1Huañuchishpa llaquichij pueblolla,
¡aij canga imachari tucungui!
Canga, llullashpa, macashpa, shuhuashpa tucuita llaquichishpami causarcangui.
2Azialhuan astinajujpash, carretacuna culunlla calpanajunmi uyaringa.
Caballocuna ninanda calpanajunpash, carretacuna fahuanajujpashmi uyaringa.
3Caballopi tiyarishca, alipacha macanajuj runacunapash,
punchapamba espadahuan, punchapamba huañuchina jirrucunahuanmi ricuringa.
Ashtaca ashtaca gentecunata huañuchijpimi, yupaitapash na ushanalla canga.
Chai huañushcacunapimi, nitijanajunga.
4Culquimanda huainayaj huarmishna, juyailla ricurishpami na alita rurashpa causarcangui.
Alipacha yachaj canatapash yachachijmi carcangui.
Yachaj cangapapash ali cashpami, tucui gentecunata huainayachishpa, umachij carcangui.
5Chaimandami, Tucuita Mandaj Diosca, cashna nin:
“Candaca ninandami llaquichigrini.
Can na ali cashcatami shuj llactapi causajcunapash, pingaipaj ricunga.
Shuj llactata jatun mandajcunami, can pingaipaj cajtaca, na alicachishpa ricunga.
6Cambaj na ali rurashcacunatami canmanllata tigrachisha.
Mapata tandachishpa saquishcatashnami, tucuicuna asishpa ricuchun saquisha.
7Can na ali cajta ricujcunami, tucuicuna anchurishpa cashna ninajunga:
‘Nínive puebloca, llaquinayaitami tucurishca.
¿Pita paitaca llaquinga?
¿Pita paitaca cushichinga?’ ninajungami.
8¿Canga, Nilo shuti jatun yacupi tiyajuj, Tebas shuti pueblotapash yalichu cangui?
Chai puebloca, jatun yacucunapaj chaupipimi tiyajun.
Chai pueblotaca, jatun yacucunami muyundita jatun pircashna jarcashca tiyajun.
9Etiopía llacta, Egipto llacta, ninanda yanapajpimi, pipash na mishai ushajpi causarca.
Fut shuti, Libia shuti llactacunapi causajcunapash, paitami yanapaj carca.
10Shina cashpapash, prezu apai tucurcami.
Paipaj huahuacunatapash, ñan tigranacunapimi, japishpa huañuchinajurca.
Jaricunataca, pipaj urmajta rurashpami apanajurca.
Mandajcunataca cadenahuan huatashpami, prezu aparca.
11Ninive pueblo, cambash machashcashna saquirishpami vichai tucungui.
Canda fiñajcuna shamujpica, pacajunata mascashpami ringui.
12Cambaj shinlli torrecunaca, llullu higo junda yurashnami canga.
Yurata cuyuchijpica, tucuicuna micuchun, higo fucushca urmajujshnami canga.
13Cambaj macanajuj runacunaca, huarmicunashnami manllanajunga.
Pueblo pungucunapash, macanajuj runacuna, huañuchingapa yaicumuchunmi paicunallata pascaringa.
Pungu jarcanacunatapash, ninami tucuchinga.
14Llaquichijui punllapi, yacuta ufiangapaca pundatami alichina cangui.
Torrecunatapash, muyundi pircacunatapash, ali shayajuchun rurangapami yana alpata sarushpa turuta rurana cangui.
Chaita cusangapami hornotapash alichina cangui.
15Candaca ninahuanmi rupachinga.
Candaca espadahuanmi huañuchinga.
Pulgón jurucuna, jihuata micujshnami tucuchinga.
Canga, langostón jurucunashna mirajpipash tucuillami tucuchi tucungui.
16Cambaj llactapi randishpa jatushpa purijcunaca, jahua pacha luzerocunatashnami mirachircangui.
Chashna cajpipash, paicunaca langosta jurucunashnami, micushca jipaca calpanga.
17Cambaj mandajcunaca, langosta jurucunashnami canga.
Cambaj ninanda alicachi tucushca runacunaca, langostacuna fuyupi shamujshna chayamushpami,
chiri punllapica pirca jahuapi tiyanajunga.
Indi shamujpica rinllami.
Shina rijpica paicuna maipi cashcataca, pipash na yachangachu.
18Asiria llactata jatun mandajlla, canda michijcunaca huañurcami.
Cambaj ali macanajuj runacunapash ñana rijcharingapami samanajun.
Cambaj llactapi causajcunaca, urcucunamanmi caita chaita rinajurca.
Paicunata tandachigapaca, pipash na tiyanllu.
19Cambaj tullu faquirishcata alichina jambica, na tiyanllu.
Cambaj chugricunataca, pipash na jambinallachu.
Canga, tucuicunatami llaquichishpa causarcangui.
Chaimandami can llaquichi tucushcata yachashpaca, ninanda maquita huactarinajunga” ninmi.
Who We AreWhat We EelieveWhat We Do
2025 by iamachristian.org,Inc All rights reserved.
