1Mandaj Dioslla,
jatun mandajca Cambaj ushaihuanmi cushijun.
Can quishpichijpimi, ¡ninanda cushijun!
2Paipaj shungu munashcatapash curcanguimi.
Pai mañashcatapash, tucuitami pactachircangui. Selah
3Paimanmi, tucuita carashpa bendiciashcangui.
Umapipash, ashtahuan ali curihuan rurashca coronatami churachircangui.
4Causaita mañajpipash, cararcanguillami.
Tauca huatacunata causachunmi cararcangui.
5Ninanda alicachi tucushca cachunmi quishpichishcangui.
Can bendiciajpimi ashtahuan jatunyashpa catirca.
6Paitaca, tucui causaipajmi bendiciarcangui.
Canmi, paihuan pacta cajpimi ninanda cushijushpa causajurca.
7Shinamandami Jatun mandajca, Mandaj Diosta yariashpa causajun.
Jahua pachapi causajuj Dios juyajujtaca, pipash na anchuchingachu.
8Cambaj maquihuanmi, canda fiñajcunataca llaquichingui.
Cambaj maquihuanmi, canda na cazuj runacunataca llaquichingui.
9Can fiñarishpaca, horno rupajuj ucumanmi shitangui.
Mandaj Dios fiñarishpaca, ñutushpami tucuchinga.
Ninahuanmi tucuchinga.
10Paicunapaj huahuacunatapash, cai pachamandaca anchuchinguimi.
Paicunapaj miraicunatapash, cai pachapi ama ashtahuan causachunmi anchuchingui.
11Paicunaca, Canda fiñashpa llaquichingapami munanajurca.
Canda llaquichingapa na alita yarinajushpapash, na pactachircachu.
12Ashtahuangarin Canmi, paicunataca calpachingui.
Paicunataca, Cambaj arcohuanmi flechacunata shitangui.
13Mandaj Dioslla,
Cambaj ninan ushaihuan charishcata ricuchipailla.
Ninan ushaita charijpimi, candashpa jatunyachijuni.
Who We AreWhat We EelieveWhat We Do
2025 by iamachristian.org,Inc All rights reserved.
