ROMANOS 2 - Quichua Imbabura 2016

Taita Diosca, alitalla ruraj cashpami llaquichinga

1Shina cashpaca, cambash, shujtaca imamanda juchachitaca na ushanallami cangui. Cambash chashnallata cashpami, shujta juchachishpa llaquichishpaca, canllata ninandapacha llaquita apangui.

2Ashtahuangarin chashna na alita rurajcunataca, Taita Diosca na llullashpa llaquichinatami yachanchi.

3Chashna na alita ruranajujta ricushpa, na alicachishpa parlaj runalla, cambash chashnallatami na alita rurajungui. Canga, ¿Taita Dios llaquichinamandaca pacajui ushashami yanguichu?

4¿Ninanda juyajujta, na fiñarishpa shuyajujta, ninanda llaquijujlla Diostachu yangapi churangui? ¿Diospajman tigrarichun canda juyashpa shuyajujtachu yangapi churangui?

5Ashtahuangarin canga, shinlliyashcapacha cashpa, cambaj shungupipash na llaquirishca cashpami, ali cashcatapacha rurashpa llaquichimui punllapaca, ashtahuan llaquichi tucungapa mirachijungui. Chai punllapimi, Taita Diosca ninanda fiñarishpa, can na alita rurashcata ricuchishpa llaquichijunga.

6Imata rurashcata ricushpami, chai rurashcamandaca imata cuna cashcata tucuicunaman cunga.

7Aligutalla rurashpa catijcunamanmi, causaita causagrinataca caranga. Paicunamanmi, juyailla canata, alicachi tucunata, causaita causagrinata caranga.

8Ashtahuangarin, fiñanajushpalla causajcunata, na llullashpa villajuj shimitapash na cazushpa, na alitalla rurajcunatami, Diosca ninandapacha fiñarishpa llaquichijunga.

9Na alitalla rurashpa causanajuj tucui gentecunamanmi, jatun llaquita, ninan llaquirinacunataca cachamunga. Pundaca, judiocunatara llaquichishpami, jipaca, griegocunatapash llaquichinga.

10Ashtahuangarin alita rurashpa tucui causajcunamanmi, juyailla canatapash, ninanda alicachi tucunatapash, shungupi llaqui illaj causaigutapash caranga. Pundaca, judiocunamanra carashpami, jipaca griegocunamambash caranga.

11Taita Diosca, na agllashpalla pitapash ricujunllu.

12Mandashca shimita na yachaimanda juchata rurajcunaca, na yachashpallatami huañunga. Ashtahuangarin, mandashca shimita yachashca jahua juchata rurajcunaca, mandashcapi nijujshnallatami llaquichi tucunga.

13Mandashca shimicunata uyaitalla uyajcunataca, Taita Diosca na chasquinllu. Ashtahuangarin, mandashca shimicunata pactachijcunatallami Diosca chasquijun.

14Na Israelcunaca, mandashcata na charishpapash aliguta yarishpa rurashpallami, chai mandashcapi nijujta ruranajun. Mandashcata na charishpapash, paicunapaj chai rurashcacunaca mandashcallatami.

15Chai mandashcata shungupi quilcashcashna charishpami, mandashcapi nijujshna imashna causanajushcata ricuchinajun. Paicunallata ali yarishpami, alitaca alimi ninajun, na alitaca, na alichu ninajun.

16Quishpirinamanda ñuca villajushcashnami, Taita Dios llaquichijui punllapica, gentecuna imata pacalla yarinajushcatapash Jesucristopaj shutipi ricuchimunga.

Mandashca shimicunataca judiocunaca na cazushcachu

17Canga, judío runa ni tucushcami cangui. “Mandashca shimitami charini, Taita Dioshuanmi causajuni” nishpami jariyangui.

18Imata rurachun Dios munajtapash yachanguimi. Mandashca shimita yachajushca cashpami ima alita ruranatapash yachangui.

19“Ñausashna causajcunatapash pushajmi cani. Shinallata, yana yana tutapishna causajcunatapash punchayachijmi cani” yashpami, chaita yariajlla causajungui.

20“Nara yachajushcacunaman, aliguta yachachijmi cani. Huahuashna causajcunaman yachachijmi cani” yanguimi. “Mandashca shimimanda, na llullashpa villajuj shimimandami, ali yachajushca cani” yanguimi.

21Shujcunaman yachachij cashpaca, ¿imashpata na canra yachajungui? “Na shuhuanachu” nishpa villajushpapash, ¿imashpata shuhuanguilla?

22“Na huainayanachu” nijushpapash, ¿imashpata huainayanguilla? Rurashcalla dioscunata millanayachishpapash, ¿imashpata chai dioscuna tiyajuj huasimandaca shuhuanguilla?

23“Mandashca shimita yachanimi” nishpa jariyajushpapash, ¿chai mandashca shimita na cazushpami, Taita Dios alicachi tucushcatapash huaglichijungui?

24Quilcashcapica cashnami nijun: “Cangunamandami na Israelpurapica, Taita Diospaj shutita na ali shimicunata rimanajun” nijunmi.

25Mandashca shimipi nijujta can pactachijpica, circuncisionda can rurashcapash alipachami. Ashtahuangarin, mandashca shimita na cazujpica, circuncisionda can rurashcapash, circuncisionda na rurashcashnallatami.

26Circuncisionda na rurashca cashpapash, mandashcapi nijujta pactachijushpaca, ¿nachu circuncisionda rurashcashnallata, Diospaj ñaupajpica ricuringa?

27Circuncisionda na rurashca cashpapash, mandashcapi nijujta aligutapacha pactachijcunaca, candarami llaquichi tucunapipacha churanga. Quilcashpa mandashcata yachashpapash, circuncisionda rurashca cashpapash, canga na cazujmi cangui.

28Gentecunapaj ricuipilla judío cashpapash, napacha paipurachu cangui. Gentecuna ricuchunlla aichapi circuncisionda rurashca cashpapash, napacha circuncisionda rurashcashnami cangui.

29Ashtahuangarin ucu shunguta circuncisionda rurashca runaca, judiopachami. Diospaj Espirituca, shungutami circuncisionda ruran. Mandashca shimica, na chashna rurai ushanllu. Alicachi tucunaca, gentecunamanda na shamunllu, ashtahuangarin Taita Diosmandami shamun.