2 TESALONICENSES 2 - Quichua Imbabura 2016

Juchatalla ruraj runami shamunga

1Juyashca crijcuna, ñucanchi Apunchi Jesucristo shamujpi, Paihuan tandanajungapa rina cashcamandami, cashna ninajunchi:

2Cangunaca, na umai tucunachu canguichi. Apunchi Jesús shamuna punlla ñami chayamugrin nishpami, Espíritu rimachijpishna villashpa, ñucanchi quilcashcashna fangatapash ricuchinajunga. Shina cajpipash, na crinallachu canguichi.

3Cangunataca, pipash amapacha umachishca cachun. Jesús shamuna punlla nara chayamujpillatami, Diosta fiñashpa, yangapi churashpa rimanajunga. Shinallata, chingaita chingangapa rina, juchatalla ruraj runarami ñaupashpa shamunga.

4Chai runami, Taita Diostapash, Diospajlla tucui imatapash, na ricunayachishpa ninandapacha jarcashpa fiñajunga. “Taita Diosmi cani” nishpami, Diosta yarina huasipi paica tiyaringa.

5Cangunahuan chaipi cashpallata ñuca chashna villashcataca ¿nachu yaringuichi?

6Chai runa shamuna punllapacha shamuchun, ima jarcajujtapash cunanga ñami yachanguichi.

7Pacashpa tiyajushca chai jatun na alica, ñami rurarishpa catijun. Shina cashpapash, cunanbi paita ima jarcajujta anchuchingacamanmi, na ashtahuan na alita rurashpa cati ushajun.

8Shina anchuchishca jipami, chai jatun na alita ruraj runaca ricurimunga. Chai runataca, Apunchi Jesusmi, punchapamba shamushpa, Paipaj shimimanda llujshijuj samaihuan huañuchishpa tucuchinga.

9Chai jatun na alitalla ruraj runaca, Satanás cachamujpimi, ninan ushaihuan, pipash na rurai ushanallacunata rurashpa, jatun manllarinacunatapash llullashpa rurajunga.

10Shinallata, na alitalla rurashpami, chingaita chingaiman rinajuj gentecunataca umachinga. Juyaihuan, na llullashpa, quishpirinamanda villajuj shimita na chasquishcamandami chashna tucunga.

11Shinamandami, Taita Diosca, umachina ushaita cachamujpi, chaitara crishpa catinajunga.

12Na llullashpa villajuj Shimita na crishpa, chai na alicunata rurashpa cushijushcamanda, ninanda llaquichi tucuchunmi chashna ruranga.

Diosca quishpichingapami agllashca

13Ashtahuangarin ñucanchica, cangunamandaca Taita Diosta punllandi pashi ninajunatami charinchi. Apunchi Jesús juyashca crijcuna, cangunataca, cai pachata nara rurashpallata quishpichingapa, Taita Dios agllashcamandami chashna pashi ninajuna canchi. Cangunataca, Diospaj Espiritumi na llullashpa villajuj Shimita crishcamanda, Diospajlla causachun agllashca.

14Quishpirinamanda cangunaman villajpimi, ñucanchi Apunchi Jesucristopaj juyailla llactagupi causagrichun, Diosca cangunataca cayarca.

15Juyashca crijcuna, shina cashcamandami, Jesucristomanda, cangunaman villashpapash, quilcashpapash, ñucanchi imata yachachishcataca na cungashpa, aligutapacha catina canguichi.

16Ñucanchi Apunchi Jesucristopash, ñucanchi Taita Diospash juyashpami, causaita causaicaman cushijushpa causagrinata shuyanajuchun, ñucanchita juyaimandalla chashna carashca.

17Cangunapaj shungupi aligutapacha yarishpa, tucuita rimashpa, tucuitapash aliguta rurashpa catichunmi, chashna mañanajunchi.