NÚMEROS 20 - Quichua Imbabura 2016

Jatun rumimanda yacuta llujchishcamanda

1Tandanajushca tucui Israelcunaca, huatapaj callari punda quillapimi, Zin shuti jichushca pambaman chayamushpa, Cades shuti pueblopi carpacunata shayachishpa causanajurca. Chaipimi María huañujpica, paitaca chaipillata pambarca.

2Chaipica, tandanajushca Israelcunapaj yacu illajpimi Moisestapash, Aarondapash fiñashpa rimangapa tandanajurca.

3Israelcunaca, Moisesta fiñashpami cashna ninajurca:

“Mandaj Diospaj ñaupajpi ñucanchi huauquicuna huañushca punllallata ñucanchipash huañushpachari, ali canchiman carca.

4Mandaj Diospajlla tandanajushca Israelcunapash, ñucanchi animalcunapash huañuchunga ¿imashpata cai jichushca pambamanga pushamurcangui?

5¿Imashpata ñucanchitaca, Egiptomanda cai pambaman vichai pushamurcangui? Caipica higocunata, uvacunata, granadacunata tarpungapapash na alichu. Ufiangapa yacullapash na tiyanllu” ninajurcami.

6Chashna rimajpimi Moisespash, Aaronbash chai tandanajushca Israelcunapaj ñaupajmanda anchurishpa, Dioshuan tuparina jatun carpa punguman rinajurca. Chaiman ña chayashpaca, cungurishpami, alpaman chayajta cumurinajurca. Chaipimi Mandaj Diosca, ninan ushaihuan punchapamba ricurirca.

7Mandaj Diosca, Moisestaca cashnami nirca:

8“Vara caspita japishpa, cambaj huauqui Aaronhuan ishcai tucushpa, tucuilla Israelcunata tandachimushpa, paicunapaj ñaupajpi chai jaca rumita rimangui. Shina rimajpimi chai rumimandaca, ashtaca yacu llujshinga. Chai jaca rumimanda yacuta llujchishpami, tandanajushca Israelcunamambash, paicunapaj animalcunamambash ufiachun carangui” nircami.

9Shina nijpimi Moisesca, Mandaj Diospaj ñaupajmanda vara caspitaca, Dios mandashcashna japirca.

10Chai jipami, tandanajushca Israelcunataca, Moisespash, Aaronbash, chai jaca rumi ñaupajman tandachishpa cashna ninajurca:

“¡Uyaichi na cazuj gentecuna! ¿Cai jaca rumimandachu, yacuta llujchina canchi?” ninajurcami.

11Shina nishpami Moisesca, chai jaca rumitaca, paipaj vara caspihuan ishcaicaman huajtarca. Shina huajtajpi, chai rumimanda yacu ashtaca llujshijpimi, tandanajushca Israelcunapash, paicunapaj animalcunapash ufianajurca.

12Chaipimi Mandaj Diosca, Moisestapash, Aarondapash cashna nirca:

“Canguna, Ñucata na crishpa, Ñuca jucha illaj cajtapash, Israelcunapaj ñaupajpi na ricuchishcamandami, tandanajushca Israelcunataca, Ñuca carashca llactamanga na chayachi ushanguichi” nircami.

13Caicunaca, fiñanajushca pushtumanda llujshijuj yacumi. Chai yacumandami Israelcunaca, Mandaj Dioshuan fiñanajurca. Diosca paicunapurapica, jucha illaj cajtami ricuchirca.

Edomita gentecuna, Israelcunata na yalichingapa munashcamanda

14Moisesca, paipaj randi rimajcunatami, Cades shuti pueblomandaca, Edom shuti llactata jatun mandajpajman cashna nichun cacharca: “Cambaj huauqui Israelcunaca, candaca cashnami ninajun: ‘Tucui llaquicunata ñucanchi charijtaca, canllata alimi yachangui.

15Ñucanchi taitacuna Egiptoman urai rishcamandami ñucanchica, Egiptopillata unai huatacunata causarcanchi. Chaipimi, Egiptopi causajcunaca, ñucanchi taitacunatapash, ñucanchitapash ninanda llaquichinajurca.

16Shinamandami ñucanchica, Mandaj Diosta caparishpa mañanajurcanchi. Ñucanchi mañanajujpi Mandaj Dios uyashpami, paipaj angelta cachamushpa, Egiptomanda llujchimurca. Cunanga, cambaj llacta mujun quimiriapi tiyaj Cades shuti pueblopimi canchi.

17Chaimandami, cambaj llactata yalingapa ñanda mañachihuai ninajupanchi. Tarpushca pambacunatapash, uva chagracunatapash na yalipashunllu. Canguna yacuta llujchingapa allashca utujumanda yacutapash na ufiapashunllu. Cambaj llactata yalingacamanga, alimambash, lluquimanbash na llujshishpami, jatun mandajpaj ñandalla yalipashun’ ninajunmi” nichunmi cacharca.

18Shina nijpimi Edom llactata jatun mandajca, cashna nirca: “Ñuca llactataca napacha yalinguichu. Na uyashpa yalingapa munajpica, canhuan macanajungapa alichirishpami llujshisha” nircami.

19Shina nijpimi Israelcunaca, cashna ninajurca: “Ñucanchica, jatun ñandallamari ripashun. Ñucanchipash, ñucanchi animalcunapash, cambaj yacuta ufiashpaca, mashna cajpipash cupashunllami. Chaquilla yalingapallami saquihuai nipanchi” ninajurcami.

20Ashtahuangarin jatun mandajca: “Caitaca napacha yalinguichu” nircami.

Shina nishpami Edom llactata jatun mandajca, Moisesta fiñashpa, ninan shinlli, ashtaca macanajuj runacunandi macanajungapa llujshirca.

21Edom llactata mandajca, Israelcuna, paipaj llactata yalinajuchunga napacha saquijpimi, Israelcunaca shuj ñanda rinajurca.

Aaronga, Hor shuti urcupimi huañushca

22Tandanajushca tucui Israelcuna, Cades shuti pueblomanda llujshishpaca, Hor shuti urcumanmi shamunajurca.

23Mandaj Diosca, Hor shuti urcupi, Edom shuti llacta mujunbimi, Moisestapash, Aarondapash cashna nirca:

24“Aarón huañushpaca, paipaj ayllucunahuanmi tandanajunga. Paica, Israelcunaman Ñuca carashca llactamanga na yaicungachu. Fiñanajushca pushtumanda llujshijuj yacu pushtupi, canguna, Ñuca mandashcata na cazushcamandami na yaicunga.

25Canga, Aarondapash, paipaj churi Eleazartapash pushashpami, Hor shuti urcuman vichai rina cangui.

26Chaipica, sacerdote Aarón churajushcata llujchishpami, chai churajunataca paipaj churi Eleazarman churachina cangui. Aaronga chaipi huañushpami, paipaj ayllucunahuan tandanajunga” nircami.

27Mandaj Dios mandashcashnami, Moisesca tucuita pactachijurca. Chaimandami, tandanajushca tucuilla Israelcunapaj ñaupajmanda, Hor shuti urcuman vichai rinajurca.

28Aaronga, chai urcupimi huañurca. Chaipimi Moisesca, Aarón churajushcacunata llujchishpa, Aaronbaj churi Eleazarman churachirca. Chai jipaca, Moiseshuan, Eleazarhuanga chai urcumanda urai shamurcallami.

29Aarón huañushcata tucuilla tandanajushca Israelcuna yachashpaca, tucuilla Israel ayllucunami quimsa chunga punllacunacaman, ninanda llaquirishpa huacanajurca.