1Jatun mandaj Darío ña ishcai huatata mandajujpi, chai huatapaj sucta quilla, callari punllapimi, Mandaj Diosca, profeta Hageota villagrichun mandarca. Hageo runaca, Salatiel runapaj churi, Judá llactata mandaj Zorobabel runaman, Josadac shuti runapaj churi, sacerdotecunata mandaj Josué runamanbashmi, cashna nishpa villarca:
2Tucuita Mandaj Diosca cashnami nin:
“Cai gentecunaca cashnami ninajun:
‘Chai punllacunaca, nara chayamunllu.
Mandaj Diospaj huasita cutin huasichina punllacunaca, nara chayamunllu’ ninajunmi” nishpami rimarca.
3Chaimandami Mandaj Diosca, profeta Hageotaca, cashna villachun mandarca:
4“Ñuca huasica jichushcami sirijun.
Shina jichushpa saquishpachu, ¿cangunaca, juyaillata rurashca huasicunapi causanajunguichi?” ninmi.
5Tucuita Mandaj Diosca cashnatapashmi nin:
“Cangunaca, aliguta yarishpami causana canguichi.
6Cangunaca, ashtacata tarpushpapash, ashatallami japinguichi.
Micushpapash, na vijsa pactashpallatami causanguichi.
Yacuta ufiashpapash, yacunayaihuanmi causanguichi.
Chirijpi churajunacunata churajushpapash, napacha cunujyashpami causanguichi.
Imata rurashcamanda culquita japishpapash, imapapash na pactajpimi causanguichi” ninmi.
7Tucuita Mandaj Diosca cashnatapashmi nin:
“Cangunaca, aliguta yarishpami causana canguichi.
8Urcuman vichai rishpa, caspicunata apamushpami,
Ñuca huasita cutin shayachina canguichi.
Chai huasita shayachijpica, ninandami cushijusha.
Ñucaca, ninandami alicachi tucusha” ninmi Mandaj Diosca.
9Tucuita Mandaj Diosca cashnatapashmi nin:
“Ninanda charingapa mascashpapash, ashatallami taringuichi.
Cangunapaj huasicunapi imata alichishcatapash, fucushpami tucuillata chingachisha.
‘¿Imamandashi chashna rurasha?’
Ñuca huasica, shitashca sirijujpipash,
cangunapaj huasicunatara alichingapa calpanajushcamandami, chashna rurasha.
10Chaimandami, jahua pachamandaca ñana tamiamurca.
Cai alpapica, ima granopash na fucurcachu.
11Ñucami, cai llactapaj urcucunapica na tamiachimurcani.
Chaimandami, trigopash, vinopash, aceitepash, ima tarpushcacunapash na fucurca.
Shina cajpimi, gentecunapash, animalcunapash, ninan llaquita apanajun” ninmi.
12Paicunata Mandaj Taita Dios chashna villachun cachamushcataca, Salatiel runapaj churi Zorobabel runapash, Josadac runapaj churi, sacerdotecunata mandaj Josuepash, caishuj gentecunapashmi uyanajurca. Paicunata Mandaj Taita Dios, profeta Hageoman chashna villashcata uyashpami, Mandaj Diospaj ñaupajpica ninanda manllarinajurca.
13Shina cajpimi, Mandaj Dios cachamushca profeta Hageoca: “Mandaj Diosca: ‘Cangunahuanmi cani’ ninmi” ama manllaichichu nishpa villajurca.
14Mandaj Diosca chashnami, Salatiel shuti runapaj churi, Judá llactata mandaj Zorobabel runamambash, Josadac runapaj churi, sacerdotecunata mandaj Josuemambash, caishuj gentecunamambash, Paipaj huasita alichina yuyaita curca. Shinamandami, tucuita Mandaj Taita Diospaj huasitaca, alichingapa shamunajurca.
15Jatun mandaj Darioca, ñami ishcai huatata mandajurca. Chai huatapaj sucta quilla, ishcai chunga chuscu punllapimi alichi callarinajurca.
Who We AreWhat We EelieveWhat We Do
2025 by iamachristian.org,Inc All rights reserved.
