ESDRAS 3 - Quichua Imbabura 2016

Altarta cutin rurashpa, Diosta mañashpa callarishcamanda

1Israelcuna punda causanajushca pueblocunamanllata, cutin tigramushpa causai callarishcapash, ña canchis quilla tucujpimi, gentecunaca shujllashnalla Jerusalenbi tandanajumurca.

2Shina tandanajushpami, Josadac shuti runapaj churi Jesúa shuti sacerdotepash, paipaj cumba sacerdotecunandi, Salatiel shuti runapaj churi Zorobabel shuti runapash, paipaj cumba sacerdotecunandi, Israelcunapaj Taita Diospaj altarta rurangapa callarinajurca. Chai altartaca, Taita Diospajta ruraj Moisés mandashpa quilcashcapi nijujshnami, animalcunata Diosman cushpa tucuillata rupachingapa ruranajurca.

3Chai llactacunapi causaj gentecunata manllashpami, chai altartaca punda tiyajushca pushtupillata shayachinajurca. Chai altarpimi, Mandaj Diosman animalcunata cushpa, tutamandapash, chishipash tucuillata rupachinajurca.

4Mandashpa quilcashcapi nijujshnami, malquicunahuan chugllacunata rurashpa, jatun cushijuita ruranajurca. Shinallata, imashna rurachun mandashcashnami, animalcunata Diosman cushpa, punllandi tucuillata rupachinajurca. Imata rurana cashpapash, chai punllami ruranajurca.

5Chashna rurashca jipapashmi, punllandi animalcunata Diosman cushpa tucuillata rupachinajurca. Llullu luna punllacunapipash, Mandaj Diosta yarina jatun cushijui punllacunapipashmi, chashna ruranajurca. Diosman cushpa animalta huañuchinatapash, paicunapaj munai apamushca ofrendatapashmi, Mandaj Diosman caranajurca.

6Canchis quillapaj callari punllamandapachami, Mandaj Diosman animalcunata cushpa tucuillata rupachi callarinajurca. Ashtahuangarin Mandaj Diospaj huasi callari rumicunataca, nara churashcachu carca.

7Huasichijcunaman, caspita llagllashpa rurajcunamanmi, culquita cunajurca. Shinallata, Sidón shuti, Tiro shuti pueblocunapi causajcunamambash, Líbano shuti urcumanda cedro caspicunata, mama cuchata yalimushpa, Jope shuti puebloman apamuchunmi, micunata, ufianacunata, aceiteta cunajurca. Chai caspicunata apamuchunga, Persia llactata jatun mandaj Ciro shuti runa munashcashnami ruranajurca.

Diospaj huasi callari rumicunata churashcamanda

8Jerusalenbi, Diospaj huasiman tigramushcapash, ña ishcai huatami tucurca. Chai ishcai huatapaj ishcai quillapimi, Salatiel shuti runapaj churi Zorobabel shuti runapash, Josadac shuti runapaj churi Jesúa shuti runapash, paipaj caishuj huauquicunapash, sacerdotecunapash, levitacunapash, prezu apai tucushcamanda Jerusalenman tucuilla tigramujcunapash, Mandaj Diospaj huasita shayachi callarinajurca. Chai huasita shayachijcunata ricushpa imatalla rurachinajuchunga, ishcai chunga huata yalita charij levitacunatami churanajurca.

9Jesúa shuti runatapash, paipaj churicunatapash, paipaj huauquicunatapashmi churanajurca. Shinallata, Cadmiel shuti runapash, paipaj churicunapash, Judapaj miraicunapash shujllashnalla tandanajushpami, Taita Diospaj huasita shayachijcunata ricushpa imatalla rurachingapa rinajurca. Paicunahuanga, Henadad shuti runapash, paipaj churicunapash, paicunapaj huauqui levitacunapashmi rinajurca.

10Mandaj Diospaj huasita shayachijcuna callari rumicunata churanajujpimi, sacerdotecunataca paicunapaj churajunata churajushpa, trompetata huacachinajuchun churanajurca. Shinallata, Asaf shuti levitapaj mirai levitacunatapash, Israelcunata jatun mandaj David mandashcashnami, platillocunata huactashpa, Mandaj Diosta alicachinajuchun churanajurca.

11Mandaj Diosta pashi nishpa alicachishpa candajcunaca, cashnami ninajurca:

“Paica alimari, Paica Israelcunataca tucui causaipimi llaquijun” nishpami candanajurca.

Mandaj Diospaj huasi callari rumicunata churanajushpami, tucui gentecuna ninanda cushijushpa caparishpa, Mandaj Diosta alicachinajurca.

12Ashtaca sacerdotecuna, levitacuna, ñaupa taitacunapaj huasi ucupuracunata mandajcuna, Diospaj huasi shayajujta punda ricushca rucucunami, Diospaj huasi callari rumicunata churanajujta ricushpaca, caparishpa huacanajurca. Ashtahuangarin shujcunapash, ashtacacunami ninanda cushijushpa caparinajurca.

13Shinamandami, ninanda cushijushpa caparinajujtapash, caparishpa huacanajujtapash, gentecunaca na yachai usharca. Gentecunaca, ninanda cushijushpami caparinajurca. Chaimandami, paicuna caparishcacunaca carucaman uyarijurca.