1 SAMUEL 10 - Quichua Imbabura 2016

1Chai jipami Samuelca, pai charijushca botellamanda, Saulpaj umapi talishpa muchashpaca, cashna nirca: “Candaca, Mandaj Diosmi Pai agllashca Israelcunata mandachun, aceiteta talishpa javirca.

2Caimanda can rijpica, ishcaipura runacunami, Raquel huarmi huañujpi pambashca pushtupi tuparinga. Chaica, Benjamín llactapi tiyajuj Selsa shuti pueblopimi canga. Paicunami, cashna ninajunga: ‘Chingashca burrucunataca, ñami tarishca’. Cunanga, cambaj taitaca, chingashca burrucunamandaca na llaquillachu. Ashtahuangarin cangunamandami llaquirishpa: ‘Ñuca churica na shamunga, imatata rurana cani nijun’ ninajungami.

3Chaimanda ashtahuan ña rishpaca, Tabor shuti urcupi shayajuj, jatun quiru quimiriapimi, Bet-el shuti pueblopi, Taita Diosta mañangapa vichai rinajuj, quimsapura runacunahuan tuparingui. Paicunaca, shujca quimsa chivota, chaishujca quimsa mishqui tandata, caishujca fundupi vinota apashpami rinajunga.

4Paicunaca: ‘¿Alillachu capangui?’ nishpami, ishcai tandata caranga. Shina carajpica, japinguilla.

5Chaimanda rishpaca, macanajuj filisteocuna, ricushpa tiyanajuj, Diospaj huasimanmi chayangui. Chai puebloman yaicushpaca, profetacuna tandanajushpa, chai lomamanda urai shamunajujtami tuparingui. Paicunapaj ñaupajpica salteriota, panderota, gaitata, arpata taquishpami shamunajunga. Paicunaca, Dios ima nishcata villashpandimi shamunajunga.

6Chaipimi, Mandaj Diospaj Espíritu ninan ushaihuan cambajman shamujpi, shuj mushuj runa tucushpa, paicunashnalla villangui.

7Ñuca villashca cai shimicuna chashna pactajpica, imata rurana tiyajpipash ruranguilla. Taita Diosca, canhuanmi canga.

8Chai jipaca, Gilgal puebloman ñucata ñaupashpa ringuilla. Ñucami, chai jipaca Diosman carashpa tucuillata rupachinatapash, shinallata paihuan ali cangapa carashpa huañuchinatapash, apashpa shamusha. Chaipica, ñuca shamungacaman canchis punllata shuyanguilla. Chaipimi, can imatalla rurana cashcataca ricuchisha” nijurcami.

9Samuelta, Saúl cayacaman nishpa tigrarinhuanmi, Taita Diosca, Saulpaj shungutaca mushujta rurarca. Chai punllallatami, paiman villashca shimicunaca, tucuilla pactarca.

10Paicuna chai lomaman ña chayajpica, profeta runacunami tandanajushpa, paihuan tuparimunajurca. Chaipimi, Diospaj Espíritu ninan ushaihuan Saulpajman shamujpi, paicunashnallata Dios ima nishcata villai callarirca.

11Profetacunahuan, paipash villajujta ricushpami, paita punda rijsijcunaca, caishuj chaishuj cashna ninajurca: “Cis shuti runapaj churi Saulca, ¿imata tucunyari? ¿Paipash, profetachu imatayari?” ninajurcami.

12Shina ninajujpimi, shuj runaca: “¿Paicunapaj taitaca pitayari?” nirca. Chaimandami, shuj yarichij shimita churashpa: “¿Saulpashchu, profeta tucushca?” ninajurca.

13Dios ima nishcata villashca jipami, Saulca lomaman chayagrirca.

14Chaipimi Saultapash, paipajta ruraj runatapash, paipaj taitapaj huauquica: “¿Cangunaca Maimanda rircanguichi?” nishpa tapurca. Shina tapujpimi, Saulca: “Burrucunata mascangapami rircanchi. Na tarishpami, Samuelpajman rircanchi” nirca.

15Shina nijpimi, paipaj taitapaj huauquica: “Samuel, ima nishcatapash villanami cangui” nijurca.

16Shina nijpimi Saulca, paipaj taitapaj huauquitaca: “Burrucunataca ñami tarishca nishpami, tucuita villahuarca” nirca. Chaita villashpapash, Samuelca, pai jatun mandaj tucunataca na villarcachu.

17Chai jipami Samuelca, Israelcunataca, Mandaj Diospaj ñaupajpi, Mizpa shuti pueblopi tandachirca.

18Chai tandanajuipimi Israelcunataca, cashna nijurca: “Israelcunata Mandaj Taita Diosca, cashnami nin: ‘Ñucami, can Israelcunataca, Egiptomanda llujchimurcani. Egiptopi causajcunapaj maquimandapash, tucui shuj llactacunapi causajcuna llaquichishpa charinajujpaj maquimandapashmi cacharichircani’ ninmi.

19Shina cajpipash cangunaca, ninanda llaquichi tucushpa, huacashpa causanajushcamanda llujchimuj, Diostami yangapi churarcanguichi. Chashna rurashpami Ñucataca: ‘Ima cachumbash, jatun mandajta churayari’ ninajurcanguichi. Chashna cashcamanda cunanga, ayllupurapash, mirai ayllupurapash shicanyarishpa, Mandaj Diospaj ñaupajpi shayarichi” ninmi nijurcami.

20Ña tucuilla tandanajushca jipami Samuelca, tucui Israel ayllucunata ashtahuan quimirichun cayarca. Ña tucuilla quimirijpica, Benjamín ayllutami agllarca.

21Benjaminbaj mirai ayllupurata cayashpaca, Matri shuti runapaj huasi ucupuratami agllarca. Chaipaj jipaca, Cis shuti runapaj churi Saultami agllarca. Chaipica Saúl illajpi, mascanajushpapash na tarircachu.

22Chaimandami, Saúl chayamushcata, ña yachangapaca, Mandaj Diosta cutin tapunajurca. Chashna tapujpimi, Mandaj Diosca: “Ricuichi, Saulca macanajungapa tucuicuna apamushcata tandachishca chaupipimi pacajuriajun” nirca.

23Shina nijpimi paicunaca, calpashpa rishpa, chaimanda llujchimurca. Chaipimi, tucui Israelcunapaj chaupipi shayachijpica, tucuillata yali jatun carca.

24Chaimandami Samuelca, tucuicunata cashna nirca: “Mandaj Dios agllashca runataca, ñami ricurcanguichi. Tucui Israelpuramanda, paishnalla shuj runaca na tiyanllu” nirca. Shina nijpimi Israelcunaca, ninanda cushijushpa: “¡Jatun mandajca causajuchunlla!” nishpa caparinajurca.

25Chai jipami Samuelca, jatun mandaj imashna mandanata yachachijuj shimicunata villarca. Chai villashca shimicunata fangacunapi quilcashpami, Mandaj Diospaj ñaupajpi alichirca.

26Chai jipami, Samuelca tucui gentecunata paicunapaj huasicunaman cacharca. Shinallata Saulpashmi, Gabaa llactapi tiyajuj paipaj huasiman tigrarca. Macanajunata ali yachaj, shinlli runacunatapash, paicunapaj shungupi Taita Dios yarichijpimi, Saulhuan rinajurca.

27Ashtahuangarin na ali shunguta charij shuj runacunaca: “Cai runaca, ¿imashnashi ñucanchitaca, llaquimanda llujchinga?” nishpami yangapi churashpa, imata carangapapash na apamunajurca. Ashtahuangarin Saulca, na uyaj tucushpa rircallami.