HECHOS 22 - Quichua Imbabura 2016

1“Huauquicuna, taitacuna, ñuca imashna cashcata cangunapaj ñaupajpi rimajta uyahuaichi” nircami.

2Shina nishpa hebreo shimipi rimajta uyashpa upalla saquirijpimi Pabloca, cashna nijurca:

3“Cilicia llactapi tiyaj Tarso shuti pueblopi huacharishca, judio runami cani. Ashtahuangarin, cai Jerusalenbi viñashca cashpami, jatun yachachij Gamalielhuan alipacha yachajushca cani. Shinallata, cunanbi cangunashnallata, ñucanchipaj ñaupa taitacunaman mandashcacunatapash, alipacha pactachij, Taita Diostapash alipacha cazuj runami cani.

4Ali Ñanda catijcunataca, catiriyashpami huañuchij carcani. Shinallata, huarmicunatapash, jaricunatapashmi japishpa, prezuna huasiman apachun cachajun carcani.

5Ñuca chashna rurashcataca, sacerdotecunata mandajpash, tucui ancianocunapash yachanmi. Paicunami, Damasco pueblopi causanajuj crijcunata, Jerusalenman apamushpa, prezuna huasipi churashpa llaquichinajuchun quilcashca fangacunata cachahuarca.

Pabloca, pai imashna quishpirishcatami villashca(Hech. 9:1-19; 26:12-18)

6Ashtahuangarin chaupi punlla tucujujpimi, Damasco puebloman ñuca chayajujpica cashna tucurca: Jahua pachamandaca cungashcapimi ñucapaj muyundipi punchapamba micha shitamurca.

7Shina tucujpimi, alpaman ñuca urmashpaca: ‘Saulo, Saulo, ¿imamandata catiriyashpa llaquichihuangui?’ nijta uyarcani.

8Shina nijpimi: ‘¿Pita capangui, mandaj Taitalla?’ nircani. Chaimi: ‘Can llaquichijuj, Nazaret pueblomanda Jesusmi cani’ nihuarca.

9Ñucata cumbashpa rinajuj runacunapash, punchapamba shitamujta ricushpami, ninanda manllarinajurca. Ashtahuangarin, ñucaman imata rimajtaca paicunaca na uyarcachu.

10Shina cajpimi: ‘¿Imatata rurapasha, Apunchi Jesús?’ nircani. Shina nijpimi, Apunchi Jesusca: ‘Cunanda jatarishpa, Damasco puebloman rilla. Chaipimi, can imata rurachumbash villanga’ nihuarcami.

11Jahua pachamanda punchapamba shitamushpami ñausata rurahuarca. Shina tucujpimi, ñucata cumbashpa rinajuj runacuna maquimanda aisashpa pushajpi, Damasco puebloman chayarcani.

12Chaipica, mandashca shimicunata pactachij, Diosta yarishpa causaj, Ananías runa causashcami carca. Paitaca, Damasco pueblopi causaj judiocuna, tucuicuna ninanda alicachijpimi causajuj carca.

13Pai ñucapajman shamushpaca: ‘Huauqui Saulo, cambaj ñavihuan cutin ricuilla’ nihuarcami. Shina nijpi cutin ricushpaca, paita ricurcanillami.

14Paica, cashnami nihuarca: ‘Ñucanchi ñaupa taitacunapaj Taita Diosmi, Pai munashcata can yachachun agllashca. Shina cashpami, alitalla ruraj Jesustapash ricushcangui, Pai rimashca shimitapash uyashcangui.

15Canga imata ricushcatapash, uyashcatapash tucuicunaman maipipash villajmi tucugringui.

16Cunanga, ama ashtahuan shuyaichu, jatarishpa bautizari. Cambaj juchacunata maillachun, Apunchi Jesusta mañai’ nihuarcami.

Na Israelcunaman villachun Pablota cachashcamanda

17Jerusalenman ñuca tigramushpaca, Diospaj huasipi, Diosta mañajushpami, muscuipishna ricurcani.

18Chaipimi, Apunchi Jesús ñucaman ricurishpa, cashna nihuarca: ‘Ñucamanda can villajujta, caipi causajcunaca na uyangapa munagrinllu. Chaimandami, Jerusalenmandaca ucha llujshishpa rina cangui’ nihuarcami.

19Shina nijpimi, cashna nircani: ‘Apunchi Jesús, Canda crijcunataca, sinagogacunapi astichishpami, prezuna huasiman apachin carcani. Ñuca chashna rurajushcataca, tucuicunami caipica yachan.

20Canmanda villaj Esteban runaguta yahuarsapa macashpa huañuchijpipash, chaipimi carcani. Paitaca huañuchinapachami yajurcanimi. Shina nishpami, huañuchij runacunapaj churajunacunatapash, ricushpa shayajurcani’ nircanimi.

21Ashtahuangarin Apunchi Jesusca, cashnami nihuarca: ‘Rilla, Ñucami candaca, na Israelcuna causanajuj llactacunapi villachun cachagrini’ nihuarca” nijurcami.

Pablotaca, macanajuj runacunata mandajmi charijushca

22Cai shimicunata villangacamanmi Pablotaca, ali uyanajurca. Ashtahuangarin ñapash ninanda caparishpami: “Cai runaca, na causanachu. Paitaca, cai pachamanda anchuchinami” ninajurca.

23Chashna ninanda caparishpami, paicuna churajushcatapash llujchishpa shitashpa, alpatapash jahuaman shitanajurca.

24Chashna cajpimi, huaranga macanajuj runacunata mandaj runaca, imamandapacha chashna Pablota fiñashpa caparinajujta yachangapa munashpa:

“Macanajuj runacunapaj jatun huasiman pushaichi. Chaipi astishpa tapuchigrichi” nishpa mandarca.

25Pabloca, ña paita astingapa huascahuan huatanajujpimi, patsaj macanajuj runacunata mandajtaca cashna nishpa tapurca:

“Roma llactapura shuj runataca, ima cajtapash nara ali yachashpallata ¿astinallachu canga?” nishpami tapurca.

26Chashna nijpimi, chai mandaj runaca, huaranga macanajuj runacunata mandaj runaman cashna nirca:

“Chai runaca, Roma llactapurami cashca. ¿Imatata ruragringui?” nircami.

27Shina villajpimi, chai huaranga macanajuj runacunata mandaj shamushpaca:

“¿Canga, Roma llactamandachu cangui?” nishpa tapurca. Shina nijpimi Pabloca:

“Ari, chaimandami cani” nirca.

28Shina nijpimi chai huaranga runacunata mandajca, cashna nirca:

“Roma llactapura tucungapaca, ashtaca culquitami curcani” nirca.

Shina nijpimi, Pabloca:

“Ashtahuangarin ñucaca, chaipi huacharishcami cani” nirca.

29Shina nijpica, Pablota macachun churashca macanajuj runacunaca anchurircallami. Pablotaca, Roma llactapura cashcata, huaranga macanajuj runacunata mandaj yachashpami manllarirca.

Mandajpuralla tandanajushcapaj ñaupajpimi, Pabloca villashca

30Cayandi punllapica, chai mandaj runaca, judiocuna imamanda Pablota huañuchingapa munashcata yachangapa munashpami, Pablota cadenacunahuan huatashcamanda cacharichirca. Shinallata, sacerdotecunata mandaj sacerdotecunatapash, mandajpuralla tandanajujcunatapash, tucuilla tandanajuchunmi cayaj cacharca. Pablotaca, chai mandajcunapaj ñaupajpimi tapuchingapa pushamurca.