MARCOS 13 - Quichua Imbabura 2016

Diospaj huasita shitashpa tucuchinatami, Jesusca villashca(Mat. 24:1-2; Luc. 21:5-6)

1Diospaj huasimanda Jesús llujshijujpimi, Paipaj yachajujcunamanda shujca cashna nirca:

“Yachachij, cai juyailla rumicunata, cai jatun huasicunata ricui” nircami.

2Shina nijpimi Jesusca cashna nirca:

“Can ricujushca cai jatun huasicunapica, shuj rumillapash, shuj rumi jahuapica na saquiringachu. Tucuillami urmachi tucunga” nircami.

Tucurimui punlla nara chayamujpillatami ninan llaquicuna tiyanga(Mat. 24:3-28; Luc. 21:7-24; 17:22-24)

3Shina nishpallami, Diospaj huasi chimbapi tiyaj Olivo shuti lomapi tiyarirca. Chaipimi, Pedropash, Jacobopash, Juanbash, Andrespash, Jesustaca paitalla tapunajurca:

4“¿Ima punllapita chaicunaca pactanga? ¿Imacunata ricushpata, Can villashcacuna pactajujtaca yachashun? Chaitaca villayari” ninajurcami.

5Jesusca cashnami nirca:

“Ricuichi, pipash cangunatara umachinman.

6Ashtacacunami Ñuca shutipi shamushpa: ‘Ñucami Cristo cani’ nishpa ashtacacunata umachinajunga.

7Jatun macanajuicunapash, ninan macanajuicunapashmi shamugrin ninajujta uyashpaca na manllarishpa musparinachu canguichi. Chashna llaquicunaca tiyanapachami. Chashna cashpapash, tucurimui punllapachaca nara chayamungachu.

8Shuj llactahuan, caishuj llactahuanmi macanajunga. Shinallata, llactacunata jatun mandajpurapashmi macanajunga. Shinallata, alpa mama cuyushpa tucuchijuipash, shuj shuj llactacunapimi tiyanga. Ninan yarjaipash, caparinajuipashmi tiyanga. Chai tucui llaquicunaca callarillami canga.

9Ashtahuangarin cangunallatami, aliguta yarina canguichi. Cangunata japishpaca, mandajpuralla tandanajushca ñaupajmanmi apanga. Shinallata, sinagogacunapimi astinajunga. Ñucata catinajushcamandaca, llactata mandajcunapaj ñaupajman, jatun mandajcunapaj ñaupajmanmi apai tucunguichi. Ñucata catijushcata paicunaman ricuchingapami chashna apai tucunguichi.

10Cai pacha nara tucurijpillatami, quishpirinamandaca tucuilla llactacunapi villashcapacha canga.

11Ashtahuangarin, mandajcunaman cungapa cangunata apajpica, ‘¿imatashi nisha?’ yashpaca, na manllarinachu canguichi. Imata rimachumbash Dios ñapash yarichishcatallami rimana canguichi. Na cangunamandallata rimanguichichu, ashtahuangarin, jucha illaj Espíritu yarichijpimi rimanguichi.

12Huauquillatami, paipaj huauquitaca, huañuchijcunaman japichinga. Taitallatami, paipaj churitaca huañuchijcunaman japichinga. Huahuacunapash, taitata, mamata ninanda na ricunayachishpami huañuchinajunga.

13Ñuca shutita villashpa catishcamandami cangunataca, tucuicuna na ricunayachinga. Ashtahuangarin, tucurimuicaman llaquicunata apashpa shinlli catijcunallami quishpiringa.

14Chaimandami, profeta Daniel villashca, quilcashcapi nijujshnallata, millanayaita rurashpa tucuchij chai runaca, napash tiyajunapi tiyajunga (cashna villashcata quilca catishpa, aliguta yarichun ninimi). Chaita ricushpaca, Judea llactapi causajcunaca, urcucunapi pacajungapa richun ninimi.

15Huasi jahuapi cashpaca, huasi ucumanda imata apangapapash ama yaicuchun ninimi.

16Shinallata, pambapi cashpapash, paipaj jahualla churajunata apangapaca ama tigrachun ninimi.

17Chai punllacunapica, vijsayu huarmicunapash, llullu huahuacunata chuchuchishpa viñachijuj huarmicunapash, ¡aij, imachari tucunga!

18Canguna pacajushpa calpana punllacunaca, ama tamia punllacuna cachunmi, Taita Diosta mañariana canguichi.

19Chai punllacunapica, ninan manllanayai llaquicunami tiyanga. Chashna jatun llaquicunaca, Taita Dios tucuita churashpa callarichishca punllamandapacha cunangaman nara tiyarcachu, jipamambash na tiyangachu.

20Chai punllacuna ama unaicaman cachun, Mandaj Dios na ucha saquichijpica, pipash na quishpirinmanllu. Ashtahuangarin, Pai agllashcacunata ninanda juyashpallami, chai llaqui punllacuna na unaicaman cachun, ucha saquichishca.

21Shina cashpaca, maijambash cangunata: ‘Ricuichi, Cristoca caipimi’, na cashpaca: ‘Ricuichi, chaipimi’ ninajungami. Chashna ninajujpipash, napacha crinachu canguichi.

22‘Cristomi cani’ nishpa llullajcunapash, llullashpa villaj profetacunapashmi tiyanga. Paicunaca, pipash na rurai ushanallacunata, jatun manllarinacunatami rurashpa ricuchinajunga. Chashnami, paicuna ushashpaca, Dios agllashcacunatapash umachinajunga.

23Ashtahuangarin cangunaca, aliguta yarishpami causana canguichi. Nara chashna tucujpillatami, cangunaman tucuita ña villajurcani” nijurcami.

Runa Aichayuj tucushca Jesús tigramunamanda(Mat. 24:29-35,42-44; Luc. 21:25-36)

24Ashtahuangarin, chashna ninan llaqui punllacuna yalishca jipaca, indipash yanayangami, lunapash na punchayachingachu.

25Luzerocunapash, jahua pachamanda urmamungami, shinallata, ninan ushaihuan jahua pachacunapi tiyajcunapash, ninandami cuyunajunga.

26Shina cajpimi, Runa Aichayuj tucushca Ñucataca, fuyupi, ninan ushaihuan, punchapamba shamujujta ricunajunga.

27Shina shamushpami, Ñuca angelcunata cachamusha. Paicunami, Ñuca agllashcacunata cai pacha chuscundi suyucunamanda, cai alpa pacha tucurimanda, jahua pacha tucuricaman tandachinajunga.

28Higo yuramanda yarichishpa yachachishcatami, aliguta yachajuna canguichi: Chai yurapi malquicuna viñashpa, llullu fangacuna jundajta ricushpami, rupai punllacuna chayamuntaca yachanguichi.

29Chashnallatami, chai tucuita ricushpaca, Ñuca shamunaca ña pungupi cajta yachana canguichi.

30Na llullashpami cangunataca cashna nini: Cunan viñaicuna nara huañujpillatami, Ñuca villajushca shimicunaca pactanga.

31Jahua pachapash, cai pachapash tucuringami. Ashtahuangarin, Ñuca villajushca shimicunaca napacha tucuringachu.

32Ashtahuangarin, ima punlla, ima horas Ñuca tigramunataca, pipash na yachanllu. Jahua pachapi tiyaj angelcunapash na yachanllu. Ñucapash na yachanichu. Chaitaca Ñuca Taitallami yachan.

33Ricuichi, ima punllacuna chashna tucunata na yachaimandami, rijchariaj, Diosta mañashpa causana canguichi.

34Chashna tucunaca, shuj runa paipaj huasita saquishpa, caru llactaman rishcashnallami. Chai runaca, paipajta rurajcunamanmi huasita mingashpa rin. Imata rurachumbash, paicunamanmi saquin. Pungupi chapajtapash, rijchariashpa ricuchunmi mandashpa saquin.

35Huasiyuj taita ima punlla tigramunata na yachaimandami, rijchariashpa chapariyana canguichi. Paica, ña tutayajujpi cashpa, chaupi tuta cashpa, gallo candai pachapi cashpa, tutamanda cashpapash, shamungallami.

36Cungashcapi shamushpa, puñunajujta ama japichunmi, chashna rijchariajshna shuyana canguichi.

37Cangunaman villashcataca, tucuicunamanmi chashnallata villajuni. “Rijchariyanshnami shuyana canguichi” nijurcami.