AMÓS 1 - Quichua Imbabura 2016

Quimiriallapi tiyaj llactacunata llaquichinamanda

1Cai shimicunaca, Israelcuna ima tucunata, Tecoa shuti pueblomanda michij Amós shuti runa villashcami. Judá llactataca, jatun mandaj Uziasmi mandajurca. Israel llactataca, Joás runapaj churi Jeroboammi mandajurca. Alpa mama ninanda chujchungapaca, ishcai huata illajpillatami villajurca.

2Paica cashnami nijurca:

Sión shuti lomapi tiyaj Jerusalenmandami,

Mandaj Diosca, león huacanshna shinllita caparishpa rimamunga.

Michina jihuacunapash, ninandami chaquinga.

Carmelo shuti jahua urcupashmi chaquinga.

3Mandaj Diosca, cashnami nin:

“Damasco pueblopi causajcunataca, quimsa juchacunata rurashcamandapash,

chuscu juchacunata rurashcamandapash, llaquichinataca na saquishachu.

Paicunaca, Galaad llactapi causajcunataca, trillana jirruhuan trillajshnami tucuchinajurca.

4Shinamandami Hazael shuti runapaj huasipica, ninata japichisha.

Chai ninallatami, Ben-adad shuti runa mandashpa tiyajuna huasicunatapash, tucuillata rupachinga.

5Damasco pueblopaj jatun pungu jarcanacunatapashmi faquisha.

Avén shuti pugru pambapi causajcunatapash, Bet-edén shuti llactata mandajcunatapashmi tucuchisha.

Siria llactapi causajcunaca, Kir shuti llactamanmi prezu apai tucunga” ninmi Mandaj Diosca.

6Mandaj Diosca, cashnatapashmi nijurca:

“Gaza shuti pueblopi causajcunataca, quimsa juchacunata rurashcamandapash,

chuscu juchacunata rurashcamandapash, llaquichinataca na saquishachu.

Paicunaca, Edom llactapi causajcunaman cungapami, shuj pueblopi causajcunataca tucuicunata prezu japinajurca.

7Shinamandami, Gaza shuti pueblo muyundi pircapica, ninata japichisha.

Chai ninami, mandashpa tiyajuna huasicunatapash, tucuillata rupachinga.

8Asdod shuti pueblopi causajcunatapash, Ascalón pueblopi mandajcunatapashmi tucuchisha.

Ecrón shuti pueblopi causajcunatapash,

huaquinlla puchushca filisteocunatapash Ñuca ninan ushaihuan llaquichijpimi, huañushpa tucuringa” nijurcami Mandaj Jatun Diosca.

9Mandaj Diosca, cashnatapashmi nijurca:

“Tiro shuti pueblopi causajcunataca, quimsa juchacunata rurashcamandapash,

chuscu juchacunata rurashcamandapash, llaquichinataca na saquishachu.

Paicunaca, shuj pueblopi causajcunataca, prezu japishpami, Edom llactapi causajcunaman cunajurca.

Huauquipurashna ari nishcataca na yarishpami, chashna ruranajurca.

10Shinamandami, Tiro shuti pueblo muyundi pircapica, ninata japichisha.

Chai ninami, mandashpa tiyajuna huasicunatapash, tucuillata rupachinga” nijurcami.

11Mandaj Diosca, cashnatapashmi nijurca:

“Edom llactapi causajcunataca, quimsa juchacunata rurashcamandapash,

chuscu juchacunata rurashcamandapash, llaquichinataca na saquishachu.

Paicunapaj huauquicunatallatami catiriyashpa, espadahuan huañuchinajurca.

Shujcunata juyaj cashcatapash cungashpami, llaquitapash na llaquishpa, shuhuashpa causanajurca.

Paicunapaj huauquicunataca, ninandapacha fiñashpami causanajurca.

12Shinamandami Temán shuti llactapica, ninata japichisha.

Chai ninami, Bosra shuti pueblopi mandashpa tiyajuna huasicunatapash, tucuillata rupachinga” nijurcami.

13Mandaj Diosca, cashnatapashmi nijurca:

“Amón llactapi causajcunataca, quimsa juchacunata rurashcamandapash,

chuscu juchacunata rurashcamandapash, llaquichinataca na saquishachu.

Paicunapaj alpa ashtaca tucuchun yashpami,

Galaad llactapi causaj vijsayu huarmicunataca, vijsata liquishpa huañuchinajurca.

14Shinamandami, Rabá shuti pueblo muyundi pircapica, ninata japichisha.

Jatun macanajui punllapica culunlla shamushpami,

paicuna mandashpa tiyajuna huasicunatapash tucuchinga.

Ninan huairahuan tamiashnami, tucuillata tucuchinga.

15Paicunata jatun mandajca, pai churashca tucui mandajcunandimi, prezu rijunga” nijurcami Mandaj Diosca.