1Chai jipami, Amón llactata mandaj Nahas shuti runaca, Galaad llactapi tiyajuj Jabes pueblopi causajcunahuan macanajungapa vichai rishpa, chaupipi churanajurca. Chaimandami Jabes pueblopi causajcunaca, Nahas shuti runataca cashna ninajurca: “Ama macanajushpa, ñucanchitaca cambajta rurachun churahuai” ninajurcami.
2Shina nijpimi, amonitapura Nahas shuti runaca, cashna nirca: “Ari, canguna mañashcata rurashallami. Shina cashpapash, Israelcunapaj ali ñavita, llujchishpa pingaichina yuyaihuanmi ari nisha” nircami.
3Shina nijpimi, Jabes shuti pueblopi causajcunata mandaj rucucunaca, cashna ninajurca: “Cunanmanda canchis punllacaman shuyapai. Tucui Israel llactapi villachun shuj villajcunata cachagrinchirami. Maijambash, na ñucanchita yanapangapa shamujpica, ñucanchillata cambajman shamushunllami” ninajurcami.
4Villachun cachashca runacunaca, Saúl causajuj Gabaa shuti puebloman chayashpami, chai shimicunataca tucui gentecuna uyajta villanajurca. Chaita uyashpami, gentecunaca caparishpa huacanajurca.
5Saulca, huagracunahuan pambamanda tigramujushpami: “¿Imashpata gentecunaca chashna huacanajun?” nishpa tapurca. Shina tapujpimi, Jabes shuti pueblomanda shamuj runacuna, imatalla nishcata tucuita villanajurca.
6Shina nishcata Saúl uyajunhuanmi, Diospaj Espirituca, ninan ushaihuan Saulpajman shamurca. Chaimandami paica, ninandapacha fiñarirca.
7Shina fiñarishpami, ishcai huagracunata huañuchishpa, asha asha fitishca aichata apashpa, tucui Israel llactapi causajcunaman, cashna villachun cacharca: “Maijambash Saulhuan, Samuelhuan tandanajungapa na munaj runacunapaj huagracunatapash, chashnallatami ruranga” nichunmi cacharca. Shina villajpi, Mandaj Dios cachamushca ninan manllai japijpimi, paicunaca, shujllashnalla tandanajushpa llujshinajurca.
8Bezec shuti pueblopi Saúl yupajpica, quimsa patsaj huaranga Israelcunami carca. Shinallata Judá ayllumandaca, quimsa chunga huaranga runacunami carca.
9Shinallata, villangapa shamushca chai runacunataca: “Galaad llactapi tiyaj Jabes shuti pueblopi causajcunataca, cashna nigrichi: ‘Caya chaupi punllacamanmi, cangunataca quishpichij shamushun’ ninmi nigrichi” ninajurcami. Villangapa rij runacuna, Jabes shuti puebloman tigrashpa, imatalla nishcata villajpimi chaipi causajcunaca, ninanda cushijunajurca.
10Chaimandami Jabes shuti pueblopi causajcunaca, paicunata fiñajcunata cashna ninajurca: “Cayapami ñucanchica, cangunapajman llujshimushun. Chaipica, cangunapaj tucui imashna ali cana cajpipash, ruranguichilla” ninajurcami.
11Ña cayandi punllapica: Saulca, macanajunata yachaj runacunata quimsapi shicanyachishpami, amonitacuna tiyanajuj carpa chaupicunaman, narapash ali punllayajpillata yaicunajurca. Chashna yaicushpaca, chaupi punllacaman ninandapacha macanajushpami, amonitacunataca huañuchinajurca. Chaimandami, huaquin puchushcacunapash, ishcaica na saquirishpa, caita chaita calpanajurca.
12Chai jipami Israelcunaca, Samuelta cashna ninajurca: “¿Saulchu ñucanchita mandanga? nishpa rimaj runacunaca, ¿maijangunata carca? Chai runacunata huañuchingapa, ñucanchiman cuhuaichi” ninajurcami.
13Shina ninajujpimi Saulca, cashna nirca: “Mandaj Dios, Israelcunata cunan quishpichishcamandaca, pipash na huañungachu” nishpami saquichirca.
14Ashtahuangarin Samuelca, Israelcunatami cashna nirca: “Cai llactata mandajuchun churangapa, Gilgal puebloman jacuchi” nircami.
15Shina nijpimi Israelcunaca, Gilgal puebloman rinajurca. Chaipimi, Mandaj Diospaj ñaupajpi Saultaca, jatun mandaj cachun churanajurca. Chai jipami, Mandaj Dioshuan ali cangapa animalcunata carashpa huañuchinajurca. Chashna rurashpami Saulpash, tucuilla Israelcunapash, ninandapacha cushijunajurca.
Who We AreWhat We EelieveWhat We Do
2025 by iamachristian.org,Inc All rights reserved.
