FILIPENSES 4 - Quichua Imbabura 2016

Apunchi Jesushuan ninanda cushijuichi nishcami

1Ñuca juyashca crijcuna. Cangunaca, ñuca ninanda cushijuna coronashnami canguichi. Juyashca crijcuna, shina cajpimi, cangunataca, Apunchi Jesustaca shinllipacha catinguichi nini.

2Evodia shuti, Síntique shuti panicuna. Cangunataca, Apunchi Jesusmanda shujlla cashcata yarishpa causapaichi nipanimi.

3Shinallata, ñucapaj ali cumba can huauquitaca, cai panicunata yanapangui nipanimi. Paicunami, quishpirinamanda ñuca villajujpica, huauqui Clementendi, shuj huauquicunanandi tucuipi yanapahuarca. Paicunapaj shuticunataca, causaita causagrinata villajuj libropimi ña quilcashca tiyajun.

4Apunchi Jesuspaj cashcamandaca, tucui causaipi ninanda cushijupaichi. Cutimbashmi: ¡Ninanda cushijupaichi! nini.

5Canguna ali shunguta charishcataca, tucui gentecuna yachachunmi munani. Apunchi Jesusca ñucanchihuanmi causajun.

6Imamandapash na musparinachu canguichi. Ashtahuangarin, tucui imata mañanata charishpapash, Taita Diosman villashpami, ninanda mañashpa, pashi nishpa causana canguichi.

7Pipash na yachai ushanalla, cushi causaita caraj Taita Diosmi, Cristo Jesusmanda, cangunapaj shungupi, yuyaipi, chashna ali causaiguta cushpa, huacaichinga.

Caitallami yarina canguichi

8Juyashca crijcuna: Na llullaj canata, alita rurana munai canata, alitalla ruraj canata, mapa illaj canata, juyaj canata, tucuicunapaj ñaupajpi ali canatallami yarina canguichi. Shinallata, tucuipi ali canata ricushpa, alicachishpa chasquina cajpica, chaitallami yarishpa causana canguichi.

9Ñuca yachachijpi, chasquishcacunata, uyashcacunata, ricushcacunataca pactachishpami causana canguichi. Shina causajpimi, cushi causaita caraj Taita Diosca cangunahuan causajunga.

Filipos pueblopi causanajuj crijcuna carashcamanda

10Ñucata cutin yarishpa canguna caramujpimi, Apunchi Jesusmandaca ninandapacha cushijuni. Cangunaca, ñucata yarinajushpapash, cachamuitallami na usharcanguichi.

11Imapash illaimandaca, na cashna nijunichu. Imata charishpapash, chaihuanlla cushijushpa causanatami yachajurcani.

12Imata na charishpapash, ashtacata charishpapash, tucuipi imashna causanatapash yachanimi. Micuna tiyajpipash, micuna illajpipash, ashtacata charishpapash, nimata na charishpapash, imashna causanatapash alimi yachani.

13Cristo ushaita carajpimi, tucuita rurai ushani.

14Shina cajpipash, jatun llaquipi cajta ricushpa caramushpami, alita rurarcanguichi.

15Filipos pueblopi causanajuj crijcuna, cangunallata alimi yachanguichi. Macedonia llactamanda callarishpa, quishpirinamanda villashpa rijujpica, maijan tandanajuj crijcunapash na ricuhuarcachu. Ashtahuangarin cangunallami, ñucataca ricushpa imagutapash carahuarcanguichi.

16Tesalónica pueblopi cajpicarin, cangunallami, imagupallapash illashcata ricushpa cutin cutin cachamurcanguichi.

17Imatapash carahuachun yashpaca na chashna nijunichu. Ashtahuangarin, canguna carashcamanda Diospaj ñaupajpi, ashtahuan japigrichunmi chashna nijuni.

18Canguna caramushcata japishpami, cunanga ashtacata charini. Epafrodito shuti huauquiman canguna cachamushcapash, Diosman carashpa rupachijpi, mishquillagu ashnajujshnami, Taita Diospaj ñaupajpica ricurijun.

19Ñuca Taita Diosca tucuita charishpami, cangunapaj ima illajpipash, Cristo Jesusmandaca, Paipaj ushaihuan tucuita caramunga.

20Shina cashcamandaca, ñucanchi Taita Diostami, causaita causaicaman, “ninan ushaita charijmari cangui” ninajushca cachun. Chashna cachun.

“Aliguta causapanguichi” nishpami tucuchishca

21Cristo Jesusmanda Diospajlla causajcunataca, tucuicunata “alillachu capanguichi” nijunmi nipanguichi. Ñucahuan purinajuj huauquicunapashmi cangunataca “alillachu capanguichi” ninajun.

22Diospajlla causajcunapash, tucuicunami cangunataca “alillachu capanguichi” ninajun. Cesarpaj huasipi causanajuj crijcunacarin, ninandapachami cangunataca “alillachu capanguichi” ninajun.

23Ñucanchi Apunchi Jesucristopaj ninan juyaica, tucui cangunahuan cachunmi munani. Chashna cachun.