JOSUÉ 23 - Quichua Imbabura 2016

Israelcunatami Josueca shinllita tacurishca

1Mandaj Diosca Israelcunataca, paicunata tucui fiñajcunamandaca, ña tauca huatacunatami samachijurca. Josueca tauca huatacunata charishpami, ña rucugu carca.

2Josueca, tucui Israelcunata, paicunata mandaj ancianocunata, paicunata mandajcunata, juezcunata, cati mandajcunatapash cayashpami, cashna nijurca:

“Ñucaca, tauca huatacunata charij, ña rucupachami cani.

3Cangunata Mandaj Taita Diosca, cangunamanda shayarishpa, tucui cai llactacunapi causajcunata, tucui imatalla rurashcataca, alimi yachanguichi. Cangunata Mandaj Taita Diosmi, cai llactapi causajcunahuanga, cangunamanda macanajurca.

4Cai llacta alpacunataca, pipaj urmajta ricungapa rurashpami, ña quichushca llactacunatapash, nara quichushca llactacunatapash, cangunapaj ayllucunapaj cachun chaupishpa curcani. Indi llujshimujman Jordán yacumandaca, indi huashajunman tiyaj Mama cuchacamanmi, cangunaman curcani.

5Cangunata Mandaj Taita Diosmi, chai gentecunataca canguna ricujta, caimanda llujchishpa cachanga. Cangunaca, cangunata Mandaj Taita Dios villashcashnami, paicunapaj alpacunata japinguichi.

6Mandashca shimicunata Moisés quilcashcapi tiyajujta pactachingapaca, ninanda shinlli tucushpami aliguta yarina canguichi. Chai mandashcataca, napacha saquishpami, catina canguichi.

7Cai llactapi puchushca gentecunahuanga na tandanajushpa, paicunapaj dioscunapaj shutitaca na rimashpa, paicunapaj shutipipash na juramentushpa causashpami, aliguta catina canguichi. Chai dioscunataca, na cungurishpa alicachinachu canguichi.

8Ashtahuangarin cunangaman imashna catinajushcashnami, cangunata Mandaj Taita Diostalla catina canguichi.

9Mandaj Diosmi, ninan shinlli jatun llactacunataca, cangunapaj ñaupajmanda llujchishpa cacharca. Chaimandami cunangaman cangunahuanga, pipash na chimbapura macanajui ushanajun.

10Cangunapuramandaca, shuj runallami huaranga runacunata calpachinga. Cangunata Mandaj Taita Diosca, pai villashcashna cangunamanda macanajujpimi, chashna ruranguichi.

11Cangunata Mandaj Taita Diosta juyashpa causangapami, aligutapacha cazushpa causana canguichi.

12Diosta na cazushpara, cai llactapi puchushpa cangunahuan causanajuj gentecunahuanra tandanajunguichiman. Shinallata cangunapash, caishujmanda chaishujmanda cazarachingapa ari nishpa chapuringuichiman.

13Chashna rurajpica, cangunata Mandaj Taita Diosca, cai llactapi causajcunataca cangunapaj ñaupajmanda na llujchishpa cachangachu. Ashtahuangarin, paicunaca, nitijachijshna, huashapi astinshna, ñavipi casha yaicushcashnami cangunataca pandachinga. Cangunata Mandaj Taita Dios, cangunaman carashca cai juyailla llactapi huañushpa tucuringacamanmi, chashna canga.

14Ñucaca, cai pachapi tucui causajcuna rina ñanda catishpami, ña huañugrini. Cangunata Mandaj Taita Diosca, tucui ima nishcatami rurashpa pactachishca. Chaimandami, tucui shunguhuan, tucui almahuan chaitaca yachana canguichi. Imatallapash na saquishpami tucuita pactachishca.

15Cangunata Mandaj Diosca, tucui imalla alicunatami carasha nishca. Shina cashpapash, Mandaj Taita Diosca tucui llaquicunata cachamushpami, Mandaj Taita Diosllata carashca juyailla llactapillata tucuillata tucuchinga.

16Cangunata Mandaj Taita Dioshuan ari ninajushcata na cazushpa, shuj dioscunatara mañangapa rishpa, paicunapaj ñaupajpi alicachishpa cungurijpimi chashna llaquichinga. Chashna rurajpica Mandaj Diosca, ninanda fiñarishpami, Pai carashca cai juyailla llactapillata, llaquichijpi huañushpa tucuringuichi” nijurcami.