Psalms 57 - Quichua Imbabura 2016

Huañuchingapa catiriyajcunamanda quishpichijuchun, Diosta mañashcamanda(Sal. 108:1-5)Saulmanda pacajushpa shuj utujupi causajushpa, ama tucuchihuaichu nishpa candana taquipi, candajcunata mandaj candachijuchun, David rurashca Salmomi.

1Ñucataca llaquihuayari.

Taita Dioslla, ninanda llaquihuayari.

Ñucaca, Candallami yariajurcani.

Cambaj ushaihuan yanapachunmi shuyajuni.

Ninan llaquicuna yalingacamanmi chashna shuyajuni.

2Jahua pachapi causajuj Taita Diostami mañasha.

Ñucata yanapaj Taita Diostami mañasha.

3Paimi jahua pachamanda yanapashpa quishpichihuanga.

Catiriyashpa llaquichijcunata, llaquichishpami quishpichihuanga. Selah

Taita Diosca na llullaj, Paipaj juyaitami cachamunga.

4Leongunapaj chaupipishnami causajuni.

Cacharishcata rimaj, ninan na ali gentecunapaj chaupipimi causajuni.

Paicunapaj quirucunaca lanzacunashna, flechacunashnami.

Paicunapaj jallupash, filo filo espadashnami.

5Taita Dioslla,

jahua pachapica jatunyachi tucushca capangui.

Tucui cai pachapica, cambaj ninan ushaita ricuchipangui.

6Ñuca purinapipash, linllitami churashca.

Ñucataca, ninandami llaquichishca.

Ñuca purinapica, jatun utujutami allashca.

Chaipica, paicunallatami urmanajushca. Selah

7Taita Dioslla,

ñuca shungupica Canda alicachinatallami yariajuni.

Salmocunatami, taquishpa candasha.

8Ñuca almalla, rijchariyari.

Arpapash, salteriopash, rijcharichiyari.

Ñucaca, tutamandatami jatarisha.

9Jatun Dioslla,

Candaca gentecunapaj chaupipimi alicachijusha.

Candaca, llactacunapaj chaupipimi candajusha.

10Cambaj ninan juyaica, jahua pachacaman jatumbachami.

Can na llullaj canapash, fuyucaman chayajtami.

11Taita Dioslla,

jahua pachapica ninanda jatunyachi tucushca capangui.

Tucui cai pachapica, Cambaj ninan ushaita ricuchipangui.