1Sion pueblota juyaimandami, na upalla saquirisha.
Jerusalenda juyaimandaca, na samashpami catisha.
Dios alitalla rurashpa pactachingacamanmi chashna catijusha.
Pai quishpichina punlla chayamungacamanmi, chashna catijusha.
2Chaita pactachijpimi, gentecunaca, alitalla ruraj cajtaca yachanga.
Shinallata, jatun mandajcunapashmi, chaitaca yachaj chayanga.
Chaimandami candaca, Mandaj Diosllata shuj mushuj shutita churanga.
3Mandaj Diospaj maquipica, punchapamba coronashnami cangui.
Cambaj Taita Diospaj maquipica, jatun mandajpaj umapi churana diademashnami cangui.
4Candaca, cutinga na: “Jichushca pueblomi” ningachu.
Cambaj llactatapash cutinga na: “Llaqui apashca llactami” ningachu.
Ashtahuangarin canda: “Ñuca munashca huarmi” nishpami rigsinga.
Cambaj llactapash: “Ñucahuan cazarashca huarmimi” ni tucungami.
Mandaj Diospaj juyaica canhuanmi canga.
Chaimandami cambaj llactaca, Dioshuan cazarashcashna canga.
5Chairalla viñajun cuitsahuan, shuj huambra cazaranshnami Israel gentecunaca, Dioshuan causanga.
Shuj cusa paipaj huarmihuan juyarishpa causajshnami, cambaj Taita Diospash candaca juyanga.
6Jerusalén pueblolla, cambaj muyundi pirca jahuacunapica, chapashpa ricujcunatami churarcani.
Paicunaca, tutapash, punllapash, napacha upalla cangachu.
Mandaj Diosta yariashpa causajcunaca, napacha samanachu canguichi.
7Jerusalenda cutin alichingacamanmi, pipash napacha samana canguichi.
Cai pachapi causajcuna, Jerusalenda alicachingacamanmi chashna na samana canguichi.
8Mandaj Diosca, Paipaj ninan ushaihuanmi, cashna nishpa juramenturca:
“Cangunata fiñajcunamanga, napacha cambaj trigotaca carashachu.
Canda na rijsijcunamanga, can rurashca vinotapash, napacha carashachu.
9Ashtahuangarin, cangunallata fucushcata tandachishpa micushpami, Mandaj Dios Ñucataca alicachinguichi.
Shinallata, uvata tandachijcunami, ñucapajlla huasi patiocunapi vinota ufianajunga” ninmi.
10Pueblo pungucunataca, yalimuichilla.
Ñuca agllashcacuna yaicuchun, ñanda fichaichilla.
Ñanmanda rumicunatapash anchuchinami canguichi.
Tucui gentecuna ricuchunmi, banderata churana canguichi.
11Mandaj Diosca cai pachapi causajcunatami, cashna nirca:
“Sion urcupi causajcunataca, cashna nichi:
‘Ricuichi, cangunata Quishpichingapaca ñami shamujun.
Paica, caranacunata apashpami shamujun.
Paica tucui imata ruranatapash, pactachingapami shamujun’ nichiyari” nircami.
12Paicunataca: “Mandaj Dios quishpichishca, jucha illaj gentecunami” ninajungami.
Jerusalendapash: “Dios juyashpa, na jichushca Pueblomi” ninajungami.
Who We AreWhat We EelieveWhat We Do
2025 by iamachristian.org,Inc All rights reserved.
