1Hacalías shuti runapaj churi Nehemías rimashca shimicunami.
Ñucaca, llactata mandana Susa shuti jatun pueblopi cajpimi, ishcai chunga huatapaj Quisleu quillapi cashna tucurca:
2Hanani shuti ñuca huauquindi, Judá llactamanda huaquin runacunandi shamujpimi, prezu apajpi pacajushpa saquirishca Judá llacta runacunamandapash, Jerusalén pueblomandapash tapurcani.
3Shina tapujpimi, cashna ninajurca: “Prezu apajpi huaquin saquirishcacunaca, chai llactapi jatun llaquita apashpami, pingai tucushpa causanajun. Jerusalén muyundi pircacunatapash urmachishpami, chai pueblopaj pungucunatapash rupachishca” ninajurcami.
4Chaita uyashpami, tiyarishpa huacarcani. Tauca punllacunata ninan llaqui cashpami, na micushpa jahua pachapi causajuj Taita Diosta mañajurcani.
5Cashna nishpami mañajurcani: “Jahua pachapi causajuj Mandaj Taita Dioslla. Canga, ninan ushaita charij, jatun Dios cajpimi mañajupani. Canda juyashpa, Can mandashcacunata cazujcunahuanga, Can ari nishcatapash pactachishpa, llaquij Diosmi capangui.
6Cunanga, Cambajta ruraj ñuca, tutandi, punllandi Israelcunamanda mañajujtaca, aliguta ricushpa uyapangui. Cambajta ruraj Israelcuna, juchata rurashpa Canda fiñachishcatami villashpa mañajupani. Ari ñucapash, ñuca ñaupa taitacunapaj huasi ucupuracunapashmi, juchata rurapashcanchi.
7Can mandashpa Moisesman cushca tucui mandashca shimicunata na cazushpami, ninan juchatapacha rurapashcanchi.
8Cunanga, Cambajta ruraj Moisesman imata nishcataca yaripailla. Canga cashnami nipashcangui: ‘Canguna juchata rurajpica, tucui llactacunamanmi llujchishpa calpachisha.
9Shina cajpipash, canguna ñucapajman tigrarishpa, ñuca mandashcacunata cazushpa pactachijpica, tucui cai pacha tucuri manñacunaman cachashca cashpapash, cutinmi tandachimusha. Ñuca shuti chaipi causajuchun, Ñuca agllashca pushtumanmi cangunataca pushamusha’ nipashcanguimi.
10Paicunaca, Cambajta rurajcuna, Can agllashca gentecunami capan. Paicunataca, Cambaj ninan ushaihuan, ninan ushaita charij, Cambaj maquihuanmi llujchircangui.
11Cunanga, Mandaj Dioslla, Candaca ninandami mañapani. Cambajta ruraj ñuca mañajujtapash, cambaj shutita alicachishpa causajcuna mañajujtapash uyashpa chasquipailla. Cambajta ruraj ñucataca, tucuipi ali llujshichun, cai runapaj ñaupajpipash ali ricuringapa yanapahuailla” nishpami mañajurcani.
Ñucaca, jatun mandajman copapi vinota yalichishpami causajurcani.
Who We AreWhat We EelieveWhat We Do
2025 by iamachristian.org,Inc All rights reserved.
