PROVERBIOS 13 - Quichua Imbabura 2016

1Alipacha yachajushca churica, taita tacurishpa yachachishcataca uyanmi.

Ashtahuangarin, na cazuj churica, imata yachachishcatapash na uyanllu.

2Runacunaca, alitalla rimashpaca, alitallatami japinga.

Ashtahuangarin, yachashpata na cazujcunaca, llaquitami apanga.

3Yangata rimanata jarcarij runaca, paipaj almatami quishpichin.

Ashtahuangarin, shimi cacharishcata rimaj runataca, jatun llaquimi japinga.

4Imata rurangapapash na munaj runaca, imata munashpapash napacha japingachu.

Ashtahuangarin, imata cashpapash ucha ruraj runaca, imata munashcatapash, tucuitami japinga.

5Alitalla ruraj runaca, napacha llullashpa rimanllu.

Ashtahuangarin, Diosta na cazuj runaca, pipash na ricunayachijpimi causanga.

6Alitalla ruraj runataca, chai alita rurashcami huacaichinga.

Ashtahuangarin, juchata ruraj runataca, paipaj na alita rurashcami llaquichinga.

7Huaquingunaca imata na charishpapash, charijcunashnallami purinajun.

Huaquingunaca charij cashpapash, imagutapash na charijcunashnallami purinajun.

8Charij runataca, culquimandami huañuchingapa munan.

Ashtahuangarin huajcha runataca, pipash na huañuchingachu.

9Alitalla rurashpa causajcunaca, juyailla punchayachijuj michashnami.

Ashtahuangarin, Diosta na cazujcunaca, na punchayachingachu.

10Jariyashpa causajcunaca, fiñanajuitami mascan.

Ashtahuangarin yachachishcata cazujcunami, aliguta yachajushca causanajun.

11Na alita rurashpa charishca culquica tucuringallami.

Ashtahuangarin, imatapash uchalla rurashpa causajcunaca, asha ashami mirachinga.

12Imata shuyajushcapash na ucha pactashpaca, ninandami llaquichin.

Ashtahuangarin uchalla pactashpaca, causaita cuj yurashnami cushichin.

13Mandashcacunata na cazuj runaca, chingaimanmi ringa.

Ashtahuangarin mandashcata cazuj runaca, tucuitami charinga.

14Alipacha yachajushca runa yachachishcacunaca, causaita caraj yacushnami.

Chaicunami, tugllapi huashajushpa huañunamandaca jarcanga.

15Aliguta yarishpa causanaca, jatun cushijuimi.

Ashtahuangarin na cazushpa causajcunaca, llaquitami apanga.

16Aliguta yarishpa causaj runaca, imata cashpapash aliguta yarishpami rurajun.

Ashtahuangarin shinlli shungu runaca, na alitalla rurashpami causajun.

17Llullashpa villaj runaca, paillatami llaquita apanga.

Ashtahuangarin na llullashpa villaj runaca, ali causaitami charinga.

18Ali yuyaicunata yangapi churaj runaca, pingai tucushpa, huajchami causanga.

Ashtahuangarin ali yuyaicunata chasquishpa pactachijcunaca, alicachi tucushpami causanga.

19Imaguta munajushcapash pactajpica, ninandami cushijunga.

Ashtahuangarin juizu illaj runaca, na alita ruranataca napacha saquingapa munanllu.

20Alipacha yachajushca runacunahuan tandanajushpaca, alipachami yachajunga.

Ashtahuangarin, juizu illajcunahuan tandanajushpaca, ninandami llaquichi tucunga.

21Juchata rurajcunataca, catiriyashpami llaquicuna japinga.

Ashtahuangarin alita rurashpa causajcunami, ima alitapash japinga.

22Alita rurashpa causajcunaca,

paipaj huahuacunapaj huahuacunamambashmi, imatallapash saquinga.

Ashtahuangarin juchata rurajcuna charishcataca, shuj alita ruraj runami japinga.

23Huajchacunapaj tarpushca pambapica, ninandami fucunga.

Ashtahuangarin, aliguta ricushpa mandajcuna illajpimi, imagupash illaj causanajun.

24Taitacuna, huahuacunata yangata viñachishpaca, na juyashcatami ricuchin.

Ashtahuangarin, juyaj taitacunaca, huahuamandami astishpa aliguta viñachin.

25Alitalla ruraj runaca, na munajtami micushpa causan.

Ashtahuangarin, Diosta na cazujcunaca, micunapash illajmi causan.