1Shinamandami Jesusca, yarichishpa yachachina shimicunahuan cashna ni callarirca: “Shuj runami uva chagrata tarpurca. Chai tarpushca alpataca, muyundita jarcashpami, uvata cutana pushtutapash utujushpa, shuj torretapash rurarca. Shina rurashpami, shuj runacunaman chai alpata partido cushpa, caru llactaman rirca.
2Ña fucuna punllacuna pactajpimi, uvacuna fucushcata chaupishpa apagrichun, partido japij chai runacunapajman, paipajta ruraj shuj runata cacharca.
3Ashtahuangarin chai runacunaca, paitaca japishpa, macashpami imatapash na cushpa tigrachirca.
4Shinamandami, cutin shuj runata cacharca. Paitapash rumicunahuan umata faquishpami, ninanda rimashpa, pingaichishpa tigrachirca.
5Cutin shuj runata cachajpipash, paitacarin huañuchircami. Shinapash, ashtahuan tauca runacunata cachajpimi, huaquingunataca macashpa, shujcunataca huañuchirca.
6Tucuicunapaj jipaca, juyashpa charishca paipaj shujlla churitami: ‘Ñuca churitaca, napashchari imatapash rurangachu’ yashpa chai runacunapajman cacharca.
7Ashtahuangarin, chai runacunaca, paipurami cashna ninajurca: ‘Paillami cai alpata japinga. Paita huañuchingapa shamuichi. Pai huañujpica, chai alpaca ñucanchipajmi canga’ ninajurcami.
8Chai churigutacarin japishpa huañuchishpami, uva chagramandaca llujchishpa shitarca.
9Chashna rurashcamandaca, chai alpayuj taitaca, ¿imatashi ruranga? Pai shamushpaca, chai runacunataca huañuchishpami, paipaj uva chagrataca shujcunaman cunga.
10Cai quilcashcataca ¿nachu quilca catishcanguichi? Chaipica:
‘Huasichijcuna na munashpa shitashca rumillatami,
huasichita callaringapa pirca tigranapi churana jatun rumi tucushca.
11Chaitaca, Jatun Diosmi chashna rurashca.
Chaita ricushpami, ñucanchipajca ninanda manllarishpa ricuna can’ nijunmi” nijurcami.
12Yarichishpa yachachishca shimicunahuan paicunata nijushcata yachashpami, Jesusta prezu japingapa munarca. Ashtahuangarin, gentecunata manllashpami, imata na rurai ushashpa saquinajurca.
Impuestota cuna cashcamanda(Mat. 22:15-22; Luc. 20:20-26)13Chai jipaca, imata nijpipash juchachingapa munashpami, huaquin fariseocunatapash, mandaj Herodesta catijcunatapash, Jesuspajman cacharca.
14Paicuna shamushpami cashna ninajurca:
“Yachachij, na llullashpa Can yachachijujtaca yachapanchimi. Candaca, pipash imata nita na ushangachu. Gentecuna imashna cajtapash na ricujunguichu. Ashtahuangarin Taita Dios munashcashna causachunmi, na llullashpa yachachijungui. Cesarman impuestota cunaca, ¿alichu, nachu ali imata? ¿Cunachu canchi, nachu cuna canchi imata?” nishpami tapunajurca.
15Ashtahuangarin Jesusca, mishqui shimi jayaj shungucuna cajta yachashpami:
“¿Imashpata Ñucata pandachingapa shamunguichi? Chai culquita apamuichi ricusha” nirca.
16Paicuna culquita apamujpimi:
“¿Pipaj ñavita, pipaj shutita, cai culquipica tiyajun?” nishpa Jesusca tapurca.
Shina tapujpimi:
“Cesarpajmi” ninajurca.
17Shina nijpimi Jesusca, paicunataca cashna nirca:
“Cesarpaj cajpica, Cesarmanllatami cuna canguichi. Ashtahuangarin, Taita Diospaj cajtaca, Taita Diosmanmi cuna canguichi” nirca.
Shina nijpimi, ninanda manllarishpa Paitaca ricunajurca.
“¿Huañushcacunaca causaringachu?” nishcamanda(Mat. 22:23-33; Luc. 20:27-40)18Chai jipami, saduceocunaca Jesuspajman shamurca. Paicunaca: “huañushcacunaca na causaringachu” ninajujmi carca. Paicunami cashna nishpa tapunajurca:
19“Yachachij, Moisesca, ñucanchimanmi cashna nishpa quilcarca: ‘Pipaj huauqui cashpapash, nara huahuacunata charishpallatami, huarmita saquishpa huañunga. Chai huarmitaca, cati huauqui cazarashpami, punda huauquipaj randi huahuacunata mirachinga’ nishcami.
20Canchis huauquipuracunami tiyarca. Punda huauqui cazarashpaca, huahuacunata nara charishpallatami huañurca.
21Shinallata, chai huarmitaca, cati huauquimi cazararca. Paipash, huahuacunata nara charishpallatami huañurca. Chaipaj jipa huauquipash, shinallatami huañurca.
22Chashnami, canchispura huauquicunaca, huahuacunata na charishpallata huañurca. Paicuna tucuilla huañushca jipaca, chai huarmipashmi huañurca.
23Huañushcacuna causarimui punllapica, canchispura huauquicunallata chai huarmihuan cazarashca cashcamandaca, ¿maijambajta huarmi canga?” nishpami tapunajurca.
24Shina tapujpimi Jesusca, paicunataca cashna nirca:
“¿Dios quilcachishca Shimitapash, Taita Dios ninan ushaita charijtapash na yachaimandachu, chashna pandaringuichi?
25Huañushcacuna causarimui punllapica, pipash na cazarangachu. Cazarachinapash na tiyangachu. Ashtahuangarin, jahua pachapi angelcunashnami canga.
26Ashtahuangarin, huañushcacuna causarinamandaca, zarza yura chaupimanda, Taita Dios imashna rimashcata, Moisés quilcashcataca, ¿nachu quilca catircanguichi? Chaipica: ‘Ñucami, Abrahambaj Taita Dios, Isaacpaj Taita Dios, Jacobpaj Taita Dios cani’ nijunmi.
27Taita Diosca, huañushcacunapaj Taita Diosca na canllu. Ashtahuangarin, causajcunapaj Taita Diosmi. Shina cashcamanda cangunaca, ninandapachami pandanajunguichi” nijurcami.
Ashtahuan yali ali mandashcamanda(Mat. 22:34-40)28Mandashca Shimita yachachijpuramanda shuj runa quimirishpami, imata tapujpipash aliguta tigrachij cajta yachashpa cashna tapurca:
“Tucui mandashca shimicunamandaca, ¿maijanda ashtahuan yali ali?” nircami.
29Shina tapujpimi Jesusca, cashna nishpa tigrachirca:
“Mandashca shimicunamanda tucuitapash ashtahuan yalica, cashnami nijun: ‘Uyaichi, Israelcuna, Jatun Diosca, ñucanchi Taita Diosmi, shujlla Jatun Diosmi tiyan.
30Chaimandami, cambaj Jatun Taita Diostaca, cambaj tucui shunguhuan, cambaj tucui almahuan, cambaj tucui yuyaihuan, cambaj tucui ushaihuambash juyangui’ nijun. Cai mandashcami tucuita yali tiyajun.
31Chaipaj cati mandashca shimipash chashnallatami nijun: ‘Imashna can juyarinshnallata, cambaj cumbatapash juyangui’ nijunmi. Cai ishcai mandashca shimicunata yali ashtahuan shuj jatunga na tiyanllu” nijurcami.
32Shina nijpimi, mandashca shimita yachachij runaca cashna nijurca:
“Canga alitami ningui, Yachachij. Can nishcashnapachami, Taita Diosca shujlla tiyapan. Ashtahuan shuj diosca, na tiyanllu.
33Taita Diostaca, tucui shunguhuan, tucui yuyaihuan, tucui almahuan, tucui ushaihuanmi juyana cashcani. Imashna ñuca juyarinshnallatami ñuca cumbatapash juyana cashcani. Shina causanami, Taita Diosman animalcunata carashpa tucuilla rupachinatapash, imaguta carashpa Diosman cunatapash ashtahuan yali ali capashca” nijurcami.
34Paipaj yachashcata ali tigrachinda ricushpami, Jesusca paitaca cashna nirca:
“Taita Dios mandajuj llactamandaca, na carupichu cangui” nircami.
Chashna nijpimi, pipash na ashtahuan tapui usharca.
“Cristoca, ¿pipaj churishi?” ninajushcami(Mat. 22:41-46; Luc. 20:41-44)35Diospaj huasipi yachachijushpami Jesusca, cashna nirca:
“Mandashca Shimita yachachijcunaca, ¿imashpata: ‘Cristoca, ñaupa taita Davidpaj churimi’ ninajun?
36Davidllatami, Diospaj jucha illaj Espíritu yarichijpi cashna nijurca:
Jatun Diosca, ñucata Mandajtami:
‘Canga, ñuca ali maquiman tiyajuilla.
Canda fiñajcunata cambaj chaquihuan saruchun,
ñuca churangacaman tiyajuilla’ nijurcami.
37Davidllatami Cristotaca: ‘Ñucata Mandajmi cangui’ nijushca. Shina cajpica ¿imashpata paipaj churi cangayari?” nijurcami.
Shina nijpimi, ashtaca gentecuna uyangapa munanajurca.
Mandashca Shimita yachachijcunatami, Jesusca na alicachishpa rimashca(Mat. 23:1-36; Luc. 11:37-54; 20:45-47)38Jesús yachachijushpami, cashna nijurca:
“Mandashca Shimita yachachijcunataca, napacha catinachu canguichi. Paicunaca, chaqui pundacaman churajunata churajushpami, cushijushpa purinajun. Plazacunapipash: ‘Alillachu capangui’ ninajuchunmi munanajun.
39Sinagogacunapipash, ñaupajpimi tiyarinajun. Shinallata, chishi micuicunaman rishpapash, ñaupajpimi tiyarinajun.
40Sapalla huarmicunapaj huasicunapi ima tiyashcatapash quichushpami, paicunaca alipi ricuringapa, unai unaita Diosta mañaj tucunajun. Chashna cashcamanda paicunaca, ashtahuan ninandapachami llaquichi tucunga” nircami.
Sapalla mamagu Diosman carashcamanda(Luc. 21:1-4)41Jesusca, Diospaj huasipi, ofrendata churana cajón chimbapurapi tiyajushpami, gentecuna culquita cajonbi churanajujta ricujurca. Charijcunaca ashtacatami churanajurca.
42Shinallata, imagutapash na charij, shuj sapalla mamagu shamushpaca, ishcai uchilla culquigutami churarca. Chaica, cuadrante nishca shujlla culquimi carca.
43Shinamandami Jesusca, Paipaj yachajujcunata cayashpa cashna nijurca:
“Na llullashpami cangunataca cashna nini: Cai sapalla mamaguca, ninan huajcha cashpapash, tucuicunata yalimi cajonbica churarca.
44Tucui chai gentecunaca, puchutallami churanajurca. Ashtahuangarin, ninan huajcha cai sapalla huarmiguca, micunaguta randingapa tucui ima charishcatapash, tucuillami churarca” nijurcami.
Who We AreWhat We EelieveWhat We Do
2025 by iamachristian.org,Inc All rights reserved.
