1Mandaj Diosca, Israelcunahuan cutin ninandapacha fiñarishpami, Davidtaca: Israelcunapash, Judá llactapi causajcunapash, mashna cajta yachangapa yupachun yuyaita curca.
2Shinamandami, Jatun mandajca, paipaj macanajuj runacunata mandaj Joab runataca, cashna nirca:
“Dan pueblomanda callarishpa, Beerseba shuti pueblocaman purishpa, tucui Israel ayllucunapi mashna gentecuna tiyajtapash, yachangapa yupagri” nirca.
3Shina nijpimi Joab runaca, jatun mandajtaca cashna nirca:
“Canda Mandaj Taita Diosca, cunan tiyashca gentecunamandaca, shujmandalla patsajta mirachishpami ali canman. Chaitaca, ñuca jatun mandajpash ricushpami ali capanguiman. Ashtahuangarin ñuca jatun mandajca, ¿imashpata chashna rurangapa munanguiyari?” nircami.
4Shina nijpipash, jatun mandaj rimashcatami, Joab runapash, macanajuj runacunapash cazurca. Chaimandami Joab runapash, macanajuj runacunata mandajcunapash, jatun mandajpaj ñaupajmanda llujshishpa, Israelcunata yupangapa rirca.
5Paicunaca, Jordán yacuta chimbashpami, Aroer shuti pueblo uraman tiyaj, Gad shuti jatun pamba chaupipi carpacunata shayachishpa tiyanajurca. Chai pushtuca, Jazer pueblo chayanallapimi carca.
6Chai jipaca, Galaad llactaman rishpami, Hodsi shuti pugru pambaman chayagrirca. Chaimandaca, Dan-jaán shuti puebloman, shinallata, Sidón pueblo muyundipi tiyaj llactacunamambashmi rinajurca.
7Chai jipaca, jatun pircahuan muyundi jarcashca, Tiro shuti pueblomanmi rinajurca. Shinallata heveo, cananeo gentecunapaj tucui pueblocunaman rishpami, Judá llactapi tiyaj Neguev shuti pambapi tiyaj Beerseba pueblocaman chayagrirca.
8Paicunaca, tucuilla Israel llactata purishpa tucuchishca jipami, iscun quilla, ishcai chunga punllapi Jerusalenman tigrarca.
9Chaipimi Joab runaca, gentecunata yupashpa quilcashcataca, jatun mandajman curca. Israel llactapica, pusaj patsaj huaranga, Judá llactapica, picha patsaj huaranga, espadahuan macanajunata yachaj shinlli runacunami tiyarca.
10Davidca, gentecunata yupashca jipami, paipaj shungupica ninanda llaquirirca. Shinamandami, Mandaj Diosta cashna nirca:
“Ñuca chashna rurashpaca, jatun juchatami rurashcani. Ashtahuangarin cunanga Mandaj Dioslla, Cambajta ruraj ñuca cai juchata rurashcataca anchuchihuai nipanimi. Imatapash na yachaj runashnamari, chashna rurashcani” nircami.
11Tutamanda, David ña jatarishca cajpimi, ima tucunata Davidman villaj profeta Gad runaman Mandaj Diosca, cashna nirca:
12“Davidpajman rishpa, cashna nigri: Mandaj Diosca, cashnami nin: ‘Quimsa llaquicunatami, can agllachun cuni. Chai quimsamandaca, maijanhuan ñuca llaquichijuchun munashpapash, canllata agllailla’ ninmi nigri” nirca.
13Gad runaca, Davidpajman shamushpami cashna nishpa villarca:
“¿Cambaj llactapi canchis huatata yarjaita cachamuchunllu munangui? Na cashpaca ¿Canda fiñajcuna catishpa llaquichijpi, quimsa quillata pacajushpa puringapachu munangui? Na cashpaca ¿Cai cambaj llactaman quimsa punllata jatun ungüita cachamuchunllu munangui? Cunanga, aliguta yarishpa agllailla. Can imata nishcatami, Taita Diosman villagrisha” nircami.
14Shina nijpimi Davidca, Gad shuti runataca cashna nirca:
“Jatun ninan llaquipimari cani. Cunanga, Mandaj Diospaj maquipi llaquichi tucushunchilla. Paica ninandapacha llaquijmari. Runacunapaj maquipi urmangapaca na munanichu” nircami.
15Shina nijpimi Mandaj Diosca, tutamanda callarishpa, llaquichisha nishca punllacaman, Israelcunaman jatun ungüita cachamurca. Chaimandami, Dan pueblomanda callarishpa, Beerseba pueblocaman, canchis chunga huaranga runacuna huañurca.
16Jerusalenbi causajcunata tucuchingapa, ángel callarigrijujpimi, Mandaj Diosca, chashna llaquichijushcataca saquirca. Shina cashpami, huañuchij angeltaca: “Ña chashnalla saqui, ama ashtahuan llaquichijuichu” nirca.
Mandaj Diospaj angelca, Arauna shuti jebuseo runapaj trillana pambapimi ña carca.
17Gentecunata huañuchishpa tucuchijun angelta ricushpami Davidca, Mandaj Diostaca cashna nijurca:
“Ñucami jatun na alita rurashpa, juchata rurarcani. Llamagushnalla cai gentecunaca, ¿imatata rurapashcayari? Paicunata llaquichina randica, ñucata, ñuca taitapaj huasi ucupurata llaquichihuailla nipanimi” nijurca.
18Chai punllallatami Gad runaca, Davidpajman shamushpa cashna nirca:
“Arauna shuti Jebuseo runapaj trillana pambaman vichai rishpa, Mandaj Diosman shuj altarta shayachi” nirca.
19Shina nijpimi Davidca, Gad shuti runaman Mandaj Dios nishcashna vichai rirca.
20Arauna shuti runa ricushpaca, jatun mandajtaca, paipajta rurajcunandi shamujujtami ricurca. Chashna ricushpami, Arauna shuti runaca ucha tuparingapa llujshishpa, jatun mandajpaj ñaupajpi cungurishpa, alpaman chayajta cumurirca.
21Chaipimi Arauna shuti runaca, cashna nirca:
“Ñuca jatun mandajca, ¿imashpata cambajta ruraj ñucapajman shamupangui?” nirca.
Shina nijpimi Davidca, cashna nirca:
“Trillana cai pambata, canda randingapami shamuni. Gentecunata huañuchijuj ungüi jarcarichunmi, Mandaj Diosman shuj altarta caipi shayachingapa munani” nircami.
22Shina nijpimi Arauna shuti runaca, Davidtaca cashna nirca:
“Cai pambataca japilla. Can jatun mandajpaj imashna ali cajpipash rurapailla. Ricui, Diosman cushpa tucuillata rupachina huagracunapash caipimi. Yamdapaca, trillana caspicunapash, yugu caspicunapash tiyanmi.
23Jatun mandajlla, ñucaca chaicunataca tucuillatami can jatun mandajman carapani” nirca.
Arauna shuti runaca, cashnatapashmi nirca:
“Chashna rurajpica, canda Mandaj Diosca, canhuan ali tucungapashchari” nirca.
24Shina nijpimi Arauna runataca jatun mandajca, cashna nirca:
“Napacha chashna rurashachu. Mashnata cashpapash cushpa randishpallami, ñucata Mandaj Taita Diosman cushpa, tucuillata rupachi ushasha” nirca.
Shina nishpami Davidca, trillana pambatapash, huagracunatapash, picha patsaj canchis chunga gramota pezaj culquipaj randirca.
25Chaipimi Davidca, Mandaj Diosman shuj altarta shayachirca. Chai altarpimi, animalta Diosman cushpa huañuchishpa tucuillata rupachirca. Dioshuan ali cangapa ofrendacunatapashmi rupachirca. Chashna rurajpimi Mandaj Diosca, chai llactapi causajcuna ninanda mañanajujta uyashpa, chai huañuchij ungüitaca, Israelcunamanda anchuchirca.
Who We AreWhat We EelieveWhat We Do
2025 by iamachristian.org,Inc All rights reserved.
