1Mama cucha manñapi causajcunapash,
caru llactacunapi causajcunapash, aliguta uyahuaichi:
Mandaj Diosca, mamapaj vijsapi cajpillatami, cayahuarca.
Ñucata nara huacharijpillatami, ñuca shutitaca ña yacharca.
2Ñuca shimitaca, filo espadatashnami rurarca.
Paipaj maquihuanmi, huacaichishpa charihuarca.
Ñucataca, punchapamba flechatashna rurashpami, flechata alichina carapishna alichihuarca.
3Chai jipaca Paica:
“Israel gentecunalla, cangunaca Ñucapajta rurajmi canguichi.
Cangunahuanmi ninanda cushijusha” nihuarcami.
4Shina cajpimi ñucaca: “Yangallatami, ninanda imatapash rurashpa causashcani.
Imatapash na japingapatami, na samashpa imatapash rurashcani” yajurcani.
Ashtahuangarin, imatalla rurashcacunataca, Mandaj Diosmi ricuhuashca.
Imatalla rurashcamandaca, Taita Diosmi cuhuanga.
5Mandaj Diosca, ñuca mamapaj vijsapi cajpillatami, Paipajta rurachun agllahuarca.
Jacobpaj mirai Israelcunataca, Paipajman tigrachishpa tandachijuchunmi agllahuarca.
(Shinamandami, Mandaj Diospaj ñaupajpica, ninanda alicachi tucushca casha.
Ñuca Taita Diosmi, ushaita carahuanga).
6Cunanga, Paimi cashna nin:
“Jacobpaj miraicunata jatarichingapaca, Ñucapajca na shinllichu.
Shinallata, Israel gentecunamanda, puchushcacunata tandachinaca, Ñucapaca na shinllichu.
Shinamandami, llactacuna causajcunapaj micha cachun candaca churarcani.
Tucui cai pachapi causajcunata quishpichijuchun, ñuca agllashcami cangui” nihuarcami.
7Mandaj Diosca, Israelcunata Quishpichij, jucha illaj Diosmi.
Paica, na ricunayachi tucushca, millanayachi tucushca, mandajcuna llaquichijpi causaj gentecunataca, cashnami nin:
“Jatun mandajcunapash, cati mandajcunapash, Cambaj ñaupajpi cunguringami.
Jucha illaj, Jatun Mandaj Dios, paicunata juyashpa agllashcamandami, chashna alicachinajunga” ninmi.
Taita Diosca, Sion pueblota cutin alichisha nishcamanda8Mandaj Diosca, cashnami nirca:
“Chasquina punlla chayajpica uyarcanimi.
Quishpirina punlla chayajpica quishpichircanimi.
Candaca, Ñuca huacaichishpami, cangunahuan ari nishcataca pactachisha.
Shina cajpimi, cai jichushca alpataca cutin japishpa, cai llactapi cutin causai callaringuichi.
9Prezu causajcunatapash: ‘Ñami cacharichi tucushca canguichi’,
yana tutapi causajcunapash: ‘Llujshishpa ricurinami canguichi’ nichunmi, candaca cachasha.
Paicunapaca, maijan ñanda rinajujpipash,
urcucunapi cajpipash, micunaca na illangachu.
10Paicunataca yarjaipash, yacunayaipash na japingachu.
Indipash na rupachishpa, llaquichingachu.
Paicunata llaquishpa charij Diosmi pushajunga.
Yacu llujshijuj pushtucunamanmi pushanga.
11Lomacunapipash, ñanda rurashami.
Ñuca chaqui ñangunatapash, cutin alichishami.
12Paicunaca caru llactacunamandami shamunajunga.
Paicunaca, janajmanda, indi huashajunmandami shamunajunga.
Huaquingunaca, Sinim shuti llactamandami shamunajunga.
13Jahua pachapi tucui tiyajcunapash, candashpa alicachinami canguichi.
Cai pachapi tucui tiyajcunapash cushijunami canguichi.
Urcucunapash caparishpami candana canguichi.
Mandaj Diosca, Pai agllashcacunamanga ninan cushijuitami carashca.
Imagutapash na charijcunatapash, Paica llaquingami.
14Ashtahuangarin, Sion pueblopi causajcunaca:
‘Mandaj Diosca saquihuashcami. Jatun Diosca, ñucataca cungahuashcami’ ninajurca.
15¿Mamaca, pai ungushca huahuataca cungangallachu?
¿Paipaj vijsamanda llujshishca churitaca, fiñangallachu?
Mama cungajpipash, Ñucaca, napacha candaca cungashachu.
16Ricui, ama cungangapa, candaca Ñuca maquipimi charijuni.
Sion pueblo pircacunatapash, na cungashpami ricuriajuni.
17Sion pueblota alichijcunaca, calpashpami shamunajunga.
Canda llaquichishpa tucuchijcunaca, llujshishpami calpanajunga.
18Muyundita, aliguta vichai ricuyari.
Tucuicunami tandanajushpa, cambaj ñaupajman shamushca.
Mandaj Dios Ñucaca causajunipachami, Ñuca ñaupajpica juyaillacunata churajushcashnami cangui.
Cazarangapa, juyaillaguta churajushca cuitsashnami cangui.
19Cambaj llactataca, llaquichishpa tucuilla tucuchishca cajpipash,
ashtaca gentecunami cutin causangapa shamushca.
Canda tucuchijcunaca, carumanmi calpachi tucunga.
20Carucunaman rishpa mirashca huahuacunapash, candami cashna ninajunga:
‘Cai llactapi ñucanchi causangapaca, ñana maipipash tiyanllu. Ñucanchi causangapa shuj pushtuta carahuailla’ ninajungami.
21Chaita uyashpaca: ‘¿Pita cai huahuacunataca, ungurca?
Huahuacuna illaj, ñucallamari carcani.
Pipash illajpi, ñucalla cashpami, cai llactamanda calpachi tucurcani.
¿Pita cai huahuacunataca viñachirca?
Ñucatalla saquijpimari, ñucalla causajurcani.
Cai huahuacunaca, ¿maipita carcayari?’ yajunguimi” ninmi.
22Jatun Mandaj Diosca, cashnatapashmi nin:
“Llactacunapi causajcunataca, Ñucami mandagrini.
Tucui gentecuna ricuchunmi, banderata churagrini.
Chashna rurajpica, churicunata ushicunata marcashpami shamunajunga.
23Canda viñachij taitacunami, cangunapaj mandajcuna tucunga.
Canda viñachij mamacunami, cangunapaj mandaj huarmicuna tucunga.
Candaca, alpaman chayajta cumurishpami alicachinajunga.
Cambaj chaquipi ñutu alpatapashmi maillachinajunga.
Chashna rurajpimi Ñucataca, Mandaj Diospacha cajtapash,
Ñucatalla shuyajcunaca, napacha pingai tucuna cajtapash yachangui” ninmi.
24Ninan shinlli runa macanajuipi quichushcataca, ¿cutin quichui ushangallachu?
Ninan millai mandajcuna prezu churashcataca, ¿pipash llujchishpa apangallachu?
25Mandaj Diosca, cashnami nin:
“Ninan shinlli runa prezu churashcatapash, llujchishpa apangallami.
Millai mandaj mishashpa imata japishcatapash quichungallami.
Canda llaquichij runahuanga, Ñucami chimbapura shayarisha.
Cambaj huahuacunataca, Ñucami llaquimanda llujchisha.
26Imatalla quichushpa canda llaquichijcunataca, paipurallata tucurinajuchunmi saquisha.
Paipurallata yahuarta jicharishpa tucurichunmi saquisha.
Chashna rurajpimi, Mandaj Dios Ñucataca,
canda Quishpichij, llaquimanda Llujchij,
Jacobman ushaita cuj Dios cajta, tucui gentecuna yachanga” ninmi.
Who We AreWhat We EelieveWhat We Do
2025 by iamachristian.org,Inc All rights reserved.
