Psalms 59 - Quichua Imbabura 2016

Fiñajcunamanda cacharichijuchun, Diosta mañashcamanda(1 Sam. 19:11)Davidta huañuchingapa Saúl cachajpi, paipaj huasipi chapanajushca jipa, ama tucuchihuaichu nishpa candana taquipi, candajcunata mandaj candachijuchun, David rurashca Salmomi.

1Ñuca Taita Dioslla,

ñucata fiñajcunapaj maquimanda cacharichihuayari.

Ñucata llaquichingapa jatarijcunamanda quishpichihuayari.

2Na alita rurajcunamanda cacharichihuayari.

Huañuchij runacunamanda quishpichihuayari.

3Ñucataca huañuchingapami chapariyanajun.

Ninan shinlli runacunami, ñucata llaquichingapa tandanajushca.

Mandaj Dioslla,

imapash na alitaca na rurajpita,

juchatapash na rurajpitami chashna llaquichigrihuan.

4Ñucataca, juchata na rurajpitami, llaquichingapa shamunajun.

Ñucata ricushpa ucha yanapangapa shamupayari.

5Tucuita Mandaj Taita Dioslla,

Canga Israelcunapaj Taita Diosmi cangui.

Tucui llactacunapi causajcunata llaquichingapa jataripayari.

Canda na cazushpa, na alita rurajcunataca, maijandapash ama quishpichipaichu. Selah

6Chishi tigramushpami, alcushna aullashpa,

pueblota muyunajunga.

7Paicunapaj shimihuanga, ninanda jariyashpami rimanajun.

Paicunapaj rimaicunaca, espadashnami chugrichijun.

Paicunaca: “¿Pita uyangayari?” ninajunmi.

8Can Mandaj Diosca, paicunataca asishpami ricungui.

Llactacunapi tucui causajcunataca, na alicachishpami ricungui.

9Ñucata fiñajcuna ninan ushaita charijpimi, Candalla shuyajusha.

Taita Dios, ñucamanda shayarina cajpimi, chashna shuyajushca.

10Ninanda juyaj Diosmi, ñucataca ñaupashpa ringa.

Taita Diosmi, ñucata fiñajcunataca, ñuca ñaupajpi tucuchinga.

11Ñuca llacta gentecuna ama cungachunmi,

paicunataca na ñapash tucuchina capangui.

Paicunataca, Cambaj ushaihuan ninanda pingaichipailla.

Mandaj Dioslla,

Canga ñucanchi jarcarina escudoshnami cangui.

12Paicunapaj shimihuan rimashpami juchata ruranajun.

Paicunapaj shungupi na alita yarishcahuanllata prezushcashna causachun.

Na alicunata rimashcamanda, llullashpa rimashcamanda, chashna tucuchun.

13Ama ashtahuan causachun, ninanda fiñarishpa tucuchipayari.

Jacobpaj miraicunataca, Taita Dios mandajujta yachachun, chashna rurapayari.

Cai pacha manñacunacaman yachachun, chashna rurapayari. Selah

14Chishi tigramushpami, alcushna aullashpa,

pueblota muyunajunga.

15Paicunaca, micunata mascashpa, maitapash purinajuchun.

Paicunaca, micunata na tarishpaca, yarjaihuan llaquilla pacarinajuchun.

16Ñucaca, Cambaj tucui ushaitami alicachishpa candasha.

Tutamandaca, Cambaj ninan juyaita alicachishpami candasha.

Ninan llaquicunahuan cajpi, ñucata yanapashpa, shinllichishcamandami, chashna alicachisha.

17Ñucata shinllichij Dioslla,

Candami alicachishpa candasha.

Taita Dioslla,

ñucata huacaichij, ñucata ninanda juyaj Taita Diosmi cangui.