1Jatun Dioslla,
Canmi ñucanchitaca huacaichishpa charishcangui.
Mirai miraicamanmi huacaichishpa charishcangui.
2Urcucunatapash nara rurashpallata,
cai alpa pachatapash nara churashpallatami,
Canga causaita causaicaman causajuj Taita Dios capangui.
3Huañuna aichayuj runataca,
Canmi: “Alpamanllata tigraichi” nishpa, alpamanllata tigrachun saquircangui.
4Cambaj ricuipica, huaranga huatacunaca caina punlla yalishcashnami.
Tutapi ashatalla rijchariaj cashcashnallami.
5Runataca, ninanda jatarijuj yacu apajshnami muscuipishna chingachingui.
Paicunaca, tutamandata viñashca jihuashnami.
6Jihuaca, tutamanda viñashpa sisashpaca, chishipaca fitijpi chaquinllami.
7Can ninandapacha fiñarishpami, ñucanchitaca tucuchingui.
Can ninanda fiñarijpimi, ñucanchica ninanda manllarinchi.
8Ñucanchi na alita rurashcataca, Canmi yachapangui.
Ñucanchi pandashcatapash, Canmi ricujupangui.
9Can ninanda fiñajpimi, ñucanchi causaica tucurishpa catijun.
Ñucanchi huatacunaca, imatapash ashatalla yarishcashnami tucurin.
10Ñucanchi causaica, canchis chunga huatacamanllami.
Ninan shinllicunallami, pusaj chunga huatata causanga.
Ninan shinlli cashpapash, llaquita apashpallami causanga.
Huatacunaca ñapash yalijpimi, calpashpa rijshna chinganchi.
11Cambaj ushaihuan ninanda fiñarishcataca, ¿pita yachai ushanga?
Can ninanda fiñarishcataca, ¿pita yachai ushanga?
12Shina cashcamanda, aliguta causangapa yachachihuayari.
Aliguta yachajushpa causangapa yachachihuayari.
13Mandaj Dioslla,
¿ima punllata ñucanchita ricugringuiyari?
Cambajta rurajcunahuanga, ali tucupayari.
14Tutamandata, Cambaj juyaihuan ricuhuayari.
Tucui ñucanchi causaipimi, cushijushpa candapashun.
15Ñucanchitaca, mashna punllacunata llaquichishcashnallata cushichihuayari.
Chai tucui huatacunatamari, llaquita apashpalla causarcanchi.
16Cambajta rurajcunaman, Can rurashcata ricuchipayari.
Paicunapaj huahuacunaca, Cambaj ninan ushaita ricushpami ali canman.
17Ñucanchita Mandaj Taita Dioslla,
Cambaj ninan juyaita ñucanchiman ricuchihuayari.
Ñucanchi imatalla rurashcata, bendiciapailla.
Ari, ñucanchi imatalla rurashcata, bendiciapayari.
Who We AreWhat We EelieveWhat We Do
2025 by iamachristian.org,Inc All rights reserved.
