1 REYES 12 - Quichua Imbabura 2016

Israel ayllucuna na cazushpa jatarishcamanda(2 Crón. 10:1—11:4)

1Tucui Israelcuna, Roboam runata Jatun mandaj cachun churangapa Siquem shuti puebloman rishca cajpimi, paipash, chai puebloman rirca.

2Shina cajpimi, Nabat shuti runapaj churi Jeroboam runaca, Egiptomanda tigramurca. Paica, jatun mandaj Salomonbaj ñaupajmanda pacajushpa rishcami Egiptopi causajurca.

3Chaipi causajujpi paita cayachun cachajpimi, Jeroboam runaca Egiptomanda tigramurca. Shina cajpimi, tandanajushca Israelcunaca, Roboam runataca cashna ninajurca:

4“Cambaj taitaca, yuguta apachinshnami ñucanchitaca llaquichishpa causarca. Cunanga, cambaj taita chashna llaquichishcamandaca, ashallatapash fangallayachinami cangui. Chashna rurajpica, cambajta rurashpami causashun” ninajurcami.

5Shina ninajujpimi Roboam runaca, cashna nirca:

“Cunanga richilla, cunanmanda quimsa jipa tigramunguichi” nijpimi, gentecunaca rinajurca.

6Chai jipami, jatun mandaj Roboam runaca, paipaj taita Salomón causajujpi, paipajta rurashpa causanajushca mandaj rucucunataca, yuyaita cuchun mañashpa cashna tapurca:

“Cai gentecunataca, ¿imatata nina cani? ¿ima yuyaitata cuhuanguichi?” nircami.

7Shina nijpimi paicunaca, cashna ninajurca:

“Cai gentecuna mañashcata uyashpa, paicuna mañashcata rurajpica, paicunapaj tucui causaipimi, cambajta rurashpa causanga” ninajurcami.

8Ashtahuangarin paica, chai mandaj rucucuna cushca yuyaitaca saquishpami, paihuanllata pacta viñashca huambracunatara, yuyaita cuhuaichi nishpa mañarca.

9Paicunataca cashnami nirca:

“Ñucataca cashnami ninajuhuarca: ‘Cambaj taita ñucanchiman llashaj yuguta apachinshna, ninanda llaquichishpa charishcamandaca, ashallatapash fangallayachipai’ ninajuhuarcami. Shina ningapa shamuj gentecunataca, ¿ima nishpata tigrachina cani?” nircami.

10Shina nijpimi, Roboam runahuan viñashca, chairalla runacunaca, cashna ninajurca:

“Yuguta aparishcashna llaquita apanajujpipash, cambaj taitaca ashtahuanmi ñucanchitaca llaquichirca. Ashtahuangarin canga, ashallatapash fangallayachiyari ningapa shamuj gentecunataca, cashna ningui: ‘Ñucapaj uchilla dedoca, ñuca taitapajtapash yalimi.

11Ñuca taitaca llashaj yuguta apachinshnami llaquichijurca. Shina cashcamanda ñucacarin, ashtahuanmi chai yugutaca llashayachisha. Ñuca taitaca, azialcunahuanmi astishpa llaquichijurca. Ñucacarin, alacrangunahuanmi llaquichisha’ ningui” ninajurcami.

12Jatun mandaj Roboam runaca: “Quimsa punlla yalijpi ñucapajman tigramunguichi” nishcami carca. Shina nishcashnami, ña quimsa punlla tucujpica Jeroboam runaca, tucui gentecunandi, Roboam runapajman shamurca.

13Shina shamujpimi, jatun mandaj Roboam runaca, mandaj rucucuna nishcataca yangapi churashpa, shinllitapacha rimarca.

14Chai huambracuna yuyaita cushcashnami, cashna nishpa rimarca: “Ñuca taitaca, llashaj yuguta apachinshnami llaquichirca. Ashtahuangarin ñucaca chai yugutaca, ashtahuanmi llashayachisha. Ñuca taitaca, azialcunahuan astishpami llaquichirca. Ñucacarin, alacrangunahuanmi llaquichisha” nircami.

15Jatun mandajca, Israelcuna mañashcataca na uyanayachircachu. Silo shuti pueblopi causajuj Ahías runahuan, Nabat runapaj churi Jeroboam runaman villashca pactachunmi, Mandaj Diosllata chashna rurarca.

16Tucui Israelcunaca, paicuna mañashcata jatun mandaj na uyanayachijpimi, cashna ninajurca: “Davidmandaca, ¿imatallapash japinachu canchi? Isaí runapaj churimandaca, imatallapash na japinachu canchi. ¡Israelcuna, ñucanchi carpacunaman tigrashunchilla! ¡David, cunanga cambaj huasi ucupuracunatalla ricungui!” ninajurcami.

Shina nishpami Israelcunaca, paicunapaj carpacunaman rinajurca.

17Ashtahuangarin Roboam runaca, Judá ayllupi tiyaj pueblocunapi causanajuj Israelcunatallami mandajurca.

18Jatun mandaj Roboam runaca, ninandapacha llaquichishpa imatapash rurachij Adoram shuti runatami, Israelcunapajman cacharca. Ashtahuangarin paitaca, tucuilla Israelcunami rumicunahuan huañuchirca. Chaimandami jatun mandaj Roboam runaca, shuj carretapi tiyarishpa, Jerusalenman pacajushpa rirca.

19Chashnami Israelcunaca, Davidpaj huasi ucupuramandaca shicanyarishpa, cunan punllacaman chashna causanajun.

20Chai jipami, Jeroboam runa Egiptomanda tigramushcata yachashpa, paicuna tandanajushcaman Israelcunaca cayachun cacharca. Chaipimi, tucui Israelcunata jatun mandaj cachun churanajurca. Israel ayllupuramandaca, Davidpaj miraicuna mandajujtaca, shujllapash na catircachu. Judá ayllu runacunallami catinajurca.

21Salomonbaj churi Roboam runa Jerusalenman shamushpaca, Israelcunahuan macanajushpa pai mandajuj llactaman tigrachimungapami, Juda ayllumandapash, Benjamín ayllumandapash, macanajunata yachaj, 180.000 runacunata tandachirca.

22Ashtahuangarin Mandaj Diosca, Paipajta ruraj Semaías shuti runamanmi, cashna nirca:

23“Salomonbaj churi, Judá llactata jatun mandaj Roboam runatapash, Judapaj, Benjaminbaj tucui ayllucunatapash, tucui gentecunatapash cashna nigri:

24Mandaj Diosca, cashnami nin: ‘Cangunapaj huauqui Israelcunahuanga, na macanajungapa rinachu canguichi. Cangunapaj huasicunaman tucuilla tigraichilla. Caitaca, ñucallatami chashna rurajuni’ ninmi nigri” nircami.

Paicunaca, Mandaj Taita Dios mandashcata cazushpami tigranajurca.

Jeroboam runa, juchata rurashcamanda

25Chai jipami, Jeroboam runaca, Efraín shuti urcucunapi tiyaj Siquem shuti pueblota cutin alichishpa, chaipi causajurca. Chaimanda llujshishpaca, Penuel shuti pueblotapashmi cutin alichirca.

26Chai jipami Jeroboam runaca, paipaj shungupica cashna yajurca: “Cunanga, ñuca mandajuj cai llactaca, cutinmi Davidpaj huasi ucupurapajmanllata tigranga.

27Cai Israelcunaca, Mandaj Diospaj huasipimi, animalcunata Diosman cushpa huañuchingapa Jerusalenman vichai rinajunga. Chashna rurashpaca, Judá llactata jatun mandaj Roboam runata catishpami, ñucataca huañuchihuan” yajurcami.

28Chashna yarijushcata shujcunaman villajpi yuyaita cujpimi, jatun mandaj Jeroboam runaca, curita rurashca ishcai shicucunata rurashpa, Israelcunataca cashna nijurca: “Cangunaca, ashtacacunami Jerusalenman vichai rinajunguichi. Ricuichi, cangunapaj dioscunaca caipimi. Paicunami cangunataca, Egipto llactamanda llujchimurca” nijurcami.

29Chai shicucunataca, shujtaca, Bet-el pueblopi, caishujtaca Dan pueblopimi churarca.

30Chaicunata mañashpami Israelcunaca, juchata rurarca. Paicunaca ninanda alicachingapami, caishuj shicupaj ñaupajman, Dan shuti pueblocaman rinajurca.

31Shinallata Jeroboam runaca, chai dioscunapaj huasicunata lomacunapi rurashpami, na Leví runapaj miraipura cajpipash, yangalla gentecunamanda sacerdotecunata agllashpa churarca.

32Chai huatapaj pusaj quilla chunga picha punllapimi Jeroboam runaca, Judá llactapi jatun cushijui punllata rurashpa callarichirca. Shinallata shuj altar jahuapimi, animalta cushpa huañuchirca. Paica, chashnami Bet-el pueblopica, pai rurachishca shicucunaman animalcunata cushpa huañuchirca. Shinallata, rurashcalla dioscunata mañangapa, Bet-el pueblo lomacunapi pai rurashca huasicunapipashmi sacerdotecunata churarca.

33Jeroboam runaca, Bet-el pueblopi pai rurashca altar jahuapimi, animalta cushpa huañuchirca. Paica, pusaj quilla chunga picha punllapimi, chashna rurajurca. Chai quillapimi paipaj shungupi yarishpalla, Israelcunaman jatun cushijui punllata rurashpa callarichirca. Shinallata inciensota cushnichingapami, altarman vichai rirca.