1Mandaj Diosca, Hadrac shuti llactata, Damasco shuti pueblota llaquichinatami villajun. Cai pachapi tucui gentecunapash, tucui Israel ayllucunapash, Mandaj Diostami yariashpa causana canguichi.
2Hamat shuti pueblopash, Israel llactahuan tandachishpami llaquichi tucunga. Tiro shuti, Sidón shuti pueblocunapi causajcuna, ninandapacha yachajushca cashpapash, llaquichi tucungami.
3Tiro shuti pueblopi causajcunaca, shinlli torretami ruranajurca.
Culquitapash ñutu alpatashna, curitapash ñambi sirin turutashnami tandachinajurca.
4Paicunataca, Jatun Diosmi imatapash na charijcunata ruranga.
Paicuna imatalla charishcacunataca, mama cuchapimi chingachinga.
Chai pueblotaca, ninami tucuchinga.
5Chaita ricushpaca, Ascalón pueblopi causajcunapash,
Gaza pueblopi causajcunapash ninandapachami llaquirinajunga.
Ecrón pueblopi causajcunapash, paicuna shuyanajushca na pactajpimi, chashnallata llaquirinajunga.
Shinallata Gaza pueblota jatun mandajpashmi huañunga.
Ascalón pueblopica, pipash na causangachu.
6Asdod shuti pueblopica, shuj llactamanda gentecunami causanajunga.
Chaipimi, ninanda jariyashca filisteocunatapash tucuchisha.
7Paicunataca, yahuarta micunshna llaquichinajujta quichushami.
Shina llaquichishpa charinajun shimimandami quichusha.
Huaquin puchushca gentecunaca, ñucanchi Taita Diospajmi canga.
Paicunami Judá llactapica, mandajcunashna canga.
Ecrón pueblopi causajcunapash, jebuseo gentecunashnami tucunga.
8Shinallata: “Ñuca huasi muyunditaca Ñucami ricusha, pipash ama richun, pipash ama shamuchun, tucuita ricuj runashna carpata shayachishpa chaipi casha.
Shina cajpimi paicunata llaquichij runaca, na ashtahuan yaicunga.
Cunanga, Ñuca ñavihuambacha ricujujpimi, na yaicui ushanga”.
Sión pueblopi causajcunata jatun mandaj shamunamanda9Sión pueblopi causajcunalla, ninanda cushijuichiyari.
Jerusalenbi causajcunalla, cushijushpa candaichiyari.
Alitalla rurashpa, Quishpichij cangunata jatun mandajca shamungami.
Paica, burrupi tiyarishcami shamunga, aparij burrupaj huahua, maltun burrupimi shamunga.
10Efraín llactapaj carretacunataca, Jerusalenbi causajcunapaj caballocunandimi tucuchisha.
Macanajuna arcocunatapashmi faquisha.
Llactacunapi causajcunamanmi, ali causaita villajunga.
Paica, caishuj mama cuchamandaca, chaishuj mama cuchacamanmi mandajunga.
Jatun yacumanda callarishpaca, cai pacha tucuringacamanmi mandajunga.
11Cangunahuan ari nishcamanda, cushca yahuarhuanmi quishpiringuichi.
Prezu apai tucushcacunataca, yacuta tandachingapa rurashca, chaquishca jatun utujumandami llujchircani.
12Tucui pactamuchun, ninanda shuyashpa causajcunalla, pacajuna shinlli torremanshna tigraichiyari.
Cangunamanga, chaupi yalita cushpami bendiciasha.
13Judá llactapi causajcunataca, Ñucapaj macanajuna arcotashnami alichircani.
Efraín ayllutaca, chai arcopi churashpa cacharina flechatashnami rurarcani.
Sión pueblopi causajcunataca, Grecia shuti llactapi causajcunata tucuchinajuchunmi,
ninan shinlli runapaj espadatashnami rurasha.
14Mandaj Diospaj ushaimi, paicunata quilpajshna ricuringa.
Paipaj flechapash, punchapambata shitamujunshnami llujshinga.
Mandaj Jatun Diosmi, trompetata huacachinga.
Paica, uraimanda shamuj jatun acapanapimi puringa.
15Tucuita Mandaj Diosmi paipaj huahuacunataca huacaichinga.
Huaracahuan shitashca rumicunatapash sarushpami,
paicunata fiñajcunataca llaquichishpa tucuchinga.
Vinota ufiashpa machashcashnami caparinajunga.
Paicunaca, jatun tastapi yahuarta jundachishcashna,
na cashpaca cachucunapi jundachishcashnami canga.
16Chai punllapica, paicunata Mandaj Diosmi, pai agllashca gentecunataca llamacunatashna quishpichinga.
Pai agllashcacunaca, paicunapaj llactapica, coronapi churashca punchalla rumicunashnami juyailla ricunajunga.
17¡Paicunapaj juyaica ashtacamari! ¡Paicunaca, ninan juyaillagumari!
Trigopash, vinopashmi chairalla viñaicunataca tucuicunata cushichinga.
Who We AreWhat We EelieveWhat We Do
2025 by iamachristian.org,Inc All rights reserved.
