1Mandaj Diosca, Paihuan tuparina Jatun carpamanda Moisesta cayashpami cashna nijurca:
2“Israelcunaman cashna nishpa villangui: ‘Maijambash cangunapuramanda, Mandaj Diosman ofrendata apamushpaca, huagrata, na cashpaca llamatami apamuna canguichi.
3Diosman cushpa tucuillata rupachina cangunapaj jari huagrata cushpaca, ima huaglipash illajta ofrendatami apamuna canguichi. Chaitaca, tucui munaihuan apamushpami, Dioshuan tuparina jatun carpa pungupi, Mandaj Diospaj ñaupajpi cuna canguichi.
4Shinallata, tucuillata rupachina chai animalpaj umapi maquita churashpami, Diosman cuna canguichi. Shina rurajpimi juchata anchuchingapa Diosca chasquinga.
5Chai jipami chai shicutaca, Mandaj Diospaj ñaupajpi cungata cuchushpa huañuchinga. Yahuartaca, Aaronbaj churi sacerdotecunami, Dioshuan tuparina Jatun carpaman yaicunapi tiyaj altar muyundipi, Diosman cushpa tsirapachinajunga.
6Tucuillata rupachina shicuta lluchushpami, aichataca asha asha cuchushpa chaupinga.
7Sacerdote Aaronbaj churicunaca, altarpi ninata japichishpami, chai ninapica yamdata aliguta churanajunga.
8Chai jipami, Aaronbaj churi sacerdotecunaca, fitishca aichacunatapash, umatapash, chunlluli viratapash, altarpi nina rupajuj yamda jahuapi aliguta churanajunga.
9Chunllulicunata, changa aichacunataca yacuhuanmi maillanga. Chaitaca sacerdotemi, Diosman cushpa altarpi tucuillata rupachinga. Shina rupachijpimi, Mandaj Diospaj ñaupajpica mishquilla ashnajun ofrenda canga.
10Diosman cushpa tucuillata rupachina animalta cushpaca, llamacunamanda cashpa, chivocunamanda cashpapash, ima huaglipash illaj jari animaltami ofrendata cunga.
11Chai animaltaca, altarmanda janajmanmi, Mandaj Diospaj ñaupajpi cungata cuchushpa huañuchinga. Chai animalcunapaj yahuartaca, Aaronbaj churi sacerdotecunami, altar muyundipi tsirapachinajunga.
12Chai animaltaca, asha asha fitishpami, umandi, chunlluli viracunandi chaupishpa churanga. Chaitaca, sacerdotellatami altarpi nina rupajuj yamda jahuapi aliguta churanga.
13Ucu chunllulicunata, chaquicunataca, yacuhuanmi maillanga. Chaicunataca, sacerdotemi altar jahuapi churashpa rupachijunga. Shina tucuillata rupachishcami, Mandaj Diospaj ñaupajpica, mishquilla ashnajun ofrenda canga.
14Mandaj Diosman cushpa tucuillata rupachina alasyu animalcunata apamushpaca, urpicunata, na cashpaca palomacunatami apamunga.
15Chaitaca sacerdote apashpami, umata anchuchishpa, Diosman cushpa altarpi rupachinga. Yahuartaca, altar patapimi capinga.
16Buchetapash, plumacunatapash anchuchishpami, chaitaca altarman chayanapi, uchufata shitana pushtupi, indi llujshimujman shitanga.
17Chai animalcunata chaupishpapash, alascunataca na anchuchingachu. Chaitaca sacerdotemi, altarpi yamda rupajuj jahuapi churashpa rupachinga. Shina cushpa tucuillata rupachijpimi, Mandaj Diospaj ñaupajpica, mishquilla ashnajun ofrenda canga.
Who We AreWhat We EelieveWhat We Do
2025 by iamachristian.org,Inc All rights reserved.
