EZEQUIEL 44 - Quichua Imbabura 2016

1Chai jipaca, Diospajlla huasi canlla pungumanmi, cutin tigrachihuarca. Chai punguca, indi llujshimujmanmi tiyajurca. Chai punguca, vichashcami carca.

2Mandaj Diosca cashnami nihuarca: “Cai pungutaca, Israelcunata Mandaj Taita Dios Ñuca yaicushcamandami, pipash na yaicui ushanga, pipash na pascai ushanga. Chaimandami, cai punguca na pascarishpa tiyanga.

3Shuj cati mandajmi, pai mandaj cashcamandaca, Mandaj Diospaj ñaupapi micungapa chaipi tiyaringa. Paica, corredor punguta yaicushpaca, chaitallatami llujshinga” nihuarcami.

4Chai jipami, Diospaj huasi ñaupajta rishpa janajman tiyaj punguman pushahuarca. Chaipimi Mandaj Diospaj huasipica, Mandaj Diospaj jatun ushai punchapamba jundashcata ricurcani. Chaita ricushpaca, alpaman chayajtami cumurircani.

5Chaipimi Mandaj Diosca cashna nihuarca: “Huañuna aichayuj runa. Aliguta uyashpa, canllata ricui. Mandaj Dios Ñuca huasipi imatalla ruranamanda tucui mandashcacunata canman villashcatapash, mandashca shimicunatapash, canllata aliguta uyangui. Diospajlla huasiman yaicunacunatapash, Diospajlla huasimanda llujshinacunatapash aliguta ricungui.

6Chai na cazuj Israelcunamanga cashna nishpa villangui: Mandaj Jatun Diosca cashnami nin: ‘Israel gentecuna, chai tucui millanayaicunata ruranataca, ña chashnalla saquichi.

7Cangunaca, shungupipash, aichapipash circuncisionda na rurashca caru llactamanda runacunatara, Ñuca huasiman pushamushpami mapayachircanguichi. Shina cashpapash, tandata, virata, yahuarta Ñucaman cushpami, Ñucahuan ari ninajushcata yangapi churashpa tucui millanayaicunata rurarcanguichi.

8Ñucapajlla shicanyachishcacunata ricuchun mandashcatapash cangunaca na pactachishpami, shuj llactamanda runacuna ricuchun churarcanguichi’ ninmi nishpa villai” nihuarcami.

9Mandaj Jatun Diosca cashnatapashmi nijurca: “Shuj llactamanda shamushca runacunapash, Israelpuracunapi causanajuj shuj llactamanda runacunaca, shungupipash, aichapipash circuncisionda na rurashcacunaca napacha Ñuca huasiman yaicungachu.

10Shinallata Israelcuna, paicunapaj rurashcalla dioscunata mañashpa Ñucamanda caruyajta ricushpaca, levitacunapashmi Ñucamanda anchurinajurca. Chashna na alita rurashcamandaca, paicunapashmi llaquichi tucunajunga.

11Paicunaca, Ñuca huasi pungucunapi ricushpa, imatapash chaipi rurashpallami causanajunga. Shinallata, Diosman cushpa tucuilla rupachina animalcunatapash, Israelcuna Ñucaman cushca animalcunatapash, paicunami huañuchinajunga. Israelcuna imatapash rurachun nishcatami ruranajunga.

12Paicunaca, paicunapaj rurashcalla dioscunata alicachishpa causanajushpami, Israelcunataca jatun na alicunata rurachishpa pandachinajurca. Chashna na alita rurachishcamandami llaquichi tucunga nishpami, Mandaj Jatun Diosca Ñucaca juramenturcani” ninmi.

13Shinallata: “Chai levitacunaca, na Ñucapajta ruraj sacerdotecunashna Ñucapajta rurangapa shamungachu. Imalla Ñucapaj cajtapash, imatalla Ñucapaj shicanyachishcatapash, napacha tacari ushangachu. Paicuna na alicunata rurashcamandami pingaichi tucunajunga.

14Paicunataca, Ñuca huasita ricujcuna cachun, Ñuca huasipi imatalla rurana cajpipash ruranajuchunmi, mingashpa chaipi churasha.

15Ashtahuangarin Sadoc shuti sacerdotepaj mirai levita sacerdotecunaca, Ñucamanda Israelcuna anchurijpipash, paicunaca na anchurishpami, Ñucapajlla huasipi imatalla rurachun mandashcataca pactachinajurca. Paicunami, Ñucapajta rurangapa Ñuca ñaupajman quimirinajunga. Shinallata Ñucaman cushca viratapash, yahuartapashmi, Ñuca ñaupajpi cunajunga. Mandaj Jatun Dios Ñucami, chashna nini.

16Paicunami, Ñucapajlla huasimambash yaicunga. Ñuca mezaman quimirishpami tucuita rurashpa, Ñuca mandashcacunatapash pactachinajunga.

17Ñuca huasi ucu patioman yaicungapapash, Ñucapajlla huasi ucupi rurangapapash, lino churajunatami churajunajunga. Milma churajunataca na churajunajungachu.

18Umapica, lino turbantetami churajunajunga. Shinallata, linota rurashca calzondami churajunajunga. Cinturapica, imapash jumbichinataca na chumbiliringachu.

19Diospaj huasimanda canlla patiopi gentecunapajman llujchishpaca, Ñucapajta rurangapa churajushca churajunataca llujchinami. Chai churajunacunataca, Diospajlla huasipi tiyaj uchilla ucucunapimi alichinajunga. Chai churajunacunahuan llujshishpa, canllapi gentecunata ama Ñucapajlla cachun rurangapami, shuj churajunahuan llujshina.

20Umataca ama lluchuyajta ruturishpa, asha ajchatalla ruturinajuchun.

21Ñuca huasi ucu patioman yaicungapaca, maijan sacerdote cashpapash ama vinota ufiachun.

22Shinallata sapalla huarmitapash, cusa jichushcatapash ama cazarachun. Ashtahuangarin, Israel ayllucunamanda chairalla cuitsata cashpa, sacerdote huañujpi sapalla saquirishca huarmita cazarachun.

23Shinallata Ñuca agllashca gentecunamanga, Diospajlla canatapash, na Diospajlla canatapash shicanyachinatami yachachinga. Shinallata imalla mapa cajtapash, imalla na mapa cajtapash agllanatami yachachinga.

24Fiñanajushcacuna tiyajpica, chai sacerdotecunami aliguta ricushpa alichinajunga. Aliguta ricushpa alichinajuchun Ñuca mandashcashnami, aliguta ricushpa alichinajunga. Tucui jatun cushijuna punllacunapica, Ñuca mandashcacunata rurashpa, mandashcacunata pactachishpami, Ñuca samana punllacunatapash, Ñucapajlla cachun shicanyachinajunga.

25Ama mapayangapaca, huañushca runapajmambash na quimiringachu. Paipaj taita cajpi, mama cajpipash, churi cajpi, ushi cajpipash, huauqui cajpi, na cazarashca pani huañujpillami tacari ushanga.

26Mapayashca cashpaca, armashpa mapa illaj saquirishpami, canchis punllata shuyanga.

27Ñucapajta rurangapa, Ñucapajlla huasiman yaicuna huasi ucu patioman yaicui punllapica, juchamanda animalta Ñucaman cuchun. Mandaj Jatun Dios Ñucami chashna” nini.

28Shina rurajpimi, paicunapaj cachun imata japinapash tiyanga. Ñucami paicunapaj cachun, paicuna japina alpashna cani. Ashtahuangarin Israel llactapi tiyaj alpacunataca na cunachu canguichi. Ñucami, paicuna causana alpashna cani.

29Chai sacerdotecunami, Ñucaman imaguta carashcacunatapash, juchamanda animalta cushcatapash, Ñucaman animalta cushpa huañuchishcatapash micunajunga. Tucuilla Israelcuna imatapash Ñucapajlla cachun carashcacunaca, paicunapajmi canga.

30Shinallata, punda fucushca tucui granocunapash, Ñucaman imatalla tucui carashcacunapash, tucuillami sacerdotecunapaj canga. Cangunapaj huasicunapash bendiciai tucushca cachunga, canguna masai callarishca masatapashmi, sacerdoteman cuna canguichi.

31Sacerdotecunaca, paimanda huañushca animalcunatapash, shuj animalcuna huañuchishca animalcunatapash na micungachu. Chaicunataca, alasyu animalcuna cajpipash, shuj animalcuna cajpipash na micungachu.