ROMANOS 14 - Quichua Imbabura 2016

Nara shinlli crijcunatapash chasquinami canguichi

1Nara shinlli crijcunatapash, chasquinami cangui. Caita, chaita nishpaca ama pandachinguichu.

2Huaquingunaca: “Tucuita micunallami” yanmi. Ashtahuangarin, nara shinlli crijcunaca: “Granocunatallami micuna” yanmi.

3Tucui imatapash micuj runaca, na micuj runataca na yangapi churashpa rimanachu. Shinallata, yuyutalla micuj runapash, imata cashpapash micujlla runataca na rimanachu. Taita Diosca, tucuicunatami chasquijun.

4¿Shujpaj gañanda na alicachishpa rimangapaca, canga pita canguiyari? Paita mandajmi, alita rurashcatapash, na alita rurashcatapash ricunga. Shinallatami, Apunchi Jesús shinllichishpa pushangapa ushaita charin.

5Huaquingunaca, shuj punllatalla alicachishpami, caishuj punllataca na alicachinajun. Shujcunaca, tucuilla punllacunatallatami alicachinajun. Tucuicunallata imashna crishpapash, chashnatalla yarichun ninimi.

6Maijan punllata alicachishpapash Apunchi Jesusta alicachingapami chashna ruran. Shinallata, chai punllata na alicachishpapash, Apunchi Jesustami na alicachinajun. Imata micushpapash, “Taita Diosta pashi” nishpaca, Apunchi Jesusta alicachingapami micun. Shinallata, tucuita na micushpapash, Apunchi Jesusta alicachingapallatami, Taita Diostaca pashi nijun.

7Maijambash, causashpapash, huañushpapash, na ñucanchipajllata chashna canchichu.

8Causashpapash, Apunchi Jesuspajmi causanchi. Huañushpapash, Apunchi Jesuspajmi huañushunchi. Shinamandami, causashpapash, huañushpapash, Apunchi Jesuspaj canchi.

9Shinamandami, Cristoca huañushpa, causarishpa, cutin causajun. Huañushcacunatapash, causajcunatapash mandangapami, Paica cutin causarirca.

10Shina cashpaca, ¿imashpata cambaj huauquitaca na alicachishpa ricujungui? Shinallata cambash, ¿imamandata cambaj huauquitaca, yangapi churajungui? Tucuicunami Cristopaj ñaupajpi tucui imata rurashcata ricuchigrina canchi.

11Dios quilcachishca shimipica cashnami nijun:

“Jatun Dios Ñucami cashna nini:

‘Ñucaca causajunipachami.

Tucuicunami, Ñuca ñaupajpi cungurinajunga.

Tucuicunami Ñucataca,

Taita Dios cajta villanajunga’ ninmi” nijunmi.

12Shinamandami, imata rurashcatapash tucuicunallata Taita Diosman ricuchigrinapacha canchi.

13Shina cashpaca, na ashtahuan caishujmanda chaishujmanda juchachirinachu canchi. Cambaj huauquitaca na pandachinachu canguichi.

14Apunchi Jesusta crij cashpami, imatapash na mapa cajta yachani. Ashtahuangarin: “Caica mapami” yajujpica, paipajca mapami canga.

15Imatapash micushcamandalla cambaj huauquita llaquichijushpaca, ñana juyaita charishcatami ricuchijungui. Micunamandalla cambaj huauquita chingachishpaca, paimandapash quishpichingapa Cristo huañushcatami yangapi churangui.

16Canguna alita ruranajushcatara, na alicachi tucunguichiman.

17Taita Dios mandajuj llactaca, na micunamandalla, ufianamandalla canllu. Ashtahuangarin, Jucha illaj Diospaj Espíritu yarichijpi causanaca, alitalla rurashpa, shungupi llaqui illaj, ninanda cushijushpa causanami.

18Cristoman rurashpa causajushpaca, Taita Diostapash cushichishpami causajun. Runacunapash alicachijpimi causajun.

19Shinamandami cunanga, shungupi cushijushpa, caishuj chaishuj shinlli tucushpa catina canchi.

20Taita Dios alita rurajujtara, micunamandalla tucuchinguiman. Ima micunapash napacha mapachu. Ashtahuangarin, micunamandalla, shujcunata urmachinaca napacha alichu.

21Cambaj huauquita pandachishpa ama urmachingapaca, aichata na micunapash, vinota na ufianapash alipachami.

22¿Canga crijpachachu cangui? Crishpaca, Taita Diospaj ñaupajpimi alipi ricuringui. Imata rurajushpapash, cambaj yuyaipi ali cajpica ninandami cushijungui.

23Ashtahuangarin, “na ali cangachu” yashpa micushpaca, llaquichi tucungapachami. Na crishpa chashna rurashcamandami llaquichi tucunga. Na crishpa rurajushcacunaca, juchapachami.