HECHOS 16 - Quichua Imbabura 2016

Pablotapash, Silastapash Timoteomi cumbashca

1Chai jipaca, Derbe, Listra pueblocunamanmi, Pablopash, Silaspash chayagrirca. Chaipimi, Jesusta crij Timoteoca causajurca. Paipaj mamaca, crij judía huarmimi carca. Taitaca, griego runami carca.

2Listra, Iconio pueblocunamanda crijcunapash, Timoteotaca ninanda alicachijpimi causajurca.

3Timoteotaca, Pablo pushangapa munashpami, circuncisionda rurachun mandarca. Paipaj taita griego cajtaca, tucui judiocuna yachashcamandami chashna rurarca.

4Paicunaca, chai pueblocunata yalinajushpami, apostolcuna, ancianocuna, Jerusalenbi tandanajushpa, crijcuna imatalla rurashpa pactachinata, quilcashcata saquishpandi yalinajurca.

5Shina cajpimi, tandanajuj crijcunaca, alipacha crishpa, punllandi ashtahuan mirashpa catinajurca.

Macedonia llactapi causaj runatami, Pabloca muscuipishna ricushca

6Pablondi, Silasndimi, Frigia, Galacia llactacunata yalinajurca. Ashtahuangarin, Asia llactapi Diospaj Shimita villachunga, jucha illaj Diospaj Espirituca na saquircachu.

7Shinallata, Misia llactaman chayashpaca, Bitinia llactaman yalingapami munanajurca. Chaiman richumbash, Diospaj Espirituca na saquircachu.

8Shina cajpimi, Misia llactata yalishpaca, Troas puebloman urai rinajurca.

9Chaipimi, Macedonia llactamanda shuj runaca, Pabloman muscuipishna tuta ricurishpa: “Macedonia llactapi ñucanchiman yachachingapa shamupai” nishpa shayajuj ricurirca.

10Muscuipishna chashna ricushpaca, ali villanata chaipi villagrichun, Taita Dios munajtami yacharcanchi. Shina yachashpami, Macedoniaman ringapa ucha alichirircanchi.

Filipos pueblopi prezui tucushcamanda

11Troas pueblomandaca, Samotracia llactamanmi barcopi chimbarcanchi. Neápolis puebloman cayandi punllami chayarcanchi.

12Chaimandaca, Macedonia llactapi tiyaj Filipos pueblomanmi rircanchi. Chai pueblopica, Roma llactamanda shamushcacunami causanajushca carca. Chaipimi, huaquin punllacunata saquirircanchi.

13Chaipi cashpami, samana punlla chayajpica, chai pueblomanda llujshishpa, yacu manñaman rircanchi. Chaimanmi, Diosta mañangapaca tandanajuna carca. Ñucanchipash chaipi tiyarishpami, tandanajushca huarmicunaman yachachircanchi.

14Chaipimi, Tiatira pueblomanda, Taita Diosta ninanda alicachishpa causaj Lidia shuti huarmi uyashpa tiyajurca. Paica, yana puca fachacunata jatushpa causajmi carca. Pablo villajujta aliguta uyachunmi, Taita Diosca, chai huarmipaj shunguta pascarca.

15Shinamandami, paica huasi ucu ayllucunandi bautizarishpaca:

“Apunchi Jesusta ñuca ali crishpa catijujta ricushpaca, ñuca huasipi samangapa ripashunchipacha” nishpa ñucanchitaca pusharca.

16Chai jipaca, Diosta mañangapa rinajushpami, imatapash yachajlla ayata charij cuitsata tuparircanchi. Chai cuitsaca, imatapash yachajlla cashpami, paipaj amucunataca ninanda culquichishpa causarca.

17Chai cuitsami, Pablotapash, ñucanchitapash catimushpa, cashna nishpa caparijurca:

“Cai runacunaca, jahua pachapi causaj Taita Diospajta rurajcuna cashpami, quishpirinamandapash villanajun” nijurcami.

18Chashna nishpa, tauca punllacunata catiriyajujpimi, Pabloca, na ashtahuan uyanayachishpa, chai ayata tigrarishpa ricushpaca:

“Candaca, Jesucristopaj shutipimi, chai cuitsamandaca llujshi nini” nirca.

Shina nijpica ñapash llujshircallami.

19Chai cuitsapaj amucunaca, na ashtahuan culquita japinata yachashpami, Pablotapash, Silastapash japishpa, jatun plazapi tiyaj mandajcunapajman apanajurca.

20Chai mandajcunapajman apashpaca, cashnami ninajurca:

“Cai runacunaca, judiocuna cashpapash, ñucanchi pueblopimi fiñanajuchishpa purinajun.

21Paicunaca, napash yachachinacunatami yachachinajun, ñucanchica, Roma llactamanda cashpami paicuna yachachishcataca, napacha catina canchi” ninajurcami.

22Shina cajpimi Pablotapash, Silastapash, fiñashpa tucui gentecuna tandanajurca. Chaipimi, mandajcunaca: “Cai runacunataca, churajunata surcuchishpa ninanda astichi” nishpa mandarca.

23Shina ninanda astichishca jipaca, prezuna huasipi churachunmi cacharca. Prezuna huasita ricuriaj chapajtapash: “Ama anchurishpa ricungui” nishpami mandanajurca.

24Shina mandajpi cazushpami paicunataca, na llujshi ushanalla ashtahuan ucuman prezu churagrirca. Paicunapaj chaquitapash, caspipura canichishpa churanapimi huatashpa saquirca.

25Ashtahuangarin chaupi tutaca Pablopash, Silaspash, Taita Diosta mañashpa candanajujtami, chaipi prezucunapash uyanajurca.

26Shinamandami, alpa mama ñapash ninanda chujchushpa, prezuna huasi ucucunandi ninanda cuyuchirca. Shina cuyujpimi, pungucunapash tucuilla pascarirca. Prezu tiyanajujcunata huatashca cadenacunapash tucuillami pascarirca.

27Prezuna huasita ricuj rijcharishpaca, pungucuna pascariyajta ricushpami, “prezucunaca llujshishcamari” yashpa, paillata espadahuan huañuchiringapa munarca.

28Ashtahuangarin Pabloca:

“Ama canllata huañuchirichu. Tucuillamari caipi canchi” nishpa ninanda caparirca.

29Shina nijpimi, prezuna huasita ricuj runaca, michata mañashpa, ucuman calpashpa yaicurca. Paica, ninanda manllarishpa chujchushpami, Pablopaj, Silaspaj ñaupajpi cungurirca.

30Paicunataca, canllaman llujchishpami:

“Taitacuna, ñuca quishpiringapaca, ¿imatata rurana capani?” nishpa tapurca.

31Shina tapujpimi, paicunaca cashna nirca:

“Apunchi Jesucristota crishpaca, cambash, cambaj huasipi causajcunapash quishpiringuichimi” nircami.

32Shinamandami, Jatun Diospaj shimitaca, paimambash, paipaj huasipi tucuilla causajcunamambash villanajurca.

33Prezuna huasita ricuj runaca, chai tutallata Pablotapash, Silastapash pushashpami, chugricunata maillachijurca. Chai jipami, paipash, paipaj huasipi causajcunandi, tucuilla bautizarirca.

34Chai jipami, paipaj huasiman pushashpa micunata cararca. Taita Diosta crishcamandami, paica paipaj huasipi causajcunandi tucuilla cushijunajurca.

35Chai pueblota mandajcunaca, tutamandatami: “Chai runacunataca cacharilla” nigrichun chapajcunata cacharca.

36Shina nijpimi Pablotaca, chai ricuj runaca cashna nirca:

“Cangunata cacharilla nishpami, mandajcunaca cachamushca. Cunanga, cushijushpa llujshishpa ripaichilla” nircami.

37Ashtahuangarin Pabloca, macanajuj runacunataca cashnami nirca:

“Ñucanchitaca, tucuicunapaj ñaupajpimi astichirca. Paicunaca, imatapash na tapuchishpallatami ñucanchitaca, Roma llactamanda cajpipash, prezuna huasipi churarca. Cunanga, pacalla llujshichunmi paicunaca munashca. Na paicuna llujchij shamujpica, napacha rishunllu” nircami.

38Shina nishcatami chapajcunaca, mandajcunaman villagrirca. Roma llactamanda cashcata paicuna yachashpaca, ninandami manllarirca.

39Mandajcuna shamushpaca, chai prezuna huasimanda llujchishpami:

“Cai pueblomanda llujshishpa ripaichilla” nishpa ninanda mañanajurca.

40Prezumanda llujshishpaca, Lidia shuti huarmipaj huasimanmi chayagrirca. Chaipi crijcunahuan tandanajushpaca, aliguta catichunmi yachachinajurca. Chai jipami, chaimanda llujshishpa rinajurca.