LAMENTACIONES 4 - Quichua Imbabura 2016

Sion pueblota llaquichishpa tucuchishcamanda

1¡Curipash ninanda yanayashpami tucurishca!

¡Punchapamba curipash, na ashtahuan punchayajunllu!

Diospaj huasi rumicunapash, ñangunapi shitashcami sirinajun.

2Sion pueblopi causajcunaca, ali curitapash yalitami juyai tucushca carca.

Shina cashpapash, ¡cunanga alpa mangata ruraj runa, rurashca mangashnami tucushca!

3Chacal animalcunapash, huahuacunaman chuchuchinmi.

Ashtahuangarin, ñuca llacta huarmicunaca,

jichushca pambapi causaj avestruz angacunashnami tucushca.

4Chuchujuj huahuapaj jalluca,

ninanda yacunayachishpami, chaquishpa, shimi ucu jahuaman llutarirca.

Huahuacuna micunata mañanajujpi, imata chaupishpa carangapapash illarcami.

5Ali micunata micushpa causajcunapash,

yarjaimandami ñangunapi huañunajun.

Ali churajunata churajushpa causajcunapash,

huanu shitana pushtucunapimi sirinajurca.

6Ñuca llactapi causajcunaca, Sodoma pueblopi causajcunatapash yalimi juchata ruranajun.

Chai puebloca, pipash na macanajungapa shamujpillatami tucurirca.

7Alicachi tucushca mandajcunaca, razutapash yali punchapambami ricurinajurca.

Lechetapash yali yurajllapachami ricurinajurca.

Paicunaca, coraltapash yali juyaillami ricurirca.

Paicunaca, zafiro rumitapash yali juyaillagumi carca.

8Cunanga, yana tutatapash yali yanami tucushca.

Ñangunapi purinajujpipash, maijan cajta na rijsinllu.

Paicunapaj aichapash, tullupi llutarishpami chaquishca.

9Macanajuipi huañushcacunami, yarjaimanda huañushcacunataca, ashtahuan ali ricurirca.

Paicunaca, alpapi ima granocunapash na fucujpimi, yarjaimanda asha asha huañunajurca.

10Diosta yarishpa causaj huarmicunapash, paicunapaj huahuacunatami, yanurca.

Ñuca llactapi causajcunata, llaquichijui punllapica, paicunapaj huahuacunatami micunajurca.

11Mandaj Diosca, pai fiñarishcataca pactachircami.

Paica ninanda fiñarishpami ninan llaquicunata cachamurca.

Paillatami, Sión pueblopi, callarimanda churashca rumicunatapash, rupachishpa tucuchirca.

12Cai pachapi mandajcunapash, cai pachapi causajcunapash,

Jerusalén pueblo ucuman yaicushpa tucuchinataca na yarcachu.

13Paicunapaj profetacunapash, sacerdotecunapash,

na cazushpa ninan juchacunata rurashcamandami, chashna tucushca.

Paicunaca, alita ruraj runacunata, Jerusalén chaupipi huañuchishpami, yahuarta jichanajurca.

14Ñangunapipash, ñausacunashnami purinajurca.

Paicunapaj churajunapash, yahuarhuan tajshashcashna cajpimi, pipash na tacari usharca.

15Gentecuna paicunata ricushpaca: “¡Anchurichi, mapa runacuna anchurichi!

¡Anchurichi, caipica na causanachu canguichi!” nishpami caparinajurca.

Paicunaca, pacajushpami calparca.

Shuj llacta gentecunaca:

“Na ashtahuan caipica causangachu” ninajurcami.

16Mandaj Dios fiñashpa calpachishpami,

paicunataca na ashtahuan tigrashpa ricurca.

Sacerdotecunatapash na cazushpami, rucu taitacunatapash na llaquirca.

17Yanapangapa shamungami yashpa shuyanajushpapash, shayajurcanchimi.

Napash quishpichi ushana llactatarami, ñucanchica yariashpa shuyanajurcanchi.

18Ñucanchitaca, huañuchingapa chapanajujpimi, ñanmambash na llujshi ushanchi.

Ñucanchi huañuna punllacunami ña chayamushca.

Ñucanchi tucurina punllacunami ña pactamushca.

19Ñucanchita huañuchingapa shamujcunaca, angacunatapash yali ñapash calpajcunami carca.

Urcucunata catishpa rishpami, jichushca pambapi pacalla huañuchingapa chapanajurca.

20Mandaj Dios agllashpa churashca, mandajtapash prezumi aparca.

Paimi aliguta ricushpa mandajurca.

Ñucanchica: “Shuj llactacunapaj chaupipi cashpapash, pai quishpichijpimi causashun” yarcanchimi.

Ashtahuangarin, paipashmi huascahuan huatai tucushpa rirca.

21Uz shuti llactapi causaj Edom runacunalla, cushijushpa asinajuichilla.

Cangunapash, llaquichina copamandaca ufianguichimi.

Cangunapashmi, ashtahuan ninan llaquicunata apanguichi.

22Sion pueblopi causajcunalla, cangunata llaquita apana punllacunaca ñami tucurishca.

Cangunataca, cutinga na prezu cachangachu.

Edom llactapi causajcunalla, canguna na alita rurashcamandami llaquichi tucunguichi.

Cambaj juchata rurashcataca chaipimi ricunga.