JUECES 2 - Quichua Imbabura 2016

Mandaj Diospaj angelmi, Boquim shuti pueblopi ricurishca

1Mandaj Diospaj angelca, Gilgal pueblomanda, Boquim shuti puebloman vichai rishpami cashna nijurca: “Ñucami cangunataca, Egipto llactamanda llujchimurcani. Shina llujchimushpami, cangunapaj ñaupa taitacunaman carashami nishpa juramentushca llactaman pushamurcani. Paicunataca cashnami nircani: ‘Cangunahuan ari nishcataca, na cungashpami pactachisha.

2Cangunaca, cai llactapi causajcunahuan imata pactachingapapash na ari ninachu canguichi. Shinallata, paicunapaj altarcunatapash tucuillatami urmachina canguichi’ nircanimi. Ashtahuangarin, ñuca mandashcataca ¿imashpata na cazushcanguichiyari?

3Shinamandami, cashna nijuni: ‘Cai llactapi causajcunataca, cangunapaj ñaupajmandaca na llujchishpa cachashachu. Ashtahuangarin, paicunaca, huashapi astinshnami cangunataca llaquichinga. Paicunapaj dioscunapash, nitijachijshnami pandachinga’ ninimi” nijurcami.

4Mandaj Diospaj ángel, tucui Israelcunaman shina villajpimi, tucui gentecuna caparishpa huacanajurca.

5Shinamandami, chai pushtutaca, Boquim nishpa shutichirca. Shinallata, chaipimi animalcunata, Mandaj Diosman cushpa huañuchinajurca.

Josué huañushcamanda(Jos. 24:29-31)

6Josueca, ñami gentecunataca, “cayacaman” nishpa cachashca carca. Israelcunapash, ñami paicuna japina llactacunata japingapa rishca carca.

7Israelcunaca, Josué causajui tucui huatacunapipash, Josué huañushca jipa, mandaj ancianocuna mandajui huatacunapipashmi, Mandaj Diosta cazushpa causanajurca. Chai mandajcunaca, Israelcunaman, Mandaj Dios tucui imatalla rurashcataca alimi yacharca.

8Mandaj Diospajta ruraj Josueca, patsaj shuj chunga huatata charishpami huañurca. Paica, Nun shuti runapaj churimi carca.

9Paitaca, Efraín shuti urcupi, Timnat-sera shuti, paipaj alpapillatami pambarca. Chai alpaca, Gaas shuti urcumandaca janajmanmi carca.

10Tucui chai miraicunapash huañushpami, paicunapaj ñaupa taitacunahuan tandanajugrirca. Chaipaj jipaca, Mandaj Diostapash na rijsij, Israelcunamanda imatalla Dios rurashcatapash na yachaj, shuj miraicunami causarca.

Israelcuna, Diosta fiñashpa, juezcuna imatalla rurashcamanda

11Israelcunaca, Baal shuti dioscunatara alicachishpami, Mandaj Diospaj ñaupajpica, jatun na alita ruranajurca.

12Paicunapaj ñaupa taitacunata Egipto llactamanda llujchimushca Mandaj Taita Diosta saquishpami, shuj dioscunatara catinajurca. Paicunapaj muyundi llactacunapi causajcunapaj dioscunatara ninanda alicachishpami, Mandaj Diostaca ninanda fiñachinajurca.

13Paicunaca, Mandaj Diosta saquishpami, Baal shuti, Astarot shuti dioscunatara ninanda alicachinajurca.

14Chaimandami Mandaj Diosca, Israelcunahuan ninandapacha fiñarishpa, shuhuacunapaj maquipi churajpi, tucuita quichui tucunajurca. Shinallata, paicunapaj muyundi llactacunapi causanajuj, paicunata fiñajcunapaj maquipipashmi churarca. Israelcunaca, paicunata fiñajcunahuan macanajuitaca, napacha usharcachu.

15Paicuna maipi macanajungapa llujshijpipash, Mandaj Diosca, ninanda fiñashpami llaquichijurca. Mandaj Dios imashna villashcashna, Mandaj Dios imashna juramentushcashnami llaquichijurca. Shinamandami Israelcunaca jatun llaquita apanajurca.

16Shina cashpapash Mandaj Diosca, paicuna ima charishcacunata apajcunapaj maquimanda cacharichingapami, juezcunata churarca.

17Ashtahuangarin, pai churashca pushaj juezcunatapash, na cazushpami Israelcunaca, shuj dioscunatara ninanda alicachishpa causanajurca. Paicunapaj ñaupa taitacuna, Mandaj Dios mandashcacunata cazushpa causanajushcamandaca, ñapashmi pandarinajurca. Na paicunapaj ñaupa taitacunashna causanajurcachu.

18Mandaj Diosca, Israelcunata pushachun juezcunata churashpaca, Mandaj Diosca chai juezcunahuanmi pacta carca. Chaimandami, juezcuna causajui huatacunapica, paicunata fiñajcunapaj maquimanda cacharichirca. Llaquichishpa charijcuna, paicunata ninanda llaquichinajujta ricushpami, Mandaj Diosca ninanda llaquirca.

19Ashtahuangarin, shuj juez huañujpica: Paicunaca, huashaman tigrashpami, shuj dioscunata alicachishpa, paicunapaj ñaupa taitacunatapash yali ashtahuan na aliman tigrarca. Chai dioscunapaj ñaupajpi cungurishpa, paicunata alicachishpa causanajushpami, chashna na alita ruranataca napacha saquinajurca.

20Chaimandami Mandaj Diosca, Israelcunahuanga ninandapacha fiñarishpa cashna nirca: “Cai gentecunaca, paicunapaj taitacunahuan ari ninajushcataca, na cazushpami yangapi churanajun.

21Josueca, cai llactamanda gentecunataca nara llujchishpallatami huañurca. Shinamandami Ñucapash, cai gentecunataca na llujchishpa cachagrini” nircami.

22Mandaj Diosca, Israelcunataca, paicunapaj taitacunashnalla, cazungapa munajta, na munajtapash yachangapami, chai gentecunataca na llujchishpa cacharca.

23Shinamandami Mandaj Diosca, chai llactapi causanajuj gentecunataca na tucuilla llujchishpa, Josuepaj maquipipash na churarca.

Blog
About Us
Message
Site Map

Who We AreWhat We EelieveWhat We Do

Terms of UsePrivacy Notice

2025 by iamachristian.org,Inc All rights reserved.

Home
Gospel
Question
Blog
Help