SOFONÍAS 2 - Quichua Imbabura 2016

Shuj llactacunatapash llaquichinamanda

1Llactapi causaj na pingaj gentecunalla,

tandanajushpa aliguta yarichiyari.

2Llaquichishami nishcapash nara pactajpillata,

jupatashna shitana punlla nara chayamujpillata,

Mandaj Dios ninanda fiñarina punllapash nara chayamujpillata,

Mandaj Dios ninanda fiñarishpa llaquichina punllapash, cangunaman nara chayamujpillata, aliguta yarichiyari.

3Cai pachapi causanajuj ali shunguhuan imatapash ruraj tucui runacuna,

Pai mandashcata pactachijcuna Mandaj Diosta mascaichiyari.

Alitalla rurashpa causanatapash, na jariyashpa causanatapash mascaichiyari.

Mandaj Dios fiñarishpa llaquichijui punllapica huacaichi tucunguichipashchari.

4Gaza shuti puebloca, jichui tucushcami canga.

Ascalón shuti pueblopashmi tucuilla tucuchi tucunga.

Asdod shuti pueblomandaca, punllami shuhuashpa apanajunga.

Ecrón shuti pueblopash, llaquichi tucungami.

5Mama cucha manñapi causanajuj cereteo runacunaca,

¡aij imachari tucunga!

Filisteo runacuna causanajuj Canaán llactalla,

Mandaj Diosca cangunata fiñashpami, cashna nirca:

“Chaipi causachunga, shujllatapash na saquishpami tucuchisha.

6Chaimandami, mama cucha manñapica, michina pambacuna tucunga.

Llamacunapaj corralcunatami, chaipica shayachinga.

7Chai alpaca, Judá shuti runapaj miraimanda huaquin puchushcacunapajmi canga.

Paicunami chaipica michinajunga.

Ascalón shuti pueblopi tiyaj huasicunapimi, tutaca puñunajunga.

Paicunata Mandaj Taita Dios ricugrishpami, paicunataca prezu tiyanajushcamanda cacharichinga.

8Moab llactapi causaj gentecuna, na alicachishpa rimanajujtaca uyarcanimi.

Amón llactapi causaj gentecuna, na alicachishpa rimanajujtaca uyarcanimi.

Chashna rimashpami, Ñuca agllashca gentecunataca ninanda llaquichishca.

Paicunaca, Israelcunapaj llactata quichushpami, jariyashpa chaipi causanajurca.

9Tucuita Mandaj, Israelcunapaj Taita Dios Ñucaca causajunipachami.

Moab llactaca, Sodoma puebloshnami tucuringa.

Amón llactapash, Gomorra puebloshnami tucuringa.

Chaipica, tsinicunallami jundanga.

Cachita llujchina pushtucunami tucunga.

Chashnami causaita causaicaman, tucuilla tucuchi tucunajunga.

Ñuca agllashca gentecunami, paicuna ima charishcacunataca apanajunga.

Paicunallatami alpacunatapash japinajunga” ninmi.

10Paicunallata jariyashpa jatun tucushcamanda,

tucuita Mandaj Diospaj agllashcacunata na alicachishcamandami, chai llaquicunaca japinga.

11Mandaj Diosca, paicunahuanga ninandapachami fiñaringa.

Cai pachapi tiyaj rurashcalla dioscunataca, tucuillami tucuchinga.

Diostaca, tucui llactacunapi causajcunami, maipi cashpapash ninan manllaihuan cungurinajunga.

12Diosca: “Etiopía shuti llactapi causajcuna,

cangunapash Ñuca espadahuanmi huañuchi tucunguichi” ninmi.

13Diosca, Paipaj maquihuanmi, Asiria llactataca tucuchinga.

Nínive pueblotapash, tucuilla tucuchishpami, jichushca pambatashna saquinga.

14Chaipica, huasipi charina animalcunapaj corraltami ruranga.

Chaipica, tucui sacha animalcunapashmi causanga.

Pelícano, erizo animalcunapash, huasi pilar jahuacunapimi puñunajunga.

Chai animalcunami, huasi ventanacunapi huacanajunga.

Cedro caspicunahuan quilpashpa rurashcacunapash ricurijujpimi,

pungucunapash tucuilla urmashpa tucuringa.

15Chai pueblopi causajcunami imatapash na manllashpa, cushijushpa causanajurca.

Paicunapaj shungupica: “Ñucanchillami, cashna jatunguna canchi” yashpami causanajurca.

¡Chashnamari tucuilla tucuchi tucushca, sacha animalcuna causanallami tucushca!

Maijan chaita yalijcunaca, na alicachishpa, asishpami rinajunga.