Psalms 25 - Quichua Imbabura 2016

Quishpichishpa, ali ñanda pushachun David mañashcamandaDavid rurashca Salmomi.

1Mandaj Dioslla,

Candami tucui ñuca causaipi mañasha.

2Ñuca Dioslla,

Candami yariashpa causani.

Ñuca pingai tucuchunga, ama saquihuaichu.

Ñucata fiñajcuna cushijuchunga, ama saquihuaichu.

3Canda shuyajcunaca, napacha umachi tucungachu.

Canda na cazujcunaca, pingaichi tucungami.

4Mandaj Dioslla,

maijan ñanda catinata ricuchihuailla.

Maita purina cajpipash, yachachihuailla.

5Can yachachishpa, ali ñanda pushahuailla.

Canmi, ñucata quishpichij Taita Dios cangui.

Candami, tucui punllacunapi shuyajuni.

6Mandaj Dioslla,

causaita causaicaman, Can ninanda juyaj cashcatapash,

llaquij cashcatapash ama cungahuaichu.

7Chairalla viñai cashpa, juchata rurashcatapash, na cazushcatapash ama yaripaichu.

Mandaj Dioslla,

Can ninan juyaj cashcamanda, ñucataca ama cungahuanguichu.

8Paica, alitalla ruraj Mandaj Diosmi.

Shinamandami, juchata rurajcunataca, ali ñanda catichun yachachinga.

9Na jariyajcunataca, Paipaj ali ñandami pushanga.

Paicunataca, ali catichunmi yachachinga.

10Mandaj Dioshuan causanaca, juyashpa, na llullashpa causanami.

Paihuan ari ninajushcata pactachijcunami chashna causanga.

11Mandaj Dioslla,

Cambaj ninan juyaimanda, ñuca juchacunatapash cungapangui.

12Mandaj Diosta manllashpa causajca ¿pita canga?

Diosllatami, maijan ñanda catinatapash ricuchinga.

13Chai runaca, aliguta causashpami cushijunga.

Paipaj miraicunapashmi, chai llactata japinga.

14Mandaj Diosca, Paita manllajcunahuanmi alipacha cumba tucun.

Paicunamanmi, Paihuan ari ninajushcatapash pactachinga.

15Tucui causaipi Mandaj Diostallami, cazushpa causajuni.

Linllipi japi tucunshna urmanamandaca, Paimi jarcahuanga.

16Ñucataca ricuhuayari, llaquihuayari.

Ninan llaquihuanmi, ñucalla causajuni.

17Ñuca shungupi llaquicunaca, ashtahuanmi mirashca.

Cai ninan llaquicunamandaca llujchihuayari.

18Llaquita ñuca apashpa causajujtaca ricuhuayari.

Tucui ñuca juchacunatapash cungapayari.

19Ñucata fiñajcuna, imashna mirashcatapash ricupayari.

Paicunaca, manllanayaita fiñashpami, na ricunayachihuan.

20Ñuca causaita ricushpa, llaquimanda cacharichihuayari.

Ñuca pingai tucuchunga ama saquihuaichu.

Candallami yariashpa causajupani.

21Alita rurashpa, tucuita pactachijuchun yanapahuailla.

Candallami yariashpa causajuni.

22Taita Dioslla,

Israelcunataca quishpichipayari.

Paicunapaj tucui llaquimanda llujchipayari.