ÉXODO 40 - Quichua Imbabura 2016

Moisesca, Diospaj Jatun carpatami shayachishca

1Chai jipami Mandaj Diosca, Moisesman cashna nijurca:

2“Callari quillapaj, callari punllapimi, Diospaj Jatun carpata shayachinajuchun mandana cangui. Chaica, Ñucahuan tuparina Jatun carpami.

3Chai jipaca, mandashca shimicunata alichishca cajonda chai Jatun carpa ucupi churashpa, jatun fachahuan huarcushpa jarcangui.

4Mezataca, ucuman churashpa, chaipi imatalla churanacunatapash aliguta churangui. Shinallata, candelerotapash ucuman churashpa, lamparacunapi michata japichingui.

5Inciensota cushnichina curi altartapash, mandashca shimicunata alichishca cajón ñaupajpi churashpa, jatun carpaman yaicuna pungu ñaupajpi cortinata huarcungui.

6Chai jipaca, animalcunata cushpa tucuillata rupachina altartapash, Ñucahuan tuparina Jatun carpaman yaicuna ñaupajpi churangui.

7Chaipaj catica jatun pilundaca, Ñucahuan tuparina jatun carpahuan, altarhuan chaupipi churashpa, chaipica yacuta jundachingui.

8Ña tucuchingapaca, patio muyunditapash aliguta jarcangui. Shinallata, patioman yaicuna pungupipash cortinata huarcungui.

9Shinallata, Diospaj Jatun carpapipash, chaipi tucui imalla tiyashcacunapipash, Diospajlla cachun shicanyachina aceiteta talishpa javingui. Jatun carpataca, chaipi tucui imalla tiyashcacunandi, Ñucapajlla cachun shicanyachijpimi, Ñucapajlla canga.

10Shinallata, animalcunata cushpa tucuillata rupachina altartapash, chaipi tucui imalla tiyashcacunandi, aceiteta talishpa javingui. Altartaca, Ñucapajlla cachun shicanyachijpimi, Ñucapajlla canga.

11Shinallata jatun pilundapash, pilunda churana bazatapash aceiteta talishpa, Ñucapajlla cachun shicanyachingui.

12Chai jipaca Aarondapash, paipaj churicunatapash, Ñucahuan tuparina Jatun carpa punguman pushamushpami, yacuhuan armachina cangui.

13Aarondaca, Ñucapajlla shicanyachishca churajunata churachishpa, Ñucapajlla cachun aceiteta talishpa javingui. Chashna rurajpimi, Ñucapajlla shicanyachishca sacerdote canga.

14Chaipaj jipaca, paipaj churicunatapash cayashpa, túnica churajunacunata churachingui.

15Paicunapash, Ñucapajta ruraj sacerdotecuna cachun, paicunapaj taitata aceiteta talishpa javishcashnallata javingui. Shina rurajpimi, paicunapaj miraicunapash, tucui causaipi, Ñucapajta ruraj sacerdotecuna canga” nijurcami.

16Moisesca, Mandaj Dios tucuita imashna mandashcashnami, chashnatapacha rurashpa pactachirca.

17Chashnami, cati huatapaj, callari quilla punda punllapica, Diospaj Jatun carpata shayachishpa callarirca.

18Moisesca, Diospaj Jatun carpata shayachinajuchunmi mandarca. Chai carpapaj bazacunata churashpa, tablacunata churashpa, jatun caspicunatapash churachishpami, pilarcunatapash shayachirca.

19Pilarcunata shayachishca jahuapimi, carpata jahualla churarca. Chai carpa jahuapipash, Mandaj Dios, Moisesta imashna mandashcashnami, ashtahuan jahualla jatashpa quilparca.

20Shinallata, mandashca shimicunata quilcashcacunata japishpami, arca ucupi churarca. Cajonda huanduna vara caspicunatapash, arcapi ali churachishpami, tapatapash arca jahuapi churarca.

21Chai jipami cajondaca, jatun carpa ucupi churashpa jatun fachata huarcurca. Mandashca shimicunata alichishca cajondaca, Mandaj Dios imashna Moisesta mandashcashnami rurarca.

22Mezataca, Dioshuan tuparina Jatun carpa ucupimi churarca. Jatun fachata huarcushca, canllamanmi churarca.

23Chai mezapimi, Mandaj Dios imashna Moisesta mandashcashna, tandacunataca aliguta churarca.

24Candelerotapash, Dioshuan tuparina Jatun carpa ucupillatami, meza ñaupajpi, cortinata huarcushca uraman churarca.

25Lamparacunataca, Mandaj Diospaj ñaupajpimi, Mandaj Dios imashna Moisesta mandashcashna michata japichirca.

26Shinallata curi altartapash, Dioshuan tuparina Jatun carpapillatami, Jatun fachata huarcushca ñaupajpi churarca.

27Chai altar jahuapimi, Mandaj Dios imashna Moisesta mandashcashna, mishquilla ashnajun inciensota cushnichijurca.

28Shinallata carpaman yaicunapipashmi, cortinata huarcurca.

29Diosman animalcunata cushpa tucuillata rupachina altartapash, Dioshuan tuparina jatun carpaman yaicuna ñaupajpimi churarca. Shina churashpami, Diosman cushpa tucuillata rupachina animaltapash, Diosman imata carashcatapash, Mandaj Dios imashna Moisesta mandashcashna rurajurca.

30Jatun pilundapash, Dioshuan tuparina jatun carpahuan, altarhuan chaupipi churashpami, chai pilumbica maillangapa yacuta jundachirca.

31Shinallata, Moisespash, Aaronbash, Aaronbaj churicunapashmi, chai yacupi paicunapaj maquicunata, chaquicunata maillanajurca.

32Dioshuan tuparina jatun carpaman yaicungapa, shinallata, altarman chayangapami, Mandaj Dios imashna Moisesta mandashcashna maillanajurca.

33Ña tucuita rurashpa tucuchingapaca, jatun carpapaj patio muyunditapash, altarpaj muyunditapashmi jarcashpa, patioman yaicuna pungupi cortinata huarcurca. Chashnami, Moisesca, tucuita rurashpa pactachirca.

Diospaj Jatun carpa jahuaman, fuyu shamushcamanda(Núm. 9:15-23)

34Chai jipami, Dioshuan tuparina Jatun carpataca fuyu quilparca. Mandaj Diospaj punchapamba ninan ushaipashmi chai jatun carpapi jundarca.

35Dioshuan tuparina Jatun carpa jahuapica, fuyu junda cajpi, Mandaj Diospaj ninan ushaipash punchapamba chai carpapi junda cajpimi, Moisesca chaiman yaicuitaca na usharca.

36Fuyuca, jatun carpa jahuamanda ña vichai jatarijpimi, Israelcunaca asha asha ri callarinajurca.

37Fuyu na vichai jatarijpica, fuyu jataringacamanmi, na ri ushashpa shuyana carca.

38Shinami punllapica, Mandaj Diospaj fuyuca, jatun carpa jahuapi carca. Shinallata, tutapica, ninami chai jahuapi ricurijurca. Tucui Israel gentecuna rinajushpaca, chaitami ricunajurca.