MATEO 25 - Quichua Imbabura 2016

Jarihuan nara ima tucushca chungapura cuitsacunamanda yarichishpa yachachishcami

1Shinallata, jahua pachamanda Dios mandajpi causanaca, jarihuan nara ima tucushca chungapura cuitsacuna, cazarangapa shamuj noviota tuparingapa, lamparacunata japichishpa llujshinajujshnami canga.

2Paicunapuramanda picha cuitsacunaca, aligutapacha yarishpa purijcunami carca. Caishuj picha cuitsacunaca, juizu illajcunami carca.

3Juizu illaj cuitsacunaca, lamparata apashpapash, aceitetaca na apashpami rishca carca.

4Ashtahuangarin, aligutapacha yarishpa purij cuitsacunaca, uchilla fundupi aceitetapash, lamparatapash apashpami rishca carca.

5Chai cuitsacunaca, novio na ucha shamujpimi, puñuimanda shitarinajushpa tucuilla puñunajurca.

6Ña chaupi tuta tucujujpimi: ‘¡Novio shamujunmi, tuparingapa llujshichi!’ nishpa caparijta uyarca.

7Shina caparijpimi, chai cuitsacunaca jatarishpa, paicunapaj lamparacunata alichi callarinajurca.

8Shina alichinajushpami, chai juizu illaj cuitsacunaca: ‘Ñucanchi lamparaguca huañugrinmari, cangunapaj aceiteta carahuaichi’ nishpa, chai aliguta yarishpa purij cuitsacunataca mañanajurca.

9Ashtahuangarin, chai aliguta yarishpa purij cuitsacunaca cashna nishpami tigrachirca: ‘Ñucanchipajpash, cangunapajpash ama tucurichun, aceiteta jatujcunata randingapa richilla’ nircami.

10Ashtahuangarin, chai picha cuitsacuna aceiteta randingapa rijhuanmi, novioca chayamurca. Shina chayamujpimi, chai alichirishcalla shuyanajuj cuitsacunaca, noviohuan cazarai huasiman yaicurca. Paicuna yaicujhuanmi, pungutaca vicharca.

11Chai jipallami, jarihuan nara ima tucushca caishuj pichapura cuitsacuna chayamushpa: ‘¡Mandaj taitalla, mandaj taitalla! ¡Punguta pascapai!’ nishpa caparinajurca.

12Ashtahuangarin novioca: ‘Na llullashpami nini: Cangunataca na rijsinichu’ nishpami tigrachirca.

13Shinallatami, Runa Aichayuj tucushca Ñuca, ima punlla, ima horas shamunatapash na yachanguichi. Chaimandami, na puñushpa chapariyana canguichi.

Culquimanda yarichishpa yachachishcami

14Jahua pachapi Dios mandajuj llactaca, caru llactaman rigrijushpa, paipajta rurajcunata cayashpa, pai imatalla charishcacunataca mingashpa saquij runashnami.

15Paica imashna rurai ushanata ricushpami shujmanga pichata, caishujmanga ishcaita, chaishujmanga shuj talento culquita mingarca. Shina mingashpaca, caru llactaman rircallami.

16Picha talento culquita japij runaca randishpa, jatushpa purijushpami, ashtahuan shuj picha talento culquita mirachirca.

17Shinallata, ishcai talento culquita japij runapashmi, ashtahuan shuj ishcai talento culquita mirachirca.

18Ashtahuangarin, shuj talento culquita japij runaca, alpata allashpami, paita mandaj mingashca culquitaca pambarca.

19Tauca huata jipa chai runacunata mandaj tigramushpami, mashna culquita mirachishcatapash yachangapa tapujurca.

20Picha talento culquita japij runaca, ashtahuan shuj picha talento culquita mirachishcata apashpami shamurca. Shina shamushpaca: ‘Mandaj taitalla, canga ñucaman picha talento culquitami mingahuarcangui. Chaitaca, ashtahuan shuj picha talento culquitami mirachiparcani’ nishpami curca.

21Shina cujpimi chai mandajca, cashna nirca: ‘Canga, aliguta pactachij, aliguta ruraj runami cashcangui. Ashagutalla mingajpipash, aliguta huacaichishpami mirachishcangui. Cunanga, ashtahuan ashtacatami canmanga mingasha. Canda mandajhuan cushijungapa shamuilla’ nircami.

22Shinallata, chai ishcai talento culquita japij runapash shamushpami: ‘Mandajlla, canga ishcai talento culquitami mingahuarcangui. Chaitaca, ashtahuan shuj ishcai talento culquitami mirachiparcani’ nishpa curca.

23Shina cujpimi chai mandajca, cashna nirca: ‘Canga, aliguta pactachij, aliguta ruraj runami cashcangui. Ashagutalla mingajpipash, aliguta huacaichishpami cashna mirachishcangui. Cunanga, ashtahuan ashtacatami canman mingasha. Canda mandajhuan cushijungapa shamuilla’ nirca.

24Ashtahuangarin, shuj talento culquita japij runa shamushpaca, mandajtaca cashnami nirca: ‘Mandajlla, canga fiñarijlla cajtami yacharcani. Shinallata, na tarpushpapash tandachij shamujlla, muyuta na shitashpapash apaj shamujllami cangui.

25Chashna cajpimi manllashpa, cambaj culquitaca alpata allashpa pacarcani. Jaica, cambaj culquitaca japipailla’ nircami.

26Shina nijpimi mandajca, cashna nirca: ‘Canga, yanga yanga causaj, na ali runamari cashcangui. Na tarpushpapash tandachij shamujlla, muyuta na shitashpapash apaj shamujlla cajtaca yachashcanguimi.

27Shina cashpaca, ñuca culquitaca culquita alichina huasipi churashpami ali canguiman carca. Shina churajpimi, ñuca shamushpaca, mama culquimanda mirashca culquindi japiman carcani.

28Cunanga, cai runa charijuj talento culquita quichushpa, chunga talento culquita charij runaman cuichi.

29Ashtacata charijmanga, ashtahuan cujpimi, ashtahuan charinga. Ashtahuangarin na charijtaca, ashatalla charishcatapash tucuillami quichunga.

30Cai na imatapash ruraj runataca, yana yana canllaman shitaichi. Chaipimi ninanda huacashpa, quirutapash canirijunga’ nircami.

Cai pachapi llactacunata tapuchina punlla chayanatami villajun

31Runa Aichayuj tucushca Ñucami, punchapamba shamusha. Jucha illaj Ñuca angelcunapashmi, Ñucahuan shamunga. Shina shamushpami, punchapamba mandangapa tiyarinapi tiyarisha.

32Ñuca ñaupajmanmi, tucui llactacunapi causajcuna tandanajumunga. Chaipimi, michij runa imashna llamacunata, chivocunata agllashpa, shican shican churan, chashna agllasha.

33Llamacunataca, Ñuca ali maquimanmi churasha. Chivocunataca, Ñuca lluqui maquimanmi churasha.

34Shina churashpami, Ñuca ali maquiman shayanajujcunataca, Jatun Mandaj Ñucaca cashna nijusha: ‘Ñuca Taita alicachishcacuna, cangunapash Ñucahuan mandanata japij shamuichi. Chaitaca, Diosmi cai pachata churai punllamandapacha cangunaman alichishcalla charijurca.

35Ñuca yarjachishpa purijujpica, cangunami micunaguta carahuarcanguichi. Yacunayachijpipash, cangunami yacugutaca carahuarcanguichi. Caru llactamanda shamushpa purijujpipash, cangunami mingachihuarcanguichi.

36Churajuna illajpipash, cangunami churachihuarcanguichi. Huañujujpipash, cangunami ricuj shamuhuarcanguichi. Prezuna huasipi cajpipash, ricungapa shamuhuarcanguichimi’ nijungami.

37Shina nijpimi, alitalla rurashpa causajcunaca, cashna ninajunga: ‘Apunchi Jesús, ¿ima punllata Can yarjachishpa purijujta ricushpa, micunata caraparcanchi? ¿Ima punllata Can yacunayachijujta ricushpa, yacuta caraparcanchi?

38¿Ima punllata caru llactamanda shamushpa purijujta ricushpa, Candaca mingachiparcanchi? ¿Ima punllata churajuna illaj purijujta ricushpa, Can churajuchun caraparcanchi?

39¿Ima punllata Can huañujujpi, prezuna huasipi tiyajujpi ricungapa shamuparcanchi?’ ninajuhuangami.

40Shina nijpica Jatun Mandaj Ñucami, cashna nisha: ‘Na llullashpami, cangunataca cashna nini: Cai Ñuca uchilla huauquicunaman imata carashpapash, Ñucamanmi chashnaca carahuarcanguichi’ nishami.

41Chai jipami, lluqui maquiman shayanajujcunataca, cashna nisha: ‘Ninanda na alicachi tucushcacuna, Ñuca ñaupajmanda anchurichi. Cangunaca, causaita causaicaman na huañushpa rupajuj ninaman richi. Chai ninataca diabloman, paipaj angelcunamanmi alichishca.

42Yarjachijujpipash, cangunami micunata na carahuarcanguichi. Yacunayachijpipash, cangunami yacuta na carahuarcanguichi.

43Caru llactamanda shamushpa purijujpipash, cangunami na mingachircanguichi. Churajuna illaj cajpipash, cangunami churajunata na carahuarcanguichi. Huañujujpipash, prezuna huasipi tiyajujpipash, cangunami na ricuj shamurcanguichi’ nishami.

44Shina nijpimi paicunaca, cashna ninajunga: ‘Apunchi Jesús, ¿ima punllata Can yarjachishpa, yacunayachishpa purijujta ricushpapash, na caraparcanchi? ¿Ima punllata caru llactamanda Can shamushpa purijujta ricushpapash, na mingachiparcanchi? ¿Ima punllata Can churajuna illaj purijujta ricushpapash, na caraparcanchi? ¿Ima punllata Can huañujujpipash, prezuna huasipi tiyajujpipash, ricungapa na shamuparcanchi?’ ninajuhuangami.

45Shina nijpimi paicunataca, cashna nisha: ‘Na llullashpami, cangunataca cashna nini: Cai Ñuca uchillacunaman shujmanllapash na carashpaca, Ñucamanmi na carahuarcanguichi’ nishami.

46Chashnacunaca, causaita causaicaman ninanda llaquichi tucungapami ringa. Ashtahuangarin, alitalla rurashpa causajcunami, causaita causangapa ringa” nircami.