2 SAMUEL 7 - Quichua Imbabura 2016

Taita Dioshuan, Davidhuan pactachingapa ari ninajushcamanda(1 Crón. 17:1-27)

1Muyundi llactacunapi causaj gentecunahuan, ali causaita charichun, Mandaj Dios carajpimi, Jatun mandaj Davidca, paipaj huasipi samashpa causajurca.

2Shina cashpami, Jatun mandaj Davidca, profeta Natandaca cashna nirca:

“Ñucaca, cedro caspihuan rurashca huasipimi causajuni. Ashtahuangarin, Taita Diospaj arcami, cortinacunahuan quilpashcalla tiyajun” nircami.

3Shina nijpimi Natanga, jatun mandajtaca cashna nirca:

“Cambaj shungupi imata yarishcata rurailla, Mandaj Diosca canhuanmi” nirca.

4Chai tutallatami, Mandaj Diosca, profeta Natanda cashna nirca:

5“Ñucapajta ruraj Davidpajman rishpaca cashna ningui: Mandaj Diosca cashnami nin: ‘Ñuca causana huasitaca, ¿canllu shayachingapa munangui?

6Ñucaca, Israelcunata Egiptomanda llujchimushca punllamandapacha cunangaman, na huasicunapica causashcanichu. Ashtahuangarin, yangalla carpacunapi, jatun carpapimi causajurcani.

7Israelcunahuan, chai tucui huatacunata purijushpapash, paicunahuan Ñuca Causangapa: ¿Cedro caspicunahuan huasita, huasichichun maijan ayllutallapash mañashcanichu?

8Cunanga, Ñucapajta ruraj Davidtaca cashna ningui: Tucuita Mandaj Diosca, cashnami nin: Ñucami, candaca llamacunata ricushpa, michishpa purijushcamanda anchuchishpa, Ñuca agllashca Israelcunata mandachun churarcani.

9Shinallata, can maita purijpipash, canhuanmi carcani. Canda ñaupashpa rishpami, canda fiñajcunatapash tucuillata tucuchircani. Imashnami cai pachapica tucuicuna rijsishca runacuna tiyan, chashnallatami candapash tucuicuna rijsishca cachun churarcani.

10Shinallata, Ñuca agllashca Israelcuna causachunga, Ñucami alpataca cusha. Chaimandaca, pipash na anchuchi ushangachu. Shinallata, pipash na llaquichi ushangachu.

11Ñuca agllashca Israelcunataca, juezcuna mandajui punllamandapachami llaquichinajurca. Cunanga, canda fiñajcuna llaquichinamandapash samachishami. Mandaj Dios, cambaj miraicunataca ashtahuan mirachisha.

12Can huañuna punllacuna chayajpi, cambaj taitacunahuan tandanajungapa rijpipash, cambaj miraimanda shujta agllashpami, can mandajushca llactapi mandachun churasha.

13Paimi, Ñucapaj huasitaca shayachinga. Pai mandashpa tiyanatapash, Ñucami causaita causaicaman churasha.

14Ñucami, paipaj Taita casha. Paica, ñuca churimi canga. Pai ima na alita rurajpipash, shuj taita paipaj churita astinshnami, varahuan astishpa llaquichishpa charisha.

15Paitaca chashna llaquichishpapash juyashami. Saulta llaquichishcashnaca, na llaquichishachu. Paitaca cambaj ñaupajpillatami chingachircani.

16Shinallata, cambaj miraicunapash, can mandashpa tiyarinapi mandanapash, causaita causaicaman canga’ ninmi nigri” nircami.

17Profeta Natanga, tucui imata uyashcata, muscuipishna ricushcatami, Davidman villajurca.

18Shina villajpimi jatun mandaj Davidca, Mandaj Diospaj ñaupajpi cashna nijurca: “Mandaj Jatun Dioslla. Ñucata chashnapacha juyashpa charijuchunga, ñucapash ñuca huasi ucupurapash, ¿imata alitata ruraparcanchi?

19Mandaj Jatun Dioslla, cambajta ruraj ñucapaj huasi ucupuracuna, jipa punllacunapi imashna ali canamandapashmi villahuashcangui. Mandaj Jatun Dioslla, Can shina juyaj Diosca, ¿maijan runapash na tiyanchu?

20Ñucaca ¿imatata ashtahuan rimai ushapashayari? Mandaj Taita Dioslla, Cambajta ruraj ñucataca, Canllata alimi rijsihuangui.

21Cai tucui jatun ruraicunataca, Cambaj shungupi yarishcashnami, tucuita pactachishpa, cambajta ruraj ñucaman villahuashcangui.

22Mandaj Dioslla, Canga ninanda Jatunyachi tucushcami cangui. Can shina Juyaj Diosca, pipash napacha tiyanllu. Chaitaca alimi yachapanchi.

23Shinallata cai pachapica, ¿Can agllashca Israel llactashnaca, maipita tiyangayari? Jatun Diosllatami, Cambaj agllashcacuna cachun, tucui llactacunapi rijsishca cachun llujchimushcangui. Paicunapaj ali cachun, jatun manllarinacunata rurangapami llujchimushcangui. Canga juyashpallami, Egiptomandapash, shuj gentecunamandapash, chai gentecunapaj dioscunamandapash, Cambajlla cachun llujchimushcangui.

24Can agllashca Israelcunataca, causaita causaicaman, Cambajlla cachun agllashpami, Can Mandaj Diosca, paicunapaj Taita Dios tucurcangui.

25Cunanga, Mandaj Dioslla, Cambajta ruraj ñucamambash, ñuca miraicunamambash, imatalla rurasha nishcataca, causaita causaicaman pactachipailla.

26Cambaj shutica, causaita causaicaman jatunyachi tucushca cachun. ‘Tucuita Mandaj Diosmi, Israelcunapajca Jatun Dios’ ninajuchun. Cambajta ruraj Davidpaj miraicunapash, Cambaj ñaupajpica alipacha catishca cachun.

27Tucuita Mandaj Israelcunapaj Taita Dioslla, Canllatami: ‘Cambaj miraicunataca, mandajcuna cachun churasha’ nihuarcangui. Chaimandami, cambajta ruraj ñucaca cashna mañana ushaita japipashcani.

28Mandaj Dioslla, Canllami Jatun Dios capangui. Can imata nishcapash napacha llulla cajpimi, Cambajta ruraj ñucata, bendiciasha nishcataca pactachipangui.

29Cunanga, ñucapaj huasi ucupurataca, Can Mandaj Taita Dios nishcashna, causaita causaicaman bendiciapailla. Chashna rurajpimi, ñucapaj huasi ucupuracunaca, causaita causaicaman Can Taita Diosta alicachishpa causapanga” nijurcami.