2 REYES 18 - Quichua Imbabura 2016

Ezequías mandajushcamanda(2 Crón. 29:1-2)

1Ela shuti runapaj churi Oseas runaca, quimsa huatata Israel llactata ña mandajujpimi, Acaz shuti runapaj churi Ezequiasca, Judá llactata mandai callarirca.

2Ezequiasca, ishcai chunga picha huatata charishpa, mandai callarishpaca, ishcai chunga iscun huatatami, Jerusalenbi mandajurca. Paipaj mamaca, Zacariaspaj ushi Abi shutimi carca.

3Ezequiasca, Mandaj Diospaj ñaupajpica, paipaj ñaupa taita David tucui alita rurashpa causashcashnami alitalla rurashpa causajurca.

4Paimi, lomacunapi tiyaj altarcunata anchuchishpa, imamambash rijchaj dioscunatapash faquirca. Asera shuti huarmi diosman rijchajcunatapash faquishpami, Moisés rurachishca bronce culebratapash faquirca. Chai punllacamanmi Israelcunaca, culebraman inciensota cushnichishpa causanajurca. Chai culebrataca, Nehustán nishpami shutichishca carca.

5Ezequiasca, Israelcunata Mandaj Taita Diosta yariashpami causajurca. Judá llactata tucui jatun mandajpuracunamandaca, paipaj pundalla mandajcunapash, paipaj jipaman mandajcunapash, paishnaca pipash na tiyarcachu.

6Ezequiasca, Mandaj Diosmandaca na anchurishpami catijurca. Paica, Moisesman, Mandaj Dios mandashpa cushcata pactachishpami causajurca.

7Mandaj Diosca, Ezequías runahuan cajpimi, maiman rishpapash, tucuipi ali llujshijurca. Chaimandami paica, Asiria llactata jatun mandajtaca na cazushpa jatarirca.

8Shinallata filisteocunatapash, Gaza shuti pueblocaman, chai pueblo mujungaman catishpami huañuchirca. Chapashpa shayana torrecunamanda callarishpaca, jatun pircahuan jarcashca pueblocunacamanmi catishpa huañuchirca.

Samaria pueblota quichushcamanda

9Judá llactata jatun mandaj Ezequiasca, ña chuscu huatata mandajujpimi, Ela shuti runapaj churi Oseas runaca, canchis huatata Israel llactata mandajurca. Chai huatapimi, Asiria llactata jatun mandaj Salmanasar shuti runaca, Samaria puebloman vichai shamushpa, chai pueblota chaupipi churarca.

10Chaipi cashpami, quimsa huata jipaca, Samaria pueblota quichurca. Ezequiasca, sucta huatata mandajujpi, Oseas runapash, Israel llactataca iscun huatata mandajujpimi, Samaria pueblotaca quichurca.

11Asiria llactata jatun mandajca, Israelcunataca Asiria llactaman prezu apashpami, Halah shuti pueblopi, Gozán shuti jatun yacu manñapi tiyaj Habor shuti llactapi causachun churarca. Shinallata, Media shuti llactapi tiyaj pueblocunapipashmi churarca.

12Paicunata Mandaj Taita Dios rimashcacunatapash na cazushpa, Dioshuan ari nishcatapash yangapi churashcamandami, chashna tucurca. Mandaj Diospajta ruraj Moisés, tucui mandashcacunatapash na uyashpami, chaicunataca na pactachinajurca.

Judá llactaman, Senaquerib shuti runa yaicushcamanda(2 Crón. 32:1-19; Isa. 36:1-22)

13Ezequías runaca, chunga chuscu huatata mandajujpimi, Asiria llactata jatun mandaj Senaquerib shuti runaca, Judá llactapi tiyaj muyundi pircashca pueblocunapi causajcunahuan macanajungapa vichai shamushpa, chai pueblocunataca quichurca.

14Chaimandami, Judá llactata jatun mandaj Ezequiasca, Asiria llactata jatun mandajman cashna nichun, Laquis shuti puebloman cacharca: “Ñucaca, juchatami rurashcani. Cunanga caimanda ripailla, can imata mandashcata rurapashallami” nichunmi cacharca. Shina nijpimi, Asiria llactata jatun mandajca, Judá llactata jatun mandaj Ezequiastaca, ishcai patsaj chuscu quintalta pezaj culquita, ishcai chunga quintal chaupita pezaj curita cuchun mandarca.

15Chashna mañajpimi Ezequiasca, Mandaj Diospaj huasipi tucui tiyashca culquitapash, mandana huasipi alichishca culquitapash curca.

16Shinamandami Ezequiasca, Mandaj Diospaj huasi pungumanda curitapash, chai punguta churashca muyundi caspicunamanda jahualla churashca curitapash anchuchirca. Chaicunataca, jatun mandaj Ezequiasllatami, curihuan quilpashca carca. Chaita llujchishpami, Asiria llactata jatun mandajman curca.

17Chai jipami, Asiria llactata jatun mandajca, Tartán, Rabsaris, Rabsaces shuti mandajcunataca, jatun mandaj Ezequías, macanajuchun cachamurca. Shina cajpimi, Laquis shuti pueblomanda, ashtaca macanajuj runacunandi, Jerusalenman vichai shamunajurca. Ña chayamushpaca, janajman tiyajuj, yacuta tandachingapa apana larca manñapimi, carpacunata shayachishpa tiyanajurca. Chaica, Tajshajcunapaj alpaman rina ñambimi carca.

18Chaipi cashpami, jatun mandaj Ezequiasta cayanajurca. Paicunahuan tuparingapaca, Hilcías shuti runapaj churi mayordomo Eliaquim shuti runapash, Sebna shuti quilcaj runapash, Joa shuti runapaj churi Asaf shuti runapashmi llujshirca. Joa shuti runaca, jatun mandajpaj randi parlajmi carca.

19Paicunatami Rabsaces shuti mandajca, cashna nijurca:

“Cunanga, Ezequiastaca cashna nigrichi. Asiria llactata alipacha jatun mandajca, cashnami nin: ‘¿Imata yashpata, shinlli tucushpa na manllajungui?

20(Ashtahuangarin yangatami) cashna nirijungui: Macanajungapaca, ali yuyaitapash, ushaitapash charinimi yajunguimi. Ashtahuangarin ¿imata yarishpata, ñucataca na cazushpa shayarijungui?

21Canga cai faquirinalla sucus taunashna, Egipto llactatami yariashpa causajungui. Maijambash paipi taunarijpica, jamzi caspi maquipi yalijta yaicushpa chugrichijnallami, Egipto llactata jatun mandaj Faraonga, tucui paita yariashpa causajcunapajca canga.

22Cangunaca: Ñucanchita Mandaj Taita Diostami yariashpa causanajunchi ninguichipashchari. ¿Nachu lomacunapi tiyaj huasicunata, altarcunataca, Ezequiasllata anchuchirca? Chashna anchuchishpaca, ¿nachu Judá llactapi causajcunata, Jerusalenbi causajcunataca: Jerusalenbi tiyaj cai altar ñaupajpimi, Diostaca ninanda alicachina canguichi nishpa mandarca?

23Cunanga, Asiria llactata jatun mandajman caballopi tiyarij macanajuj runacunata can cujpica, ñucapash ishcai huaranga caballocunata canman cushallami ninimi.

24Egiptopi causajcunata, paicunapaj carretacunata, caballopi tiyarishpa macanajuj runacunata yariashpa causajushpapash, ñucata mandajpaj macanajuj runacunata mandajpuramanda, ashtahuan cati mandajhuambash, ¿macanajui ushasha yanguichu?

25¿Cunanga ñucaca, Mandaj Dios na cachamujpitachu, cai llactata tucuchingapa shamushcani? Mandaj Diosllatami ñucataca: Chai llactaman vichai rishpa tucuchigri nihuarca’ ninmi nigrichi” nijurcami.

26Shina nijpimi, Hilcías shuti runapaj churi Eliaquim shuti runapash, Sebna shuti, Joa shuti runacunapash, Rabsaces shuti mandajtaca cashna ninajurca:

“Cambajta ruraj ñucanchitaca, arameo shimipi rimayari. Ñucanchica, chai rimaita yachapanchimi. Ashtahuangarin ñucanchihuanga, pirca jahuamanda gentecuna uyajtaca, ama Judá llacta shimipi rimapaichu” ninajurcami.

27Shina ninajujpimi Rabsaces shuti mandajca, cashna nirca:

“¿Ñucata mandajca, cai shimicunataca canman, canda mandajmanllachu villachun cachamuhuashca? ¿Nachu cai jatun pirca jahuapi shayanajuj gentecunamambash, villachun cachamuhuashca? Paicunapash, cangunahuanllata paicuna mapayachishcata micungapa, paicuna yacu ishpashcata ufiangapami shuyanajun” nircami.

28Shina nishpallami Rabsaces shuti mandajca, ali shayarishpa, Judá llacta rimaipi shinllita caparishpa, cashna nijurca:

“Alipacha jatun mandaj rimashcata uyaichi. Paica, Asiria llactata jatun mandajmi.

29Pai jatun mandajca, cashnami nin: ‘Ezequías cangunata umachijuchunga, na saquinachu canguichi. Paica, ñuca maquimanda quishpichitaca na ushangachu.

30Ezequiasca, Mandaj Diosta canguna yariashpa causachunga, cashnami nijunga: Mandaj Diosca, ñucanchitaca cacharichingapachami. Cai pueblotapash, Asiria llactata jatun mandajpaj maquipica, na churangachu ningami.

31Ezequiastaca, na uyanachu canguichi. Asiria llactata jatun mandajca, cashnami nin: Na macanajushpa causangapa, ari ningapa, ñucapajman llujshimuichi. Shina rurashpaca, tucuicunami cangunapaj uva chagramanda, higo chagramanda micunguichi. Yacutapash, cangunapaj pugyumandami ufianguichi.

32Cangunapaj cai llactapishnallata ali granocunapash, vinopash, tandapash, uva chagracunapash tiyaj llactaman ñuca pushaj shamungacamanmi, chashna causanguichi. Chaipica olivopash, aceitepash, balun mishquipash tiyajpimi, yarjaimandaca na huañunguichi. Ezequiastaca, na uyanachu canguichi. Paica umashpallami, Mandaj Diosmi quishpichinga nijun.

33¿Caishuj llactacunapaj dioscunaca, maijambash, paipaj llactataca, Asiria llactata jatun mandajpaj maquimanda quishpichi ushashcachu?

34¿Hamat shuti, Arfad shuti pueblocunapaj diosca maipitayari? ¿Sefarvaim, Hena, Iva shuti pueblocunapaj diospash maipitayari? ¿Chai dioscunaca, Samaria pueblota ñuca maquimanda quishpichi usharcachu?

35Cai llactacunapi tiyaj dioscunamandaca, paicunapaj llactata ñuca maquimanda quishpichi ushaj diosca, ¿maijanllapash tiyanllu? ¿Cangunata Mandaj Diosrachu Jerusalendaca, ñuca maquimanda quishpichi ushanga?’ ninmi” nijurcami.

36Chashna nijujpipash gentecunaca, imatapash na nishpa, upalla uyanajurcallami. Jatun mandaj Ezequiasmi, paicunataca: “Imatapash na tigrachinachu canguichi” nishpa mandashca carca.

37Chai jipami, Hilcías runapaj churi mayordomo Eliaquim runapash, Sebna shuti quilcaj runapash, Asaf shuti runapaj churi, Joa shuti runapash, paicuna churajushcata liquishpa, Ezequiaspajman shamurca. Paipajman shamushpami, Rabsaces shuti mandaj imatalla nishcata villanajurca. Joa shuti runaca, jatun mandajpaj randi parlajmi carca.