1Eliú shuti runaca, cashnatapashmi nijurca:
2“Alipacha yachajushca runacuna, ñuca rimashcata uyahuaichi.
Ali yuyaita charijcuna, cangunapash ñucata ali uyahuaichi.
3Rinrica ninandami uyanayachin.
Mishquilla micujshnami, rimashcataca uyanayachin.
4Ñucanchica, alita ruranatalla agllashunchi.
Imalla ali cajtaca, ñucanchipura rijsishunchi.
5Job runaca, cashnami nijurca:
‘Ñucaca, ima na alitapash na rurashcanichu.
Ashtahuangarin Taita Diosca, ñuca imatalla japina cashcatami quichuhuarca.
6¿Ñucaca, ali ruraj cashpapash, na alichu cani nishallachu?
Napash ima juchata rurashca cashpatami,
ninanda llaquichi tucujuni’ nijurcami.
7¿Maijan runashi, Job runashna tiyan?
¿Paica, ima llaquitapash asishpachu chasquin?
8¿Paica, na alita rurajcunahuanllu cumba tucushpa purin?
¿Na ali runacunahuanllu purin?
9Paica cashnami nijurca:
‘Taita Diospaj munaita rurashcapash, imapapash na alichu’ nijurcami.
10Shina cashcamanda, ali yuyaita charij runacuna, ali uyahuaichi:
Taita Diosca, na alitaca napacha ruranllu.
Tucuita rurai ushaj Diosca juchataca napacha rurangachu.
11Maijanpash imatalla rurashcamandaca, Diosmi cunatallata cunga.
Imashna causashcata ricushpami, chaitallata cunga.
12Taita Diosca, na yangamanda juchachingachu.
Tucuita rurai ushaj Diosca, japina cashcatallatami cunga.
13¿Pita cai pachataca, ricuchun ushaita cushca?
¿Pita cai pachataca, juyailla churashca?
14Runaman, Dios carashca espirituta,
Paillata quichushpa, causaita quichujpica,
15causaita tucui charijcunami huañunga.
Runaca, alpamanllatami tigranga.
16Ali yuyaita charishpaca, caita uyangui.
Ñuca rimashcata ali uyangui.
17Aliguta ricushpa mandanata na munaj runaca, ¿mandai ushangachu?
¿Alitalla ruraj Diostaca, canga llaquichi ushanguimanllu?
18¿Jatun mandajtaca: ‘Jatun na alita rurajmi cangui’
cati mandajcunatapash: ‘Diosta na manllajcunami canguichi’ ningachu?
19¿Mandajcunatapash, ñavita ricushpalla alicachij Dioschu?
¿Imaguta na charijtapash, charij runatashna alicachishpa ricuj Dioschu?
Tucuicuna Diospaj maquihuanllata rurashcacunami.
20Runacunaca ñapash huañungallami.
Chaupi tutapi gentecuna, caparishcapash chingangallami.
Ninan ushaita charijpash, pipash na llaquichijpillata huañungallami.
21Diosca, runa imashna causajujtapash ricuriajunmi.
Imata rurajujtapash, tucuitami ricuriajun.
22Jatun na alita rurajcunaca, yana tutapipash,
huañui japinalla llandupipash, na pacajui ushangachu.
23Diosca, runata imatapash na rurai ushanallataca na mandashcachu.
Diospaj ñaupajpi ama llaquichi tucuchunmi chashna mandashca.
24Paica, ninan ushaita charijcunatapash, na tapuchishpallatami llaquichinga.
Paicunapaj randica, shujcunatami churanga.
25Diosca, imatalla paicuna rurashcacunata ricuchishpaca,
shuj tutallami llaquichishpa tucuchinga.
26Tucuicuna ricujtami, na alita ruraj runacunataca llaquichinga.
27Dios imatalla rurachun mandashcata, na cazushcamanda,
mandashcata pactachingapaca, yaritapash na yarishcamandami chashna ruranga.
28Imaguta na charijcunata llaquichijpimi, Diospajman uyarijta caparinajurca.
Chashna caparishcataca, Diosca uyarcami.
29Dios upalla saquijpica, ¿pita imatapash ruranga?
Ñavita pai pacajpica, ¿pita ricui ushanga?
Paica, llactata cashpa, shuj runatalla cashpapash, chashnallatami ricujun.
30Na alita ruraj runacuna mandachun na saquinllu.
Llactapi causajcunata ama llaquichishpa mandachunmi, na saquin.
31Taita Diostaca, cashnatapacha nishpami ali canguiman:
‘Ñami cai tucui llaquita apashcani, candaca na ashtahuan fiñachingapa munapanichu,
32Taita Dioslla, ñuca na ricushcacunata ricuchihuayari,
punda na alita rurashcataca, na ashtahuan rurashachu’ nishpami ali canguiman.
33¿Diosca, can munashcatachu cunga?
Paimi, can japina cashcata cunga.
Chaitaca, chasquina cashpapash, na chasquina cashpapash canmi ricungui.
Ñucaca na imatapash nishachu.
Ari nishpapash, na nishpapash, canllatami ricungui.
34Ali yuyaita charij runacunapash,
ñucata uyaj alipacha yachajushca runapash, cashnami ninga:
35‘Job runaca, aliguta yachashcahuanga na rimajunllu.
Pai rimashca shimicunaca, napacha ima yuyaitapash cunllu’ ninajungami.
36Job rimashcataca, imata rimajujtapash ali yachanami.
Paica, na alita ruraj runacuna rimashcashnami rimashca.
37Paica, juchata rurashca jahuami, ashtahuan na cazujurca.
Ñucanchitapash fiñashpami, maquita huajtarijurca.
Taita Diostapash fiñashpami, na ali shimicunatalla rimajurca” nijurcami.
Who We AreWhat We EelieveWhat We Do
2025 by iamachristian.org,Inc All rights reserved.
