1Mandaj Diostami alicachina canguichi.
Ñucanchi Taita Diosman salmocunata candanaca, alipachami.
Paita alicachinaca, alipacha juyaillagumari.
2Mandaj Diosmi, Jerusalendaca cutin shayachirca.
Israel llactamanda, llujchi tucushcacunatapash tigrachimungami.
3Llaquipi causajcunataca, Paimi cushichijun.
Chugrishcacunatapash, Paimi alichijun.
4Paica, luzerocuna mashna tiyajtapash, yupashcallami charijun.
Tucui chaicunataca shutipimi cayajun.
5Ñucanchi Jatun Diosca jatumbacha, ninan ushaita charij Diosmi.
Paica, causaita causaicamanmi tucuita yachan.
6Mandaj Diosca, ali shunguhuan causajcunatami jatumbi churan.
Paita na manllajcunataca, ninanda pingaichishpami llaquichijun.
7Mandaj Diostaca, candashpami alicachina canguichi.
Ñucanchi Taita Diostaca, arpata taquishpami alicachina canguichi.
8Paimi, jahua pachataca fuyuhuan quilpajun.
Paillatami, alpamambash tamiachimujun.
Paimi, urcucunapi jihuacunataca viñachijun.
9Paimi, sacha animalcuna micushpa causachumbash caran.
Cuervocunapaj huahuacuna caparinajujpipash, Paimi caramujun.
10Paica, ninanda calpajuj caballohuambash, na cushijunchu.
Ninan shinlli runacunahuambash, na cushijunchu.
11Mandaj Diosca, Paita manllajcunahuanmi cushijun.
Dios llaquijpi causaj gentecunahuanmi, Paica cushijun.
12Jerusalén pueblolla,
Mandaj Diostami alicachina cangui.
Sion pueblolla,
cambaj Taita Diostami alicachina cangui.
13Paimi, pungucunapi jarcanacunatapash ashtahuan shinllita churarca.
Paimi, pueblo ucupi causajcunataca bendiciarca.
14Paimi, cambaj llactapica ali causaita caran.
Micuchumbash ashtahuan ali trigotami, na munangacaman caranga.
15Paimi, mandashca shimicunataca, cai pachaman cachamun.
Pai mandashca shimicunaca, ñapashmi pactajun.
16Paimi rasutapash, milmatashna urmachijun.
Cazatapash, uchufatashnami talimujun.
17Paimi, rundutapash tamiachimujun.
Chai chiripica, ¿pita puri ushangayari?
18Pai rimajpica, chai razucunaca yacuyangallami.
Pai huairata cachamujpimi, yacuyashpa ri callaringa.
19Jacobpaj miraicunamanmi, paipaj shimicunataca villarca.
pactachinajuchun mandashca shimicunatami, Israelcunamanga curca.
20Maijan llactacunamambash, chashnataca na rurarcachu.
Pai yachachishcacunataca, ashtahuanga pipash napacha yacharcachu.
Aleluya.
Who We AreWhat We EelieveWhat We Do
2025 by iamachristian.org,Inc All rights reserved.
