1Ashtahuangarin cunanbi, ninan llaquipi causajcunaca, na chashnallata causangachu. Pundacunaca, Zabulonbaj, Neftalipaj llactacunapica, llaquicunami tiyarca. Shina cajpipash, na Israelcuna causanajuj Galilea llactapi, mama cucha manñapi, Jordán yacu chimbamanga, ninanda cushijuna punllacunami chayamunga.
2Yana tutapi purijcunaca, punchapamba jatun michatami ricunajurca.
Huañui japinalla llaquipi causajcunataca,
punchapamba michagumi punchayachijurca.
3Diosllatami, paicunataca, ashtacata mirachishpa, jatun cushijuitapash cararcangui.
Paicunaca, granocunata tandachishpa cushijujshna,
macanajuipi quichushcacunata chaupirishpa cushijujshnami,
cambaj ñaupajpica ninanda cushijunajunga.
4Canmi, paicunata yugushcashna llaquipi causanajushcamandaca cacharichircangui.
Shinallata, paicunapaj rigrapi apanajun caspitapash,
paicunata llaquichijuj runacunapaj vara caspitapashmi faquircangui.
Madián llactata tucuchijui punllapishnami tucuchircangui.
5Jatun macanajuipi macanajujcuna chaquipi churajushcacunapash,
yahuarpi javirishca tucui churajunacunapash, jupatashnami rupachinga.
6Ñucanchipaca, shuj jari huahuagumi huacharimushca,
churigutami ñucanchiman caramushca.
Mandanataca, Paipaj maquipimi churashca.
Paipaj shutica, cashnami canga:
“Manllarishpa alicachina,
ali Yuyaita Cuj, tucui ushaita charij Taita Dios,
causaita causajujlla Taita, ali causanata caraj Mandaj shutimi” canga.
7Paica, David mandashpa tiyajushcapimi tiyaringa.
Paica tucuicunata mandajujpimi, ali causanapash na tucuringa.
Paitaca, callarimandapacha pipash na cuyuchingachu.
Paica, tucuipi alita ricushpami, tucuicunapaj ali cachun,
causaita causaicaman mandajunga.
Tucuita Mandaj Diosca, ninanda juyashpami chaitaca pactachinga.
Mandaj Diosta, Israelcuna fiñachishcamanda8Jatun Diosca, Jacobpaj miraicunata llaquichinatami villachun cachamurca.
Chai llaquicunami Israelcunapajman chayamushca.
9Chai llaquitaca, tucui gentecunapash,
Samaria llactapi causanajuj Efrainbaj miraicunapashmi ricunajunga.
Paicunaca, shinlli shunguta charishpami, jariyashpa cashna ninajun:
10“Ladrillohuan shayachishcata urmachijpipash,
rumicunahuanmi cutin shayachishun.
Sacha higo caspicunahuan shayachishcata urmachijpipash,
cedro caspicunahuanmi huasichishun” ninajunmi.
11Mandaj Diosca, Rezinmanda gentecunatami,
Israelcunata llaquichinajuchun pushamunga.
12Indi llujshimujmandaca, Siria llacta gentecunata,
indi huashajunmandaca, filisteocunatami pushamunga.
Paicunami Israelcunataca, micushpa langajshna tucuchinajunga.
Chashna llaquichishpapash, Dios fiñarishcataca na yalichishpami, ashtahuan llaquichishpa catinga.
13Shina llaquichijpipash, Israelcunaca, na Diospajman tigrarircachu.
Tucuita Mandaj Diostaca, napacha mascanajurcachu.
14Chaimandami Mandaj Diosca, Israelcunataca, umandi, chupandi fitinshna,
shuj yurapaj sapindi, malquita fitinshna, shuj punllapilla anchuchinga.
15Umaca, alicachi tucushca mandaj rucucunami.
Chupaca, llulla profetacunami.
16Cai gentecunata mandajcunaca, umachijcunami.
Chai llactapi causajcunaca, pandarishpami chinganajun.
17Shina cajpimi Taita Diosca, chairalla viñajcunatapash, taita mama illajcunatapash,
sapalla mamacunatapash fiñarishpa llaquichinga.
Paicunaca, llullacuna, na ali gentecuna, na ali shimita rimajcuna cashcamandami chashna llaquichinga.
Chashna llaquichishpapash, Dios fiñarishcataca na yalichishpami, ashtahuan llaquichishpa catinga.
18Paicuna jatun na alita rurashcacunaca, nina rupashpa na ali jihuacunata,
casha yuracunata rupachijshnami tucuchinga.
Jatun sacha chaupipi nina rupajpi, cushni vichai rijshnami apai tucunajunga.
19Tucuita Mandaj Dios ninanda fiñarijpimi, cai pachaca yana tutashna tucurca.
Cai gentecunaca, rupachina jupashnami tucunga.
Paicunapurapash, pipash na llaquiringachu.
20Tucuicunami, ali maquihuan shuhuashpa micushpapash, yarjaillata saquiringa.
Shinallata, lluqui maquihuan micushpapash, yarjaillatami saquiringa.
Yarjaimandami, paipurallata micuringa.
21Manasespaj miraicunaca, Efraín miraicunatami micunga.
Ishcandi ayllupaj miraicunami, Judapaj miraicunata micugringa.
Chashna llaquichishpapash, Dios fiñarishcataca na yalichishpami, ashtahuan llaquichishpa catinga.
Who We AreWhat We EelieveWhat We Do
2025 by iamachristian.org,Inc All rights reserved.
