1Taita Dioslla,
ñucanchi ñaupa taitacuna parlashcatami uyapashcanchi.
Punda huatacunapi, Can imatalla rurashcatami uyapashcanchi.
2Canga, cai llactapi causajcunataca, Cambaj ushaihuan calpachishpami,
ñucanchi taitacunataca tarpujshna caipi churarcangui.
Caipi causaj gentecunata llaquichishpami, llujchishpa cacharcangui.
3Cai llactataca, na paicunapaj espadahuan macanajushpa japinajurcachu.
Paicunapaj ushaihuanga na quishpirircachu.
Ashtahuangarin, ninan ushaita charij Cambaj maquihuanmi, chashna rurarcangui.
Paicunata juyashpami, chashna quishpichircangui.
4Taita Dioslla,
Canga ñucata jatun mandajmi capangui.
Jacobpaj miraicunataca quishpichipayari.
5Can yanapajpimi, ñucanchita fiñajcunataca mishashun.
Cambaj shutipimi, ñucanchita na ricunayachij runacunataca tucuchishun.
6Ñuca arcohuanga, na mishai ushashachu.
Ñuca espadapash, na quishpichingachu.
7Canmi, ñucanchita fiñajcunamandaca huacaichishcangui.
Ñucanchita na ricunayachij runacunatapashmi pingaichishcangui.
8Taita Dioshuanmi, tucui causaipi cushijushun.
Cambaj shutitaca, causaita causaicamanmi alicachinajushun. Selah
9Ashtahuangarin, ñucanchita jichushpami, llaquichircangui.
Can na ñucanchihuan rijpimi, macanajuipica mishai tucurcanchi.
10Fiñajcunapaj ñaupajmanda, manllashpa calpachunmi saquircangui.
Chaimandami ñucanchita fiñajcunaca, tucuita quichushpa apanajun.
11Ñucanchitaca, llamata huañuchina pushtuman apajshna apachunmi saquishcangui.
Ñucanchitaca, shuj llactacunamanmi caita chaita cacharcangui.
12Can agllashcacunataca, yangami carashpa cachashcangui.
Ñucanchimandaca, ima culquitapash na mañarcanguichu.
13Ñucanchipaj quimirialla causajcuna asishpa ricunajuchunmi saquircangui.
Ñucanchi muyundipi causajcuna, na alicachishpa asinajuchun saquircangui.
14Shuj llactapi causajcuna na alicachishpa parlanajuchunmi saquircangui.
Tucuicunami, ñucanchita ricushpaca umata muyuchinajun.
15Punllandimi ñucaca pingai tucujuni.
Maitapash yarishpami, urai cumuriyajlla purijuni.
16Ñucata na alicachishpa rimajpimi chashna purijuni.
Ñucata fiñajcuna llaquichinajujpimi chashna purijuni.
17Cai tucui llaquicuna shamujpipash, Candaca na cungashpami causanchi.
Canhuan ari ninajushcatapash, na cungashpami causanchi.
18Ñucanchi shungupash, Canmandaca na anchurircachu.
Cambaj ñanmandapash, na anchurishpami causarcanchi.
19Shina cajpipash, chacal animalcuna causaj pushtupimi shitashcangui.
Huañui japinalla yana ucupimi shitarcangui.
20Ñucanchi Taita Diospaj shutita cungajpi,
rurashcalla dioscunamanra maquita vichai churajpica,
21¿nachu Taita Diosca llaquichinga?
Paica, shungupi pacalla yarijujtapash yachanmi.
22Shina cajpipash, Canmandami punllandi huañuchi tucunajunchi.
Llamacunata huañuchina pushtuman apajpi rijshnami canchi.
23Jatun Dioslla,
ricuhuayari, ¿imashpata puñujunshna na ricuhuanguiyari?
Jataripayari, ñucanchimandaca ama causaita causaicaman caruyapaichu.
24¿Imashpata Cambaj ñavitaca, shujman churapangui?
¿Imashpata llaquita apashpa causanajujtaca na ricupangui?
25Ñucanchica, ñutu alpashnami tucushcanchi.
Ñucanchica, alpapi shitai tucushcashnami canchi.
26Ñucanchita yanapangapa shayaripayari.
Cambaj ninan juyaihuan, ñucanchita quishpichihuayari.
Who We AreWhat We EelieveWhat We Do
2025 by iamachristian.org,Inc All rights reserved.
