1Beeri shuti runapaj churi Oseas runaman, Mandaj Dios villashca shimicunami. Caitaca, Uzías, Jotam, Acaz, Ezequías shuti jatun mandajcuna, Judá llactata mandajui punllacunapimi villajurca. Chai punllacunallatami Israel llactataca, Joás shuti runapaj churi Jeroboam runa mandajurca.
2Mandaj Diosca, Oseas villashpa callarichunmi, Paipacha rimarca. Mandaj Diosca, Oseastaca cashnami nirca: “Culquimanda huainayaj huarmihuan cazarashpa, chai huarmihuan huahuacunata charigri. Cai llactapi causajcunaca, Mandaj Diosmanda anchurishpami jatun na alita rurashpa causanajun” nircami.
3Shina nijpimi Oseas runaca, Diblaim shuti runapaj ushi Gomer shuti huarmihuan cazaragrirca. Chai huarmica, vijsayu tucushpami shuj jari huahuata ungurca.
4Mandaj Diosca cashnami nirca: “Chai huahuataca, Jezreel shutita shutichingui. Jezreel shuti pueblopi causajcunata huañuchishcamandami, cunanmanda asha punlla jipaca, Jehú shuti runapaj miraicunatapash llaquichisha. Israelcunata mandanatapashmi tucuchisha.
5Chai punllallatami, Israelcunapaj macanajuna ushaitapash, Jezreel shuti pugru pambapi tucuchisha” nircami.
6Chai huarmica cutin vijsayu tucushpami, shuj huarmi huahuata ungurca. Chaimandami Taita Diosca, cashna nirca: “Chai huahuataca, Lo-ruhama shutita shutichingui. Israelcunataca na llaquishpami, na perdonashpa tucuillata tucuchisha.
7Ashtahuangarin, Judá llactapi causajcunata llaquishpami, Mandaj Taita Dios Ñucallata quishpichisha. Paicunataca, arcohuan, espadahuan, jatun macanajuihuan, caballopi tiyarishca macanajuj runacunahuanga na quishpichishachu” nircami.
8Lo-ruhama shuti huahuata, chuchumanda anchuchishca jipami, Gomer shuti huarmica cutin vijsayu tucushpa, shuj jari huahuata ungurca.
9Mandaj Diosca, Oseas runataca cashnami nirca: “Chai huahuataca, Lo-ammi shutita shutichingui. Cangunaca, na Ñuca agllashcacunachu canguichi, Ñucapash na cangunapaj Taita Dios cashachu” nircami.
10Shuj punllami Israelcunaca,
mama cucha manñapi t'iyu alpashna,
na tupui ushanalla, na yupai ushanalla ashtacapacha canga.
Paicunaca: “Na ñuca agllashcacunachu canguichi” nishca pushtupillatami:
“Causajuj Taita Diospaj huahuacunami canguichi” ni tucunajunga.
11Judapaj miraicunapash, Israelcunapash tandanajushpami, shujlla mandajta agllanajunga.
Tucui llactacunamandami Jerusalenman tigranajunga,
Jezreel pueblopica jatun cushijuimi canga.
Who We AreWhat We EelieveWhat We Do
2025 by iamachristian.org,Inc All rights reserved.
