JOSUÉ 7 - Quichua Imbabura 2016

Acán shuti runa juchata rurashcamanda

1Ashtahuangarin Israelcunaca, Dios tucuchingapa shicanyachishcata apashpami, juchata rurarca. Taita Dios tucuchingapa shicanyachishcata Acán runa apashcamandami, Mandaj Diosca, Israelcunahuanga ninandapacha fiñarirca. Acán runapaj taitaca, Carmi shutimi carca. Carmi shuti runapaj taitaca Zabdi shutimi carca. Zabdi shuti runapaj taitaca Zerah shutimi carca. Paicunaca Judá mirai ayllupurami carca.

2Josueca, Jericopi cashpa, Hai shuti pueblota ricuchun huaquin runacunata cachajpimi, paicunaca chai pueblota ricungapa vichai ricunajurca. Chai puebloca, Bet-el shuti pueblomanda, indi llujshimujman tiyajuj Bet-avén shuti pueblo chayanallapimi carca.

3Chaimanda Josuepajman tigramushpaca cashnami ninajurca: “Hai shuti pueblopi causajcunaca huaquingunallami cashca. Na tucuicunata cachanachu capangui. Ishcai huaranga runacunata, na cashpaca quimsa huaranga runacunatalla cachajpi, paicunallata mishashpa quichungallami” ninajurcami.

4Shina cajpimi Israelpuramandaca, quimsa huarangashna runacunalla rinajurca. Chai runacunataca, Hai shuti pueblopi causajcuna macashpa catijpimi calpanajurca.

5Shina cajpimi, Hai shuti pueblopi causajcunaca, quimsa chunga sucta Israel runacunata huañuchirca. Shina cashpami, Hai puebloman yaicunamandaca, Sebarim shuti pambacaman catijpi, pacajushpa calpanajurca. Chashna cajpimi Israelcunaca, shungu junda manllarishpa, ninandapacha chujchunajurca.

6Shina cajpimi Josuepash, Israelcunata mandaj ancianocunapash, ninanda llaquirishpa, churajushcacunata liquirishpa, Mandaj Diospaj arca ñaupajpi alpaman chayajta cumurishpa, ñutu alpata umapi churarishpa chishanajurca.

7Chaipimi Josueca cashna nijurca:

“¡Aij Mandaj Jatun Dioslla! ¿Imapata cai gentecunataca, Jordán yacuta chimbachimurcangui? ¿Amorreo gentecunapaj maquipi churashpa, ñucanchita tucuchingapachu chimbachimurcangui? ¡Jordán yacu chimbapillata saquirishpachari ali canchiman carca!

8¡Aij, Jatun Dioslla! ¿Cunanga imatata rurashayari? Israelcunaca, paicunata fiñajcuna mishajpimi calpamushca.

9Cashna tucushcata, cananeo gentecuna, cai llactapi tucui causajcuna yachashpaca, tandanajushpami ñucanchita chaupipi churashpa tucuchij shamunga. Chashna rurajpica, Cambaj jatun shutica ¿imashnata ricurigripan?” nijurcami.

10Shina nijpimi Mandaj Diosca, Josuetaca: “Jatari ¿Imashpata alpaman chayajta cumurishca cangui? nirca.

11Israelcunaca, Ñuca mandashcata na cazushpami juchata rurashca. Shinallata, tucuchingapa shicanyachishcata apashpa, llullashpa, shuhuashpa, chaicunata alichishpa charinajushpami juchata rurashca.

12Chaimandami Israelcunaca, paicunata fiñajcunahuan macanajuitaca na ushanga. Ashtahuangarin, paicunata fiñajcunata manllashpami tigrashpa calpanajunga. Paicunaca, tucuchi tucungapa shicanyachi tucushcami. Tucuchingapa shicanyachishcata cangunamanda na anchuchijpica, na ashtahuan cangunahuan pacta cashachu.

13Cunanga, Israelcunataca Diospajlla cachun shicanyachishpa cashna ningui: ‘Cayapaca, Diospajlla shicanyachishcami cana canguichi. Israelcunata Mandaj Taita Diosmi cashna nin: Israel runacunalla, tucuchingapa shicanyachishcatami cangunapurapi charinajun. Chaicunata cangunapaj chaupimanda na anchuchishpaca, cangunata fiñajcunahuanga napacha macanajui ushanachu canguichi.

14Shina cashcamanda, cayapaca cangunapaj ayllupurallami tandanajuna canguichi. Maijan aylluta cashpapash, Mandaj Dios Ñuca cayajpica, chai ayllucuna imashna cashcashna shamuchun. Chai ayllupaj miraicunamanda maijandapash, Mandaj Dios Ñuca cayajpica, chai huasi ucupuracuna shamuchun. Chai huasi ucupuramanda maijandapash, Mandaj Dios Ñuca cayajpica, jaricuna imashna tandanajushcashnallata shamuchun.

15Chaipica, tucuchingapa Ñuca shicanyachishcata, maijan charijushpa japi tucushpaca, tucui imatalla pai charishcacunandimi rupachi tucunga. Paica, Mandaj Dios mandashcata na cazushpami, Israelpurapi na alita rurashca’ ningui” nijurcami.

16Shina nijpimi Josueca, cayandi tutamandata jatarishpa Israelcunataca, paicunapaj ayllucuna imashna cashcashnallata tandachirca. Chaipica, Judá ayllumi japi tucurca.

17Judá aylluta cayajpica, Zera shuti runapaj miraipurami japi tucurca. Chai jipaca, Zera shuti runapaj miraimanda jaricuna imashna tandanajushcashnallata cayajpica, Zabdi shuti runapaj huasi ucupurami japi tucurca.

18Paicunapaj huasi ucupura jaricuna imashna tandanajushcata cayajpica, Acán shuti runami japi tucurca. Acán runapaj taitaca, Carmi shutimi carca. Carmi shuti runapaj taitaca Zabdi shutimi carca. Zabdi shuti runapaj taitaca Zerah shutimi carca. Paicunaca Judá mirai ayllupurami carca.

19Chaimandami Acán shuti runataca, Josueca cashna nirca:

“Ñuca huahualla, Israelcunata Mandaj Taita Diosta alicachishpa, can imata rurashca cashpapash, ama pacashpa cunanga villahuailla” nircami.

20Shina nijpimi Acán runaca, Josuetaca cashna nirca:

“Na pacai ushapanichu. Israelcunata Mandaj Taita Diospaj ñaupajpica cashna pandashpami juchata rurapashcani.

21Tucui imatalla japishpa tandachinapica, Babilonia llactamanda juyailla jatun churajunatami ricurcani. Shinallata, ishcai kilo chaupitashna pezaj culquitapash, chaupi kilo yalita pezaj curitapashmi ricurcani. Shina ricushpami, chaicunataca ninanda munashpa, pacalla japishpa apamurcani. Chaicunaca, ñuca carpa chaupi ucupimi, alpa ucupi pacashca tiyajun. Culquitapash, chai ucupillatami churarcani” nircami.

22Shina nijpimi Josueca, Acán shuti runa causajuj carpata ricuchun huaquin runacunata cacharca. Chai runacunaca calpashpa rishpami, tucui ima pacashcatapash, chai ucupillata culquitapash tarinajurca.

23Carpa ucu chaupipi pambashcata tarishcataca, Josuepaj, tucui Israelcunapaj, Mandaj Diospaj ñaupajpimi churanajurca.

24Chai jipami Josueca, tucui Israelcunandi, Zera shuti runapaj churi Acán runata japishpa, pai shuhuashca culquindi, churajunandi, curindi, churicunandi, ushicunandi, huagracunandi, llamacunandi, burrucunandi, paipaj carpandi, tucui pai imatalla charishcacunandi, Acor shuti pugru pambaman tucuilla apanajurca.

25Chaipimi Josueca, Acán runataca:

“¿Imashpata ñucanchita cashna llaquipi churarcangui? Cunanga, candapash Mandaj Dios llaquichijuchun” nircami.

Shinallata, tucui Israelcunami rumicunahuan huañuchinajurca. Chai jipaca, tucui charishcacunandimi rupachinajurca.

26Chai rupachishca jahuapica, ashtaca rumicunata churashpami saquinajurca. Chaica cunangamanmi chashna tiyajun. Shinamandami, chai pugru pambataca cunangaman, Acor shuti Pamba nishpa rijsinajun. Chashna rurajpimi, Mandaj Diosca, Israelcunahuan ninanda fiñarishcamandaca ali tucurca.