuchinga.
Paicunapaj ushaitaca Diosmi quichunga.
12Shinallata paicunapaj pueblocunapi muyundi jatun shinlli pircacunatapash, tucuillami urmachinga.
Paicunataca, tucuilla ñutushpa alpaman tigrachishpami, pingaichinga.
Who We AreWhat We EelieveWhat We Do
2025 by iamachristian.org,Inc All rights reserved.
