1Ricuichi, Mandaj Diosca tucui cai pachataca,
imapash illaj, chushajtami saquigrin.
Cai pachataca, shujmanmi tigrachinga.
Cai pachapi causajcunatapash, caita chaitami calpachinga.
2Chai llaquica, llactapi causajcunatapash, sacerdotetapash,
amutapash, paipajta rurajtapash,
amupaj huarmitapash, paipajta ruraj huarmitapash,
randijtapash, jatujtapash,
culquita mañachijtapash, culquita mañajtapash,
imata mañachijtapash, imata mañajtapash, tucuillata chashnallatami llaquichinga.
3Cai pachaca, tucuillapachami chushaj saquiringa.
Tucui imapash illajtami saquinga.
Mandaj Diosmi, cai shimicunataca villashca.
4Cai pachaca, urmashpami tucurirca.
Cai pachaca, ña huañujunshnami urmarca.
Ashtahuan ali gentecunapashmi, ña huañungashna tucunajurca.
5Cai pachaca, chaipi causajcunapaj juchahuanmi mapayarca.
Paicunaca, Dios mandashcatami na cazunajurca.
Pai mandashcacunataca, shujmanmi tigrachinajurca.
Causaita causaicaman Dioshuan ari ninajushcatapashmi napacha cazunajurca.
6Chaimandami cai pachaca, ninanda na alicachishpa llaquichijpi tucurirca.
Cai pachapi causajcunapashmi, jichui tucunajurca.
Shinamandami, cai pachapi causajcunaca, huaquinlla puchurca.
7Uva chagracunapipash ungüi yaicujpimi, vinopash chingarca.
Shungupi ninanda cushijushpa causajcunaca, llaquirishpami huacanajurca.
8Panderota huactashpa cushijunapash tucurircami.
Ninanda cushijushpa caparinajuipash tucurircami.
Arpata taquishpa cushijunapash tucurircami.
9Vinotapash, na ufiashpa candanajungachu.
Ufiajcunapaca, sidrapash jayajmi tucunga.
10Imatapash na alitalla rurashpa causashcamandami, pueblocunapash llaquichi tucushca.
Pipash ama yaicuchunmi, huasi pungucunatapash tucuilla vichashca.
11Vino illashcamandami, ñangunapica huacashpa purinajun.
Tucui cushijunami, cai pachamandaca tucurishca.
12Pueblocunaca, llaquinayaitami tucuchi tucushca.
Pungucunapash, tucuilla faquirishpami, urmashca sirinajun.
13Cai pachapi causaj gentecunapaj chaupipica,
olivo yurata cuyuchishpa, granocunata pallajpi huaquinlla pallajuna puchushcashnami saquiringa.
14Paicunami, Mandaj Dios jatun cajta ricushpaca, ninanda cushijushpa candanajunga.
Yacu chaupipi tiyaj llactacunapi causajcunapashmi alicachinajunga.
15Shina cashcamandaca, pugru pambacunapipash, Mandaj Diosta alicachipaichiyari.
Mama cucha manñacunapipash, Israelcunata Mandaj Diostaca, jatunyachishpa candashca cachun.
16Cai pacha caru llactacunapi causajcunapash:
“Alitalla ruraj Diostaca alicachipaichiyari” nishpa candanajujtami uyarcanchi.
Chaita uyashpami, ñucaca: ¡Aij ñucalla, llaquipimari cani, llaquipimari cani! nircani.
Yachashca jahua na cazujcunami, ashtahuan na cazunajun.
Napacha cazujcunashnami, yachashca jahua na cazunajun.
17Cai pachapi causajcuna, cangunaca,
utujupi urmashpa, linllipi japi tucushpami jatun llaquita apagringuichi.
18Manllanayai llaquimanda pacajushpa calpaj runaca, utujupimi urmanga.
Utujumanda llujshishpa calpaj runaca, linllipimi japi tucunga.
Chai llaquicunataca, jahua pachamandami cachamunga.
Shina cajpimi, alpa mamapash ninanda cuyunga.
19Cai pachaca tucuillapachami llaquichi tucunga.
Cai pachaca, tucuillami ñutui tucunga.
Tucui cai pachami, ninandapacha chujchunga.
20Cai pachaca, machashca runashnami caita chaita cuyurijunga.
Chuglla huasishnami urmanga.
Cai pachapica, jucha ninandapacha mirajpimi, tucuilla urmashpa, cutinga napacha jataringa.
21Chai punllapica, jahua pachapi tucui tiyashcacunatami, Mandaj Diosca llaquichinga.
Shinallata, cai pachapi tiyaj jatun mandajcunatapashmi llaquichinga.
22Alpata utujushca ucupi, prezucunata tandachishcashnami charinga.
Paicunaca prezullatami causanga.
Ña unaita prezu charishca jipami, paicunataca ninanda llaquichinga.
23Lunapash pingai tucungami, indipash musparingami.
Tucuita Mandaj Dios, Sion lomapi tiyaj Jerusalenbi mandajujpimi, chashna tucunga.
Pai agllashca mandaj rucucunapaj ñaupajpimi, Diosca ninan ushaihuan punchapamba tiyajunga.
Who We AreWhat We EelieveWhat We Do
2025 by iamachristian.org,Inc All rights reserved.
