1Mandaj Dioslla,
llaquichijcunataca randi llaquichij Taita Diosmi cangui.
Imashna llaquichijpipash randi llaquichij Taita Dioslla, shamupayari.
2Cai pachapi causajcunapaj Juezmi cangui.
Canllami jatun capangui.
Jariyashcacunataca, Can ricushpa llaquipailla.
3Mandaj Dioslla,
na ali gentecunaca, ¿ima punllacamanda chashna na alita rurashpa cushijunajunga?
4Paicunaca, ¿ima punllacamanda chashna na alita rimashpa catigrin?
Na alita rurajcunaca, ¿ima punllacamanda jariyashpa causagrin?
5Mandaj Dioslla,
Can agllashcacunatami llaquichinajun.
Cambajlla cachun agllashcacunatami llaquichinajun.
6Sapalla huarmitapash, shuj llactamanda runatapashmi huañuchinajun.
Taita mama illaj huahuatapashmi, huañuchinajun.
7Paicunaca:
“Mandaj Diosca, na ricungachu.
Jacobpaj Taita Diosca, na yachangachu” ninajunmi.
8Shinlli shungu runacuna, aliguta yarinami canguichi.
Muspa runacuna, cangunapash, ¿ima punllata ali yuyaita japigringuichi?
9Taita Diosmi rinritaca rurarca. Chashna cashpaca ¿nachu Paica uyanga?
Ñavita ruraj Diosca, ¿nachu ricunga?
10Llactacunata llaquichij Diosca, ¿nachu shinllita rimashpa llaquichinga?
Runacunaman yachaita caraj Diosca, ¿nachu yachanga?
11Runacunapaj yuyaicunataca,
yangalla cajtami Mandaj Diosca ricujun.
12Mandaj Dioslla, Can rimashpa yachachishcata chasquij runaca, ninandami cushijun.
Can mandashcata pactachishpa causaj runami, ninanda cushijun.
13Can llaquichijui punllacunapi samachingapami chashna rurajungui.
Ashtahuangarin, Canda na manllaj runacunaca, huañuimanmi rinajun.
14Mandaj Diosca, Pai agllashcacunataca na jichungachu.
Paipajlla cachun agllashcacunataca, napacha saquingachu.
15Ashtahuangarin alitalla ruranami tiyanga.
Ali yuyaihuan causajcunaca, chaitami catinajunga.
16Na alita rurajcunahuanga, ¿pita ñucamanda shayaringayari?
Na alita rurajcunahuan ñucamanda shayaringapaca, ¿pita tiyangayari?
17Mandaj Dios ñucata na yanapajpica,
ñapashmi huañuiman carcani.
18Mandaj Dioslla, “ñami urmagrijuni” nishpa mañajpica,
Cambaj juyaihuanmi shinllichihuarcangui.
19Ñuca causaipi ninanda llaquirishpa manllarijujpica,
Canmi yanapashpa cushichihuarcangui,
20¿Jatun na alita rurashpa mandajcunaca, Canhuan tandanajui ushangachu?
Paicunaca, chai mandana ushaita charishpami llaquichinajun.
21Alitalla ruraj runatarami tandanajushpa huañuchinajun.
Ima na alita ruranatapash, na yachajtarami huañuchinajun.
22Ashtahuangarin ñucataca, Mandaj Diosmi huacaichihuashca.
Ñuca Taita Diosca, ñucata pacaj jatun rumishnami.
23Paicuna na alita rurashcamanda, chashnallatami tigrachinga.
Paicuna na alita rurashcahuanllatami llaquichinga.
Ñucanchita Mandaj Taita Diosmi, chashna tucuchinga.
Who We AreWhat We EelieveWhat We Do
2025 by iamachristian.org,Inc All rights reserved.
