Psalms 86 - Quichua Imbabura 2016

Taita Dios juyashpa catichun mañashcamandaDavid mañashcami.

1Mandaj Dioslla,

ñuca mañashcataca uyahuayari.

Ninan llaqui, imagupash illajmari capani.

2Canda yariashpa causashcamandaca, huacaichihuayari.

Ñuca Taita Dioslla,

Canda yariashpa causaj, Cambajta rurajtaca quishpichihuayari.

3Mandaj Dioslla,

ñucataca llaquihuayari.

Candami, tucui punlla caparishpa mañajupani.

4Cambajta ruraj ñucamanga, cushijuita carahuayari.

Jatun Dioslla,

Ñucaca Candallami mañashpa causajupani.

5Can Jatun Diosca, ali cashpami perdonahuangui.

Tucui Canda mañajcunataca, ninandami juyangui.

6Mandaj Dioslla,

ñuca mañajujtaca uyahuayari.

Ninandapacha ñuca mañajujtaca, aliguta uyahuayari.

7Ninan llaquihuan cashpami, Candaca mañajusha.

Ñuca mañashcata uyaj cajpimi, chashna mañajupani.

8Jatun Dioslla,

Canshnalla Jatun Diosca pipash na tiyanllu.

Can rurashcashnaca, pipash na rurai ushanllu.

9Jatun Dioslla,

Can churashca tucui llactacunapi causajcunami, Canda ninanda alicachinajunga.

Cambaj shutitaca, ninandapachami alicachinajunga.

10Canga jatumbacha, tucuita ruraj ushajmi cangui,

Canllami Taita Dios capangui.

11Mandaj Dioslla,

Canda cazushpa causanata yachachihuayari.

Canmanda na anchurishpa causangapa ali yachachihuayari.

Can Diosta manllashpa causana yuyaita carahuayari.

12Ñucata Mandaj Taita Dioslla,

tucui shunguhuanmi, Candaca alicachijusha.

Tucui causaipimi, Cambaj shutitaca, alicachishpa causajusha.

13Ñucataca ninandami juyahuangui.

Seol ucuman rinamandami, jarcahuarcangui.

14Taita Dioslla,

na ali gentecunaca ñucata llaquichingapami jatarinajurca.

Llaquichishpa causajcunami, ñucata huañuchingapa munanajurca.

Paicunaca, Candaca napacha yarinajurcachu.

15Ashtahuangarin, Can Jatun Diosca ninanda llaquij Taita Diosmi capangui.

Na ñapash fiñarij, ninanda juyaj, na llullaj Diosmi capangui.

16Ñucata ricushpa llaquihuayari.

Cambajta ruraj ñucamanga, ushaita carahuayari.

Cambajta ruraj huarmipaj churitaca huacaichihuayari.

17Ñucapaj ali cachunga, imagutapash rurashpa ricuchihuayari.

Ñucata millanayachijcuna ricushpa pingai tucunajuchun, chashna ricuchihuayari.

Ñucataca, Can Mandaj Diosmi yanapashpa, cushichihuarcangui.