1Chaimandami ninanda manllarijuni.
Ñuca shungupash ninandami chujchujun.
2Rayushna Dios caparijujtaca uyanamari canguichi.
Paipaj shimihuan caparishpa, mandashcataca cazunami canguichi.
3Jahua pachamandami rayushna cai pachaman rimamujun.
Pai rimashca shimica, rayu punchayachijshnami cai pachataca punchayachijun.
4Pai rimashca shimicunaca, rayu ninanda culun nijujshnami uyarijun.
Chaitaca, pipash na upallayachi ushangachu.
5Diosca, rayu culun nijujshnami ninanda rimajun.
Ñucanchi na yachai ushanallatami, Paica tucuita rurajun.
6Paimi rasutapash, ‘alpaman urmai’ nijun.
Shinallata, paramutapash, shinlli tamiatapashmi, chashnallata mandajun.
7Chashnami, gentecunaca pacajungapa calpanajun.
Diosca, Pai tucuita ruraj cashcata ricuchingapami, chashna rurajun.
8Animalcunapash, paicuna pacajuna utujucunamanmi yaicunajun.
Chaicunapimi, pacajushca tiyanajun.
9Acapana huairapash, uramandami shamun.
Janajmandami chiri huairapash shamujun.
10Taita Dios fucujpimi, yacuca razuman tigran.
Chaimandami jatun cuchacunapash, rumishna tigran.
11Yana fuyuta cachamushpami, tamiachimun.
Paipaj michahuan rayuchishpami, fuyutapash caiman chaiman cachan.
12Shinallata Pai mandajpimi, fuyucunaca muyundi rinajun.
Chashnami cai pachataca quilpanajun.
Fuyucunaca, Dios mandashcatami pactachinajun.
13Huaquimbica llaquichingapa, huaquimbica alipajmi, chashna tamiajun.
Huaquimbica, juyaimandami chashna cachamujun.
14Job, caicunataca alimi uyana cangui.
Taita Dios tucui imata juyailla rurashcataca, aligutami yarina cangui.
15Taita Dios fuyucunata ¿imashna mandajujta yachanguichu?
Shinallata, fuyu ucumanda, ¿imashna punchapamba ricurijta yachanguichu?
16¿Shinallata, imalla fuyucuna tiyajtapash yachanguichu?
¿Paipaj ninan ushaihuan chaicunata rurashcatapash yachanguichu?
17Cambaj churajunacuna ¿imashpa cunujlla cajtapash yachanguichu?
Uramanda chiri huaira shamujpipash churajuna, ¿imamanda cunujlla cajtapash yachanguichu?
18Jahua pachata churajujpipash ¿canga yanaparcanguichu?
Canllu punchapamba espejotashna shinlli cachun churarcangui?
19Ñucanchi imata Diosman nichumbash, canmi yachachina cangui.
Yana tutapishna causashpami, ñucanchica ima ali yuyaitapash na charinchi.
20¿Ñuca rimangapa munajushcataca, Diosman villanachu cani?
Runaca, imata aliguta rimajushpapash, tucuchi tucunallatami cani.
21Cunanga, jahua pachapi punchalla micha tiyajundaca, pipash na ricui ushanllu.
Huaira shamushpa fuyuta anchuchijpillami, ricui ushanga.
22Janajmanda quillulla micha shamujtaca ricunallami canga.
Taita Diosmi ninan ushaihuan chashna punchapamba shamun.
23Ninan ushaita charij Dios imashna cajtaca, pipash na yachai usharingachu.
Paica, tucuita pactachij, pitapash na yangamanda llaquichij Diosmi.
24Chaimandami Paitaca ninanda manllanajunga.
Paicunapaj shungupilla ali yachaj tucushca gentecunataca, yangapimi churanga” nijurcami.
Who We AreWhat We EelieveWhat We Do
2025 by iamachristian.org,Inc All rights reserved.