JUECES 7 - Quichua Imbabura 2016

Madián llacta gentecunata, Gedeón mishashcamanda

1Jerobaal nishpa rijsishca Gedeón shuti runaca, tucui gentecunandi tutamandata jatarishpa rishpami, Harod shuti pugyuman chayanapi carpacunata shayachishpa tiyajurca. Madián llacta gentecunaca, More shuti urcuta yalishpa, janaj pugru pambapimi carpacunata shayachishpa tiyanajurca.

2Chaipimi Mandaj Diosca, Gedeondaca cashna nirca: “Canhuan tandanajushca gentecunaca ashtacapachami. Madián llacta gentecunata paicunapaj maquipi Ñuca churajpi mishashpaca: ‘Ñucanchi ushaihuanmi misharcanchi’ nishpami, Israelcunaca, paicunallata alicachirinajunga.

3Shina cashcamanda, tucui gentecuna uyajta cashna nishpa villachun mandangui: ‘Maijambash manllashpa chujchunajushpaca, tutamandata jatarishpa, cai Galaad urcumandallata huasiman tigraichilla’ nishpa villachun mandangui” nircami.

Shina nijpimi, chai gentecunamandaca, ishcai chunga ishcai huaranga runacuna tigrarca. Chaipica, chunga huaranga runacunallami saquirirca.

4Mandaj Diosca, Gedeondaca cashnatapashmi nirca: “Gentecunaca taucacunarami. Cunanga, yacu rijun manñaman pushailla, chaipimi ali ricushpa. ‘Cai runami canhuan ringa’ nijpica, chai runaca canhuanmi ringa. Ashtahuangarin: ‘Cai runaca, na canhuan ringachu’ nijpica, chai runaca na ringachu” nircami.

5Shina nijpi gentecunata, yacu rijuj manñaman Gedeón pushajpimi, Mandaj Diosca cashna nirca: “Maijan cashpapash, alcushna jalluhuan lambishpa yacuta ufiajpica, paitami shicanyachina cangui. Shinallata, maijan cashpapash, cungurishpa yacuta ufiajtapashmi shicanyachina cangui” nirca.

6Yacuta maquihuan japishpa, lambishpa ufiajcunaca, quimsa patsaj runacunami carca. Tucui caishujcunaca cungurishpami yacuta ufianajurca.

7Chaimandami Mandaj Diosca, Gedeondaca cashna nirca: “Yacuta lambishpa ufiaj cai quimsa patsaj runacunahuanmi cangunataca quishpichisha. Shinallata, Madián llacta gentecunatapash cangunapaj maquipimi churasha. Caishuj runacunataca, paicunapaj huasiman tigrachun saquinguilla” nircami.

8Gedeón runaca, micunatapash, trompetacunatapash saquichishpami, chaishuj Israel runacunataca, paicunapaj carpacunaman cacharca. Chai quimsa patsaj runacunatallami shuyachirca. Madián llacta gentecunaca, ura pugru pambamanmi carpacunata shayachishpa tiyanajurca.

9Chai tutallatami Mandaj Diosca, Gedeondaca cashna nirca: “Jatarishpa, Madián llacta gentecuna tiyanajuj carpacunaman urai rilla. Paicunataca, cambaj maquipimi churarcani.

10Chaiman rinata manllashpaca, cambajta ruraj Fura shuti runata pushashpa urai rilla.

11Chaipica, paicuna imatalla parlanajujtami uyangui. Chaita uyashpaca, ashtahuan shinlli tucushpami, carpacunaman urai rina cangui” nircami.

Shina nijpimi Gedeonga, paipajta ruraj Fura shuti runata pushashpa rirca. Paicunaca macanajunacunahuan alichirishcalla tiyanajuj gentecunapaj carpa ñaupajmanmi urai rirca.

12Chai pambapica, Madián llacta gentecunapash, Amalec llacta gentecunapash, indi llujshimujman causanajuj gentecunapash, langosta jurucunashnami junda carca. Paicunapaj camellocunapash, mama cucha manñapi tiyaj t'iyu alpashnami carca.

13Chaiman Gedeón chayashpaca, shuj runa pai muscushcata, paipaj cumbaman villajujtami uyarca. Paica:

“Cashnatami muscushcani: Shuj cebada tanda urai calpamushpa, cai ñucanchi Madián llacta gentecunapaj carpacunaman chayamushpami, shuj carpapi huactarishpaca, tucuillata urmachinda muscushcani” nijurcami.

14Shina nijpimi caishuj runaca, cashna nirca:

“Caica, na yangallachu canga. Caica, Israelpura Joás shuti runapaj churi Gedeonbaj espadami canga. Taita Diosca, ñucanchi cai Madián llacta gentecunatami, carpacunapi tucui imalla tiyajcunandi, paipaj maquipi churashca” nircami.

15Muscushcatapash, chai muscui ima cajtapash parlanajujta uyashpami Gedeonga, Diosta ninanda alicachirca. Chai jipaca, Israelcuna tiyanajuj carpacunaman tigrashpami, cashna nirca:

“Jatarichi, Mandaj Diosmi carpacunapi tiyanajuj madián llacta gentecunataca, ñucanchi maquipi churashca” nircami.

16Shina nishpami, chai quimsa patsaj runacunataca, quimsapi shicanyachirca. Paicunamanmi, trompetacunatapash, chushaj funducunatapash, rupajuj michunda chai funducunapi churashpa tucuillaman curca.

17Chai jipaca, cashnami nirca:

“Ñucata ricushpa, ñuca imata rurajta catishpa ruranguichi. Ricuichi, carpacunata shayachishcata yalishpa, chimbaman chayajpica, ñuca imata rurashcatami catishpa rurana canguichi.

18Ñucapash, ñucahuan rinajuj runacunapash, trompetata huacachijpica, cangunapashmi tucui carpa muyundicunapi trompetata huacachina canguichi. Chai jipaca: ‘¡Mandaj Diosmandapash, Gedeonmandapashmi macanajugrinchi!’ nishpami caparina canguichi” nircami.

19Gedeón runaca, patsaj runacunandimi, carpacunata yalishpa chimbaman chayarca. Carpacunata ricungapa chaupi tuta, shuj ricujcuna callarinajujpimi, paicunaca trompetacunatapash huacachishpa, paicuna maquipi charinajushca funducunatapash faquinajurca.

20Quimsapi shicanyarishpa tandanajushca runacunaca, trompetata huacachishpami, funducunatapash faquinajurca. Shinallata, lluqui maquipica rupajuj michunda chaririyaj, ali maquipica huacachina trompetata chaririyajmi: “¡Mandaj Diospaj, Gedeonbaj espadamandami macanajugrinchi!” nishpa caparinajurca.

21Paicunaca, carpacunata shayachishca muyundipi, paicuna shuyanajushcapillatami tucuicuna shayanajurca. Shina cajpimi, Madián llacta runacunaca manllashpa, caparishpa tucuilla calpanajurca.

22Chai quimsa patsaj runacuna trompetata huacachijpica, Mandaj Diosllatami, carpacunapi runacunataca paicunapura espadahuan huañuchirina yuyaita curca. Shinamandami Madián llactamanda runacunaca, Zerera shuti puebloman rina ñanda rishpa, Bet-sita shuti pueblocaman calpanajurca. Chai puebloca, Tabat shuti pueblohuan, Abel-mehola shuti pueblohuan mujunbimi tiyajun.

23Israelcunaca, Neftalí, Aser, Manasés ayllucunahuan tandanajushpami, Madián llactamanda runacunataca catinajurca.

24Gedeonga, Efraín ayllupaj urcumambashmi, cashna villachun cacharca: “Cangunaca, Madián llactamanda runacunata tuparingapa urai richilla. Jordán yacuta chimbai ushanalla, Bet-bara shuti pushtucaman rishpa, paicuna nara chayajpillata chaipi shuyagrichilla” nichunmi cacharca. Shina nijpimi, Efraín ayllu runacunaca tucuicuna tandanajushpa, Jordán yacuta chimbai ushanalla, Bet-bara shuti pushtupi shuyanajurca.

25Chaipimi, Madián llactamanda, Oreb shuti, Zeeb shuti ishcai mandajcunata japirca. Oreb shuti runataca, Oreb shuti jaca rumipimi huañuchirca. Zeeb shuti runataca, uvata cutana Zeeb shuti ucupimi huañuchirca. Madián llacta runacunata huañuchingapa catishca jipaca, Oreb shuti, Zeeb shuti mandajcunapaj umacunata apashpami, Jordán yacu chimbaman, Gedeonbajman shamunajurca.