1Cai tucui shimicunata villashca jipami Jesusca, Paipaj yachajujcunaman cashna nirca:
2“Pascua punlla chayangapaca, ishcai punllalla tiyajtaca, cangunallata yachanguichimi. Chai punllapimi, Runa Aichayuj tucushca Ñucataca, cruzpi chacatashpa huañuchinajuchun japichihuanga” nircami.
3Shina cajpimi, chai punllallata, sacerdotecunata mandajcunandi, mandashca Shimita yachachijcunandi, chai pueblomanda mandaj ancianocunandi, sacerdotecunata jatun mandaj Caifaspaj huasi patiopi tandanajurca.
4Paicunaca, Jesusta imashna umachishpa japishpa huañuchingapami parlarinajurca.
5Paicunaca cashnami ninajurca: “Gentecuna jatarishpa, ñucanchita ama imatapash nichunmi, cushijuita rurana punllacunapica na japina canchi” ninajurca.
Betania pueblopimi mishquilla ashnajujta Jesuspaj umapi talishpa javishca(Mar. 14:3-9; Juan 12:1-8)6Jesusca, Betania pueblopimi lepra ungüihuan huañujushca Simonbaj huasipi carca
7Chaipi cajpimi shuj huarmica, ashtaca culqui cana mishquilla ashnajun yacuguta, alabastro uchilla fundupi apashpa, Jesuspajman chayamurca. Chai huarmica, Jesús micushpa tiyajujpimi, chai mishquilla ashnajun yacuguta umapi talishpa javirca.
8Chaita Paipaj yachajujcuna ricushpami, ninanda fiñashpa cashna ninajurca:
“¿Imashpata, chashna yanga tucuchijunyari?
9Chai mishquilla ashnajun yacugutaca, ashtaca culquipaj jatushpa, imagupash illajcunaman carashpachari ali canman carca” ninajurcami.
10Chashna ninajujta uyashpami Jesusca, paicunata cashna nirca:
“¿Imashpata cai huarmitaca na alicachinguichi? Ñucapaj ali cachunmi, cashna aliguta rurashca.
11Imagupash illajcunaca cangunapurapica tiyangallami. Ashtahuangarin Ñucami, cangunahuanga na unaicaman causajushalla.
12Cai huarmica, Ñuca huañushpa pambai tucunalla cachunmi, cai mishquilla ashnajujtaca, Ñuca umapi talishpa javingapa shamushca.
13Na llullashpami, cangunataca cashna nini: Cai pachapi, maipi cashpapash quishpirinamanda villanajushpaca, cai huarmi imata rurashcatapash yarichunmi villanajunga” nircami.
Jesustaca, Judas runami “japichishallami” nishca(Mar. 14:10-11; Luc. 22:3-6)14Chai jipami, chunga ishcai yachajujcunamanda, Judas Iscarioteca, sacerdotecunata mandajcunapajman rishpa,
15cashna nijurca: “Cangunaman, Jesusta ñuca japichijpica, ¿imatashi cuhuanguichiman?” nircami. Shina nijpimi paicunaca, “quimsa chunga culquitami cupashun” ninajurca.
16Chaimandapachami Jesustaca, imashnata japichisha yashpa paica purijurca.
Apunchi Jesusca, Pai huañushcata yarishpa micuchunmi callarichishca(Mar. 14:12-25; Luc. 22:7-23; Juan 13:21-30; 1 Cor. 11:23-26)17Levadura illaj tandata micuita callarina punllapimi, Jesuspaj yachajujcunaca Paipajman quimirimushpaca:
“Pascua punllapi micungapaca, ¿maipita alichinajuchun munangui?” ninajurca.
18Shina nijpimi Jesusca, cashna nirca:
“Puebloman rishpa shuj runata cashna nigrichi: ‘Ñucanchita Yachachijmi: Ñuca huañuna punllami ña chayamujun. Chaimandami, pascua punllapi yarishpa micunata, cambaj huasipi Ñuca yachajujcunahuan micungapa munani’ nijun” nigrichi.
19Jesús mandashcashnami Paipaj yachajujcunaca, pascua punllapi yarishpa micungapa alichinajurca.
20Ña tutayajpimi Jesusca, Paipaj chunga ishcai yachajujcunahuan micungapa tiyarirca.
21Ña micunajushpami Jesusca cashna nirca:
“Na llullashpami, nini: Cangunapuramanda shujmi, Ñucataca japichigrihuan” nirca.
22Shina nijpimi ninandapacha llaquirishpa:
“¿Ñucachu Candaca japichina capani, Apunchi Jesús?” nishpa, caishuj, chaishuj tapui callarirca.
23Shina tapujpimi Jesusca cashna nirca:
“Ñucahuan cai platopillata maquihuan micujujmi, Ñucataca japichigrihuan.
24Runa Aichayuj tucushca Ñucamanda quilcashcapi villashcami pactanga. Runa Aichayuj tucushca Ñucata japichij runaca, ¡aij imachari tucunga! Chai runaca, na huacharishca cashpachari ali canman carca” nirca.
25Shina nijpimi Jesusta japichigrijuj Judas runaca:
“¿Ñucachu capani Yachachij?” nirca.
Shina tapujpimi, Jesusca:
“Canllatami chai cangui” nirca.
26Ña micunajushpami, Jesusca tandata japishpa, Diosta pashi nirca. Chai tandata chaupishpa, Paipaj yachajujcunaman carashpaca:
“Japishpa micuichi. Caica Ñuca cuerpomi” nirca.
27Shinallata, copatapash japishpa, Diosta pashi nishca jipami, cashna nishpa paicunaman curca:
“Cai copamandaca, tucuicunallata ufiaichi.
28Caica, mushujta ari nirishcata pactachina Ñuca yahuarmi. Ashtaca gentecunapaj juchacunata anchuchingapami Ñuca yahuarca jicharinga.
29Shinallata, cai uvamanda rurashca vinotaca, cunanmandapacha cutinga na ufiashachu. Ñuca Taita mandajuj llactapi cangunahuan tiyajushpaca, shuj mushuj vinotami ufiashunchi” nirca.
Jesusca, Pedrotaca: “Na rijsinichu nihuanguimi” nishcami(Mar. 14:26-31; Luc. 22:31-34; Juan 13:36-38)30Paicunaca, candanaguta candashca jipami, Olivo lomaman rinajurca.
31Shina rinajushpami Jesusca cashna nirca:
“Cunan tutallatami cangunaca, Ñucata na crishpa tucuilla pandaringuichi. Quilcashcapica, cashnami nijun: ‘Michijtaca chugrichishami. Shinamandami llamacunaca, caita chaita calpanga’ nijunmi.
32Ashtahuangarin, Ñuca causarishpami, cangunata ñaupashpa Galilea llactaman risha” nircami.
33Shina nijpimi Pedroca, cashna nirca:
“Caishujcuna canda na crishpa tucuilla pandarinajujpipash, ñucaca napacha pandarishachu” nirca.
34Shina nijpimi Jesusca cashna nirca:
“Na llullashpami candaca cashna nini: Cunan tutallata, gallo nara candajpillatami Ñucataca, ‘Paitaca na rijsinichu’ nishpa, quimsacaman nigringui” nirca.
35Shina nijpimi Pedroca, cashna nirca:
“Canhuan huañuchi tucunapacha cashpapash, na rijsinichu nishpaca, napacha nishachu” nirca.
Caishuj yachajujcunapash, tucuillami chashnallata ninajurca.
Jesusca Getsemaní shuti pushtupimi, Diosta mañashca(Mar. 14:32-42; Luc. 22:39-46)36Getsemaní shuti pushtumanmi Jesusca, Paipaj yachajujcunandi chayagrirca. Chaiman chayashpami, Paipaj yachajujcunataca cashna nirca:
“Chainipimi Diosta mañagrini cangunaca, caipi tiyanajuichilla” nirca.
37Jesusca, Pedrotapash, Zebedeopaj ishcandi churicunatapash, pushashpa rijushpami, ninan llaqui japijpi, llaquipacha carca.
38Shina cashpami Jesusca cashna nirca:
“Ñuca shungupimi, huañungashna ninandapacha llaquirini. Cangunaca, ama puñushpa, Ñucahuan caipi shuyaichilla” nirca.
39Shina nishpaca, ashaguta rishpallami, alpacaman cumurishpa, cashna nishpa Diosta mañarca:
“Ñuca Taitalla, llaquita apana cai copata yalinalla cajpica, yalichihuailla. Ashtahuangarin, ama Ñuca munaita rurashpa, Cambaj munaita pactachipailla” nirca.
40Chai jipalla, Paipaj yachajujcunapajman tigramushpaca, puñunajujtami japij shamurca. Chaimandami Pedrotaca cashna nirca:
“Shuj horasgutallapash Ñucahuan rijchariyajuitaca, ¿nachu usharcanguichi?
41Na alita rurana munai ama japichun, rijchariashpa Diosta mañaichi. Espirituca, Diosta mañangapa munanmi. Ashtahuangarin cuerpomi shaijunlla” nirca.
42Jesusca, cutin tigrashpami:
“Ñuca Taitalla, llaquita apana cai copata ufianapacha cajpica, can munashcata pactachipailla” nishpa, caihuanga ishcaicaman mañarca.
43Shina mañashpa tigramushpaca, cutin puñunajujtami japij shamurca. Paicunaca, ninan puñuihuan cashpami, ñavita pascaitapash na ushanajurca.
44Jesusca, paicunata saquishpa cutin rishpami, pundalla ima nishpa mañashcashnallata mañajurca. Chaihuanga, ña quimsacamanmi mañarca.
45Jesusca, Paipaj yachajujcunapajman tigramushpami cashna nirca:
“Cunanga, ña puñushpa samaichilla. Ricuichi, Ñuca japi tucuna horasca, ñami chayamushca. Runa Aichayuj tucushca Ñucatami, juchayu runacunapaj maquipi churanga.
46Ricuichi, Ñucata japichij runaca, ñami chayamujun. Jatarishpa, ucha jacuchi” nircami.
Jesusta prezu apangapa japichishcamanda(Mar. 14:43-50; Luc. 22:47-53; Juan 18:2-11)47Shina nijujpillatami chunga ishcaipuramanda Judas runaca, ñapash chayamurca. Paihuanga, ashtaca gentecunami, espadacunahuan, caspicunahuan shamunajurca. Paicunaca, sacerdotecunata mandajcuna, chai pueblomanda mandaj ancianocuna cachamujpimi chashna shamunajurca.
48Jesusta japichingapa shamujuj runami, paihuan shamunajuj runacunataca, cashna nishpa yachachishcalla carca:
“Maijandami ñuca muchani, chai runami canga. Paita japishpaca, ama cacharishpa apanguichi” nishcami carca.
49Jesuspajman ñapash quimirimushpaca:
“Alillachu capangui Yachachij” nishpami mucharca.
50Shina cajpimi Jesusca:
“Cumba runa, ¿imapata shamungui?” nishpa, tapurca.
Shina tapujhuanmi Jesustaca, ñapash chai runacunaca prezu japirca.
51Ashtahuangarin Jesushuan chaipi pacta caj shuj runami, paipaj maquihuan espadata llujchishpa, sacerdotecunata mandajpajta ruraj runataca, rinrita fitirca.
52Shinamandami Jesusca, cashna nirca:
“Cambaj espadataca, maipi tiyajushcapillata churailla. Espadahuan macanajujcunaca, espadahuanllatami huañuchi tucunajunga.
53Ñuca Taitata cunanda mañajpica, ¿nachu chunga ishcai legión angelcunatapash yalita, Ñucaman cachamui ushanman?
54Shina cajpica, Dios quilcachishcapi nijushcashna pactanapacha cashcacunaca, ¿imashnata pactangayari?” nircami.
55Chaipillatami, chai gentecunataca Jesusca, cashna nirca:
“¿Shuhuatashnachu japingapa cangunaca espadacunahuan, caspicunahuan shamunguichi? Punllandimi, Diospaj huasipica, cangunapash ricujta yachachishpa tiyajurcani. Chaipica, na japishpa saquircanguichillami.
56Ashtahuangarin, Dios quilcachishcapi profetacuna nijushca pactachunmi, cangunaca cashna japingapa shamushcanguichi” nircami.
Chaipimi Jesuspaj yachajujcunaca, Paitalla saquishpa, tucuilla pacajushpa calpanajurca.
Mandajpuralla tandanajushcapaj ñaupajmanmi, Jesustaca apashca(Mar. 14:53-65; Luc. 22:54,63-71; Juan 18:12-14,19-24)57Jesusta prezu japishpaca, sacerdotecunata mandaj Caifaspajmanmi aparca. Chaipimi, mandashca Shimita yachachijcunapash, chai pueblomanda mandaj ancianocunapash, tandanajushca tiyanajurca.
58Ashtahuangarin Pedroca, caru carulla catishpami, sacerdotecunata mandajpaj huasi patiocaman rijurca. Chaiman yaicushpaca, Jesusta imata rurajtapash ricungapami, chai huasita ricuj chapajcunahuan tiyajurca.
59Chaipica, sacerdotecunata mandajcuna, chai pueblomanda mandaj ancianocuna, mandajpuralla tandanajuj runacunami tiyanajurca. Paicunaca, Jesusta huañuchingapa nishpami, na shina cajpita, chashnapachami nichun mascanajurca.
60Ashtaca runacuna llullashpa villanajujpipash, na alita rurashcataca na tarircachu. Ashtahuangarin chai jipaca, ishcaipura runacunami, Jesusmandaca llullashpa villangapa chayamurca.
61Paicunami cashna ninajurca:
“Cai runaca: ‘Taita Diospaj huasita urmachishpapash, quimsa punllapilla cutin shayachi ushashallami’ nircami” ninajurca.
62Shina ninajujpimi, sacerdotecunata mandaj jatarishpaca:
“Caicuna, Canda cashna ninanda juchachinajujpipash, ¿nachu imatallapash tigrachina cangui?” nirca.
63Ashtahuangarin Jesusca, upalla shayajurcallami. Chaimi chai sacerdotecunata mandajca, cashna tapurca:
“Causajujlla Taita Diospaj shutipimi, ama llullashpa villai nini. Canga, ¿Taita Diospaj Churi, Cristochu cangui?” nirca.
64Shina nijpimi Jesusca, cashna nirca:
“Canllatami ña cashna nijungui. Cashnatapashmi, cangunataca nini: Runa Aichayuj tucushca Ñucataca, ninan ushaita charij Taita Diospaj ali maquiman tiyajujtami, cangunaca ricuhuanguichi. Shinallata, jahua pachamanda fuyupi shamujtapashmi ricuhuanguichi” nirca.
65Shina nijpimi, sacerdotecunata mandajca ninanda fiñarishpa, paipaj churajushcataca liquishpa, cashna nirca:
“¡Diostami na ali shimicunata rimashca!, ¿Ashtahuan shuj villajcunata tapunarachu canchi? Pai imata nirijujtapash, cunan cangunallata ña uyanguichimi.
66Cangunaca, ¿ima yanguichita?” nishpami tapurca.
Shina tapujpimi:
“Chai runaca, huañuchi tucunapachami” ninajurca.
67Chashna nishpallami Jesustaca, ñavipi t'ucashpa huajtanajurca. Huaquingunaca, ñavipi huajtashpami,
68cashna ninajurca:
“Cristo cashpaca, yachaiyari. ¿Candaca, pita huajtarcanchi?” ninajurca.
Pedroca, Jesusta na rijsinichu nishcami(Mar. 14:66-72; Luc. 22:56-62; Juan 18:15-18,25-27)69Pedroca, huasi canlla patiopi tiyajujpimi, shuj cuitsa quimirishpaca:
“Cambashmari, Galilea llactamanda Jesushuan purijurcangui” nirca.
70Ashtahuangarin paica tucuicunapaj ñaupajpimi:
“Na rijsinichu imatachari nijunguipash” nirca.
71Shina nishpalla punguman ña llujshijujpimi Pedrotaca, shuj cuitsapash ricushpa, chaipi shayanajujcunaman:
“Cai runapashmari, Nazaret pueblomanda Jesushuan purijurca” nirca.
72Ashtahuangarin Pedroca, cutinmi:
“Chai runataca, rijsitapash na rijsinichu” nishpa juramenturca.
73Chai jipallami, chaipi shayanajujcuna Pedropajman quimirishpa, cashna ninajurca:
“Cambash, chai runata catijpurallatami cangui. Can chaipura cajtaca, cambaj rimaipillatamari rijsinchi” ninajurca.
74Shina nijpimi:
“Chai runataca, rijsitapash na rijsinichu” nishpa, ninanda na alicachishpa juramenturca.
Shina nijujhuanmi, galloca candarca.
75Chaimi Pedroca, Jesús villashca shimicunata yarirca. Jesusca, cashnami nishca carca: “Narapash gallo candajpillatami, canga Ñucataca quimsacaman ‘na rijsinichu’ nihuangui” nishcami carca. Chaita yarishpami Pedroca, canllaman llujshishpa ninandapacha llaquirishpa huacajurca.
Who We AreWhat We EelieveWhat We Do
2025 by iamachristian.org,Inc All rights reserved.
